Chi Thlah Buaia Buai

Thilnung zawng zawng, thil to leh Rannung lam chen hian chi thlaha lo pung tura ruat leh din kan nih hi chu kan hre tlang hlawm hle in a lang. Chuti chung chuan Mihring theuh theuh pawh chi thlah chungchang vang leh fate vanga buai bik riau hi zawng kan awm chu anih hi. Thilnung hrang hrang zingah pawh chi thlah buaipui bik riau an awm ni in a lang. Chung zinga buai ber pawl ni awma lang chu Australia chhim lama cheng, leia tla thin Sava chi khat, Mallee an tih khu an ni awm e.

Nupa bika inkawp chi an ni a, a Nu tui hun a lo thlen dawn chuan an Nupain lei an lai khuar thin a. An lei laih pawh a thukin a lian fe reuh nia. A thuk lam chu Feet hnih leh Feet thum inkar a ni ber a, a zau lam chu Feet sawm bial a ni deuh ber. Chu khuar chu thinghnah, thingtang leh thinghawng, tawih thei tur chi in an hnawh khat leh vek phawt thin. Ruahin a nan huh hunah leiin an vur leh tlat a, chumi hnuah a lo tawih a, a lo lum ta hum hum thin a ni.

Zing tawk taka a lum tawk tawh leh tawk loh a hmuia zuk tih pawha zuk fiah chu a Pa hna a ni a. A tawk tur anga lum, 33° C vel a nih chuan a Nu chu a tui ta thin a ni. A tlangpuiin, kar khata pakhat zel tuiin, a Nu hi thla ruk chhung vel a tui thin. An bu pakhatah 26 vel a tui tihna a nih chu. A tui hi ni sawmnga velah a lo keu a, pasarih vel a tui tihah an fa hmasa chu a piang dawn a nih chu. Chuta tang chuan kartin fa an nei a, kartin an tui bawk dawn tihna a nih chu. An chhangchhe ve hle ang.

An tui dang dahna tur hisap ran chungin a Pa chuan a Nu tui chu a bu-ah chuan a dah a, a chhin tha leh diam thin. Chutianga a Nu tui buaipui chu a Pa chanvo a nih chu. A taima nge, a Thaibawih? Chu mai bakah an bu lum dan a pangngai renga siam chu a Pa tihtur a ni leh zel bawk. Fur ruahtui tlak tirh vel chuan an bu chu a tawih ral chak bik a, chutih hun chuan a Pa chuan a tui chu zing tin a la chhuak ang a, boruak thianghlimah a pho chhuak ziah tur a ni. Tin, Nipui a lo nih chhoh chuan ni sa lutuk laka veng turin a Pa chuan an bu chu leiin a khuh belh sauh sauh thung tur a ni leh a. Thlasik rim a lo nam a, an bu pawh a lo tawih ral zo titih tawh a, a tui pawhin a mamawh ang lumna a dawng zo lo leh ta thung a, chumi hunah chuan a Pa bawk chuan a tui chu ni tin, chawhma lamin a la chhuak ang a, ni lumah a pho leh ngei ngei tur a ni.

An fa lo piang hmasa apiang chuan hrilh ngai lovin an bu, feet thum zeta chhah hreuh pawh chhoh chu an puala lum tih an hre ve nghal chat a. Darkar 15 vel chhungin an rawn inhai hawng ve thei thin. An nu leh paten an Laiking fa neih chawt avangin an fate chuan hnim buk, invenna tur leh chawlhna tur an pan nghal chat zel a, a tui atanga an keu chhuah atanga Darkar 24 chhungin an thlawk thei ve mai thin. Chhungkaw inngaihsak zui lutuk chu an ni lem lo. Chuvangin, rin ai chuan an chhangchhe leh lem lo a nih hmel.

Chutianga an fate an han indantir zawh hnu chuan an ni nupa chuan chawlh an han hmang ve ta vang vang a. Mahre an chawl rei vak lo, thla khat vel zet chu an chawl ve awm e. Chumi hnu chuan an bu tur a thar hlakin an chhep tan leh mai thin a ni.

ђ๓คг tlคภﻮtє