Silent Night

Austria rama Salzburg khaw kianga thingtlang khaw te reuh te, Oberndorf-ah chuan vur phingphisiau a sur seng seng a, lung remkhawma sak Inte chu a bawh paw chiai vek a. Chu khaw chhung mi te chuan kum khat chhunga zan thianghlim ber hman nan engkim an peih vek tawh a. An khaw biak in dar chu nakin lawkah a ri ral ral anga, ringtute chuan tawngtai leh fakna hla sa chungin Krista piancham lawmna hun an hmang tawh ang. An Biak In chhungah erawh boruak a pik hle thung. 1818 Krismas urlawk ni a ni a. Puithiam Joseph Mohr-a chuan an Organ neihchhun chu a chhia tih a hrechhuak tlai tlat mai. Mohr-a chu a mangang tak zet a. A siamtha thiam lo thlen meuh chuan Krismas ni a liam thui hle tawh dawn tih a hre reng a. Chu puithiam la naupang tak, kum 26 mi lek tan chuan rimawi tel lo chuan Krismas in awmzia a nei lo.

Mohr-a hi a naupan tet atanga rimawi ngaina mi niin zai, Violin tum leh tingtang tumin vantlang zingah pawisa a lo hlawh chhuak tawh thin a. A pa chu sipai niin a nu chu puanthui nia sawi a ni. A school kalna leh university kalna thlengin zai leh rimawi tumin a inchawm chho vek a. A taimak leh thawhrim dan lo hretu puithiamin puithiam hna zir turin a thlemthlu a, 1815 kumah nemngheh niin Oberndorf-ah hian 1817 atangin rawngbawl tura dah a ni ta a ni. A rawngbawlna kohhrante chuan an puithiam thuhril mai baka tingtang tum a thiam hle mai leh folk music leh pathian fakna hla sakte a thiam hle mai te chu mak an ti hle.

An Organ chhiat avanga lunghnur tak chungin Mohr-a chuan a lehkha chhiarna pindan a pan a. Tingtang nen ngawt chuan Krismas hla un sak a remchang dawn lo tih a hria. Tingtanga rem theih ngei tur hla phuah zai a rel a. Pen leh a ziahna tur lehkhaphek a inchhawp a, chutih pah chuan a hma lawka a kohhran enkawl zinga chhungkaw pakhat nau piang hlim a tlawh, nu in a fa sen te duat taka a chawi lai kha a mitthlaah a lo lang a. Mohr-a chuan kha mite nufa a mitthla atang khan kum sang khat dawn lai kal tawha zan thiang reh laia nu leh a fa sen pianghlim, inchawi tlei lai ni awmte chu a suangtuah chhuak ta daih a.

A'n ziak chhin a, hmuh theih loh kutin a rawn ziahpui emaw tih mai tur hian lehkhapuanah chuan hla thu a rawn chhuak zung zung a, a hla laimu ber "Stille Nacht, heilige Nacht" tih chu hla thu mawi tak tak hian a rawn chhunzawm nghal zung zung mai a ni. Chu Krismas thawnthu ropui tak mai chu hla chang rukah a ziak zo a, van lam thiltihtheihnain a rawn thuam tih loh rual a ni lo. Hun a tlem tawh si, a hlathute chu thluk nei tura buatsaih a la ngai a, zanlai dar rik hma ngeia peih hman ngei tur a ni. An khaw thenawm hnaite, Arnsdorf khaw zirtirtu Franz Xaver Gruber, kum 31 mi chu a va pan ta a.

Gruber-a hi chuan a music thiamna hi a thup thin a. Puantah mi a pa chuan music ah eizawnna tham awmin a hre lova, a naupan lai leh tlangval laite chuan a pa hriat lohin an school zirtirtu hnenah Music a va zir ru thin. Ni khat chu a Organ tum lai a pa'n a lo hre fuh palh a, thiam a tih em avangin zir zawm a phalsak ta law law a. zirtirtu hna thawkin an khaw kohhranah Organ tumtu ber a ni zui ta zel a.

Mi pahnih ina an sak rual chi tura a hlathu siam sa, a thluk ngaihtuah sak tur chuan a va ngen ta chawt mai a. Gruber-a chuan hlathu chu a'n en a, Mohr-a, a biak in lam pana hmanhmawh taka a kir leh lai chuan Piano hmaa thuin a thluk tur a ngaihtuah tan ta a. Zan tlai tawh takah chuan hla thluk chu siam zovin Mohr-a hnenah chuan a va tlan phei thuai a. Enchhinna hun pawh an nei tlem tawh. an han tichhin a, Mohr-a chuan Guitar perh chungin a sa anga, Gruber-a'n a lo bass anga, 'Silent night, Holy night' tih laiah zaipawlin an lo pui ve thin dawn a ni.

Zanlai a lo thleng dawn ta. Kohhran mipuite chuan zanlai hunserh hmang turin Biak in an rawn pan a, Organ ri ruai ruai kara Biak in chhung luh an tum laiin Biak in chhung boruak chu a reh duk mai a. Hun tiam a lo thleng ta. Father Mohr-a chu mipui hma dawhsanah chuan a rawn chhuak a, Gruber-a chu a kianga ding ve turin a hawi a. An Biak in Organ chhiat avanga Music pangngai tum theih anih loh dan tlem a han sawi hlek a. Mahse rimawi a awm loh phai dawnlo a ni, a han ti leh a. Gruber-a nen chuan a bik taka an buatsaih hla thar an sak tur thu chu a han sawi zawm bawk a.

Gruber-a nen chuan Krismas hla thar mawi em em chu an sa dun ta a. Zaipawlin a hla laimu laiah an lo pui ve zel a. Alps tlang vur bawm khah luk boruak thiang ang maia rilru dam sawng sawngna khawp hla thar mawi tak chu kohhran mipui pungkhawmte chuan thinlung leh tihtak zeta ngaithlain an reh duk mai a ni. Hla an sa zo a, Mohr-a chuan hunserh hman chhunzawmin pungkhawm ho hnenah chuan lawmthu a sawi a, thingthiin an tawngtai rual a, chumi zan zanlai inkhawm chu a khamawm loh takzet a ni.

Khami zan khan thu a tawp hlen teuh hle. Zan khat thil thu pawimawh zual phuhruk nan maia phuah an ni bawk a, an hla khan sak zui a hlawh hran lo a, khua a lo thal a, an Biak In Organ chu siamthat a ni chauh a. Chumi hnuah Mohr-a chu Kohhran danga sawn a ni a. Kum engemaw ti chhung chu a hlathu ang hrimin Zan thiang reh tih hla chu a reh zui vawng vawng mai a ni.

Vanneihthlak tak maiin an Organ chu hmantlak a ni lo zui zel a. Puithiam thar chuan siamtha turin 1824 emaw 1825 emaw khan a siamtha thiam Carl Maurachera chu a ruai a. Carl-a chuan a'n belchiang vel a, organ chhungah chuan Mohr-a te hlaphuah, an kutziak ngei, a thluk leh remna turte nena ziah thlap mai chu a hmuchhuak a. A hlathu tluangtlam leh mawi tak mai chuan a thinlung a hneh a ni ngei ang, Gruber-a hnenah chuan a copy a dil ta chawt a, an inpe ta a ni.

Oberndorf khua a chhuahsan hnuin Carl-a chuan kha hla ziak kha chhawm zelin a sa fo thin a. A ngaithlatute chuan mawi an ti thei em em a. Rei vak lo hnuah Tyrolean folk singers, Europe ram hrang hrang fanga zin kual thinte chuan mawi an tih avangin an hla sak thin list-ah an telh ve ta a, chung zinga rual khat chu Strasser Family an tih te chu an ni.

Strasser Family hi unau mipa leh hmeichhia pali zaithiam zet mai an ni a, 1831 emaw 1832 ah emaw khan Strassers chuan Germany rama Leipzig-a trade fair an neihna ah Silent Night chu an sa a, mipuiin thiam an tiin chu hla chu mawi an ti takzet a. Hemi hnu lawk hian tualchhung chanchinbu pakhat chuan a hmasa ber atan he hlathu hi a chhuah a, chutah pawh chuan a hla thupui "Silent Night" pawh hmang lovin Tirolerlied (Tyrolean Song) a ti satliah ringawt a, Mohr-a emaw Gruber-a hming emaw pawh tihlan a ni lo.

A hla chuan a fang zau zel a, nakinah phei chuan Folk song sa thin chhungkaw lar tak The Rainers te zarah Atlantic tuifinriat a kan pha ta hial a, anni hian America ram an fanna-ah an sa lar zual ta em em mai a ni. He hla ngaithlatu tam berte chuan hla tlanglawn satliah maiah an ngai thei ngai lova, hlaphuah thian un Haydn-a phuah a nih an ring ngawt zel a. Gruber-a leh Mohr-a te lah chuan an hlaphuah lar tak em em zia chu an hre reng reng lo. Father Mohr-a chu kum 55 mi niin rethei tak, Pneumonia veiin 1848 khan a thi a, a hla phuahin khawvel kilkhawr ber ber thlenga a fan thu reng a hre lo. King Frederick William IV of Prussia hnuaia zaipawl hruaitu berin he hla phuahtu a zawnna lamah 1854 khan Gruber-a pawh chuan an hlaphuah larzia a hre ve tan chauh a, kum 67 mi niin, hlaphuahtu an zawn thu hriain he hla lo chhuah dan hi Berlin lamah lehkhain a hrilh ta a ni.

A tir lamah chuan mithiamte chuan heng mi hnuaihnung tak tak pahnihte mai hian hla mawi leh ropui phuah chhuak thiam turah an ngai lova. 1863 a Gruber-a a thih ni thleng chuan ringhlel an la awm fo thin. Hemi kum vek hian Rev. John Freeman Young chuan he hla-a chang 3, tun thlenga sak lar tak zel hi saptawngin a let ta chauh a ni. Tun hnuah rinhlelhna awm ta lovin Austria ramah chuan anmahni hriatrengna siam a ni ta hial a. Krismas hla (Carol) lam expert, William Studwell of Northern Illonois phei chuan "Silent Night hi music lama Krismas chhinchhiahna ber a ni," a ti.

A ni taka, he hla hi khawvel ram tinah tawng chi tinrenga sak niin, German leh Welsh te, Swahili leh Afrikaans te, Marathi, Malayalam leh Mizo tawng tein sak a ni vek tawh a; malzai thiamah lah Bing Crosby, Elvis Presley, Stevie Nicks leh Dolly Parton leh Kenny Rogers inkawp te thlengin mawi tak takin an sa hlawm.

He hla hian khawvel hmun hrang hrangah hnuhma lawmawm tak tak a nei fova. 1914 indopui pakhatna-ah phei chuan British leh German-ho inep khirhna lai berah zan reh lai takin German sipai hote'n he hla hi rawn sa chhuakin British sipaiten an lo zawm a. Krismas urlawk zan ropui takah chuan hmelma inep rengte chuan hlim em emin hun an hmanho theih phah a ni. He indona-ah vek hian Siberian lunginah German, Austrian leh Hungarian saltang ten Silent Night hla an sak chu Russian Commandant chuan mittui tla zawih zawihin, German tawng pai tak hian, "Kum khat chuang kan indo hnua hmelma ena ka en loh theih hun cheu chu zanin chauh hi a la ni," a ti bawk.

1944 kum khan Nazi hovin an awpbeh Czechoslovakia ramah German sipai Officer pakhat chuan Krismas zanah nau hnuchham chawmna hmun a tlawh a, German tawnga Silent Night sa thei an awm em tih a zawt a. Mipa naupang pakhat leh hmeichhe naupang pakhat rawn pen chhuakin, 'Stille Nacht, Heilige Nacht' tih chu an han sa a, German Officer chu a nui sak a. Chu veleh an thlaphang thut a. Helai bialah hian Juda mite chauhin German tawng an thiam avangin an Juda nih an inpuang a ni ta der mai. Mahse German Officer chuan, 'Hlauthawng suh u, engmah ka tih lo ang che u,' a lo ti a. Puithiam valai leh Zirtirtupain an lo sak tawh, khawvel mi tam tak thinlung lo khawih thin chuan he German sipai officer thinlung pawh hi a lo khawih ve em em a ni.

Tluangtea Hnamte

A Christmas Carol

 Mipa naupang, kum 12 mi lek chu a thawh sen loh tùr a hma dawhkanah chuan a inchhawp ur a. Saidawiuma lehkha lo bel zèl chu a hna a ni. Nitin, dàrkàr 12 chhùng hna thawkin, shilling 6 chauh a hlawh a. Chu kudam-a a thian te chu sazu rual te chu an ni mai! London thlasik daifimin tukverh a rawn bawh chiai te chu rilru hrehawm takin a thlir thin a. A tàn chuan beiseina èng mawi hmuh tùr a awm thlawt lo a ni ber mai. A pa chu lei ba a ngah avàngin lung inah khung a ni a, a fapa chu lehkha pawh a zirtìr thei lo, nì khatah dàrkàr khat chauh lehkha bihna hun a nei thei tawk a ni. Chu naupang chu a beidawngin, reithei bik hliah hliahah a inngai lo thei lo a ni!

Hei hi 'A Christmas Carol' tih thawnthu ropui leh khawvèlin an chhiar nawn fo ziaktu, Charles Dickens-a pan lai nun chu a ni.

Krismas chu thla hnih chauhin a dang tawh a. Dickens-a ngaihtuahna ber chu, Christmas thawnthu ngaihnawm tak ziah chu a ni lo thei lo. Thawnthu tawi, felfai leh lungkuai tak a ni tùr a ni. November thla tàwpa peih hman ngei tumin a bei ta a. Tichuan, December nì 2-ah a zo thei ta tawk a, a kawm tùr pawh ama'n a design vek a. A man pawh shilling 5 chauh a ni ang. Dec. nì 17 chuan hralh chhuah theih tùrin an peih ta a. Urlawk zàn chuan copy 6,000 zet mai an hralh ta mai a.

He a thawnthua a changtupa, Ebenezer Scrooge-a hi pa kawm èm èm mai, London-a sumdawng hausa a ni a. Tum khat chu, Christmas Eve-ah a thianpa, Marley thlarauin a rawn tlawh a. Marley-a chuan a dam laia mi te a tanpui duh loh avàngin a thlarau chu thir khaidiata invet buai chunga a vahvaih thu te chu hrilhin, a ni paw'n a nun dàn chu a sim lo ngat a nih chuan chutiang bawka a awm tùr thu te leh Krismas thlarau pathumin an rawn tlawh tùr thu te chu ràpthlàk takin a hrilh ta chiam mai a. Marley-a sawi ang tak chuan Scrooge uikawma chu thlarau pathum te chuan rawn tlawhin, an zilh ta hlak a. Chu mi atang chuan a nun dàn sual tak chu simin, pa tha leh nelawm tak, mi piangthar tha tak a ni chho ta a ni!

Charles Dickens-a hian novel hlawhtling tak tak mai - 'David Copperfield', 'A Tale of Two Cities', 'Great Expectations' te leh Oliver Twist, Nicholas Nickleby leh The Pickwick Papers bàkah, 'Martin Chuzzlewit' te a ziak a. A Christmas Carol pawh hi lehkhabu làr tak niin, ' The Second Greatest Christmas Story Ever Told' tite'n an sawi hial rèng a ni. He lehkhabu hi, 'Krismas Chanchin Tha Thehdarhtu (Apostle of Christmas)' ti-a sawi a ni ta nghe nghe a ni!

Charles Dickens-a hi kum 1870-ah a thi a. A thih thu hian khawvél pum a fan chhuak a. London khawpuia naupang rethei pakhatin a thih thu a lo hriat chuan, "Krismas pa a fam ta a nih chu! " a ti hial a ni!..

* Krismas ropuina chu a behbawmah a innghat lo a, kan thinlunga nau thar pian tír hi a ni!

KC-i Pa, Khawlhring

Ngaihnawm Dangdai

☀ China rama Chongqing hmuna cheng Li Huiyan chuan an In hnuai lei chhungril ah tui luang awm tlata a hriat a vangin hlawhfa ruaiin an lai ta a. An choka zawn 50ft an laih hnu ah tui luang an lai thleng ta a. Chu tui luangah chuan sangha a lo tam phian lehnghal a. Lên an zuk zar thin a, an chhungkaw kham khawp chu man tur a awm reng a ni. Nitin sangha an hmeh theih phah thin a ni.

☀ England rama Birmingham a zirlai pakhat Roisin Madigan chuan inhlawhna hahdam em em mai a thawk thin a. Khum siamtu industry pakhatin an khum siam apiang mut a nuam dawn nge dawn lo enchhin nan an mut chhin tir thin. Thla 1 ah $ 1500 a hlawh.

☀ Kum 2009 a Arizona State a Council Election an neih tumin Cave Creek ah chuan Candidate 2 te votes 1925 ve ve hmu in an in draw tlat mai a. Inthlan that leh ai chuan tiin Playing Cards hmangin chak zawk an zawng ta ringawt. Card phawk huai zawk zawk chu chak zawk tura tih an ni a. Adam Trenk chuan Tawka King a phawk a, Thomas Mc Guires chuan Tawka Six a phawk ve thung. Adam Trenk chu tlingah an puang ta a ni.

☀ Georgia rama Camden County a Jail guard te chuan Jail tang tlangnel tak mai an man fuh a. Chu Jail tang chu Jail atanga chhuak ru in Dawrah mi cigarettes a ru a, Jail ah a lo kir leh thin a. Chutianga Ni tamtak a tih hnu ah Jail guard ten an man chhuak ta a ni. Tlanchhuah pawh a tum lem lo ni awm tak a ni.

☀ British mi pakhat Adrian Hayes hian kum 1 leh a chanve chhungin khawvel hmawr/tawp 3 ah a kal vek tawh. Kum 2006 May ah khawvel chhip Mt.Everest a lawn chhuak a. Kum 2007 April ah Hmartawp a thleng leh a. Kum 2007 december ah Chhimtawp a thleng leh a ni. Khawvela Tui thuk lai ber Mariana Trench mawng thlengin liluh thei hlauh se chuan khawvel hmawr/tawp zawng zawng a thleng kim ni mai tur.

☀ England a Sussex hmuna Zawhte pakhat ninhlei lutuk chuan Telephone box atangin Police Emergency no. 999 a lo dial thin a. Police ten an pick up in a reh daih zel bawk si. Chutianga vawi 4 lai a tih hnu chuan Police ten phone neitute In an rawn chhui thleng ta a. An zawh chian chuan an zawhte in number a lo thai kual thin lek a lo nia.

☀ China rama Hubei Privince a cheng Mo Zhaoguang chuan an in bul lawkah Lawi a vulh a. Zan lama an Ranin tha taka a kalh, light a off vek amaha lo eng a, rei vaklo hnua thim leh ringawt thin chu mak a ti hle a. Zan tamtak hnu ah pawh a chhan a hre chhuak zo ngang lo. Zankhat chu a bihthla ta hial a. Zanlaia Lawi tuihal chuan electric switch chu a hmuiin a nawr on a, tui a in zawhah a nawr off leh thin a lo ni. Lawi mak tak chu a va ni em!

☀ Kum 2009 khan US Secretary of State Hillary Clinton chuan Kenya ram a tlawh a. Nairobi Councilor hlui Godwin Chepkurgor chuan a fanu pasal neih denchhenin Clinton chu Bawngpui 20 leh Kel 40 a lo pe. 9. Michigan a Griffin of Pontiac mi Tarrance leh Tariq te chu Phir ni siin Ni hrang, Thla hrang leh Kum hrangah an piang. Thil mak vak a ni lo. Tarrance hi 2008, December ni 31 zan dar 11:55 ah a piang a. A hnu minutes 26 ah Tariq chu kum 2009 January ni 1, zing dar 12:17 ah a piang ve thung a ni.

☀ Kum 1944 khan USSR Fighter pakhat chu Norway ram bul lawk vur zingah a tla a. A hnu kum 3 ah an hmuchhuak chauh a. An hmuh chhuah hian Fighter chu vurin a lo khuh vek a. Pilot chu a seat ah thu in Cigarette a la pet kawh..

☀ Kum 2009 khan South West Florida tum tur Thlawhna pakhat chu van boruakah pilot a thih thut avangin passanger zinga pakhat Doug White chuan a khalh chhunzawm ve tawp a, him takin a tumpui a ni.

☀ Australia rama New South Wales mi Luba Relic chuan Traffic dan a bawhchhe nasa deuh a ni ang, Court in kum 3000 AD thleng Lirthei khalh thei lo turin a chung thu an rel.!!

Hmar Tlangte

An Old Christmas Card - Jim Reeves

Christmas a lo hnai chho leh ta hle mai, boruak te pawh a thlasik khua ta. Lung te pawh a leng ve leh tan ta veng veng mai. Hmun hrang hrangah Christmas hla hriat tur a awm ta nual mai. Kumtin mai a Christmas ti Christmas em emtu pakhat chu Jim 'The Gentleman' Reeves-a hla ho muang dam ruih mai te hi an ni tlat mai. Christmas hla thar tamtak hi rawn chuak mahse Saphla ah pawh Mizohla ah pawh Christmas boruak a min chen tir veng vengtu bik hi an awm tlat thin.

Old Christmas Card Chu:

Inchhunga bungraw tawngtawl tamtak zingah chuan thingrem hlui tawh tak mai, paw deuh thar tawh hi a awm a. Chu thingremah chuan eng engemaw thil hlui deuh deuh bak hmuh tur a awm lo. Achhungah chuan eng eng te nge awm pawh kan hre vek seng lo, mahse chung bungrua leh thawmhnaw hlui tawh tak tak mawngah chuan thil hlu tak mai, a sum leh pai ang zawnga thil hlu ni miah lo, mahse a neitu tan erawh rangkachak tangka aia hlu zawk, suangtuahna khawvel a chen tir theitu thil pakhat a awm tlat mai. Chu thil hlu tak chuan suangtuahna khawvelah chen tirin, ngaihtuahna mu hnu a kaitho a, hun liam tawh hnu chu mitthla an kokir thar leh in lung hlui a tileng in hlim lai ni te a ngaih tir thin a ni.

Chu thil chu a hmangaih ber nen a Christmas an hman dun hmasak ber tum a an Christmas tree hmasaber hnuaia thilpek dang tamtak zinga lo let bal mai a hmuh, a hmangaih leh duhber mai in a a tan liau liau a a tih Christmas card chu a ni. Mahse he card hi card dang ang ngawt anilo, hlui in zawr chul viau tawh mahse he khawvela a hmangaih ber thin in a a pek a nitlat. A aia hlu a awm chuang lo. A chhunga thu inziak te chu a ngai te te in ala thlum reng a, chutianga thu thlum tha chu hmuchhuak tur chuan a hmangaihber-i chuan Christmas card sang chuang fe a zawn kual a ngai ngeiin a ring a, chung te avang pawh chuan chu card chu a hlu zual em em a ni.

Chu Christmas card hlui tawh tak avang chuan Christmas card a hmuh apiangin tudang ngai lova an pahnih chauh a hlim taka Christmas an hmandun lai hun te kha hrechhuakin a lung hlui a leng vawng vawng thin a, chu Old Christmas Card avang chuan a chhingmit tui chu a far leh thin a ni.

Mahse, hun leh ni te a liam a, engkim a lo dang zo ta. Tunah zawng a duhtak hmel chu hmuh tur a awm ta lo. A sulhnu a hmuhtheih chin chu chu Christmas card hlui tawh tak mai a-a thu thlum nalh em em mai chauh chu a lo ni ta a ni. Hlim lai ni leh lungruala len lai ni te hi hun hian tuilian angin a lo herliam pui si thin, mahse hmangaih leh duh tak te hi zawng kumsul khuarei pawh chang se nghilh ni an awm thei si lo, hei ngei hi a ni he Old Christmas Card pawh hian a lo hnutchhiah chu...

"An Old Christmas Card"

(It's a memory of an old Christmas card)

There's an old Christmas card in an old dusty trunk

And it brings back sweet mem'ries dear to me

'Tho it's faded and worn, it's as precious as the morn

When I found it 'neath our first Christmas tree.

I thrill with every word, every line

Guess I'm always sentimental 'round this time

Pardon me if a tear falls among my Christmas cheer

It's the mem'ry of an old Christmas card.

You know, I don't know why

I get to feeling sentimental

About this time, every year.

But every time I see a Christmas card,

I somehow can't help reminiscing.

About the very first Christmas

that you and I spent together.

What a beautiful Christmas card

you gave me that year.

Why, I know you must have looked

through thousands of cards to find

that wonderful poem

that still brings a tear to my eyes.

I thrill with every word, every line

Guess I'm always sentimental 'round this time

Pardon me if a tear falls among my Christmas cheer

It's the mem'ry of an old Christmas card.

BigDaddy Hmahmatea II

Vantirhkoh Thilpek

Krismas Pual

December ni 23, 1993 a ni a. Pasal tel loa mahni chauha fate enkawl chu thil awlai a ni hauh lo. College kal a ngai bawk si, ka fate chawmna ngaihtuah a ngai bawk si, ka indaihlo thei khawp mai.

Krismas chu a lo thleng a ni tawh mai a, nghahhlelhna reng reng ka nei lo. Ka huphurh em avangin rawn thleng lo tawp mahse pawi ka ti lo reng reng.

Kan in te tak te mai chu ka thlir kual a, ka thinlungah thil pakhat chu chiang takin a rawn lang thar leh nghal zawk a. Kan rethei chiang khawp mai. Kan inah chuan mut pindan pahnih awm ve mahse a te dun em em a. Pakhat zawkah phei chuan ka fa naupang ber, nausen mutna a leng vel chiah a tih theih a. Pakhat zawkah chuan ka fapa khum leh a dressing table a leng chiah bawk a, pindan pakhata mudun thei an ni lo hrim hrim. Kei chu sitting room chhuatah zantin ka mu mai thin.

Ka fate pahnih nen thawmhnaw dahna pawh kan intawm vek mai a. In chhunga kan awm chuan kan inhlat thei tak tak lo. Kan in chu a zim em a ni. Ka fate pindanah chuan kawngkhar pawh a awm chuang lo a, engtiklai pawhin ka hmu thei reng a. Hei vang hian an thla a muang thei hle a, malsawmna chikhat chu a ni ve hrim hrim.

A tuk tukleh chu Krismas a ni tawh a, zan dar 8 vel bawr a ni tawh a, khua lah chu a vawt em em mai a. Ka fate chu an muhil ve ve tawh a, kei pawh rizai sin hlun chungin tukverh bulah chuan ka thu a. Pawnlam chu ka thlir veng veng a, chutih lai chuan kawngka chu an rawn kik a. Mak ka ti khawp mai a, chutiang huna kan ina rawn kal tur awm ang hriat ka nei si lo a. Kawngka chu ka va hawng a, ka hmelhriat loh hlir mai hi pawnah chuan an lo ding a.

Min hmuh chiah chuan an lo nui sang hlawm a, bawm fun mawi hi an lo keng far mai a. Ka hrilhhai khawp mai a. An hmel ka en a, an nui sang hlawm si a, keipawh chuan bangbo deuh chung chuan ka nuih let ve ta ngawt mai a.

Pa pakhat chu a rawn penchhuak a, “Mawii i ni em?” tih pahin a bawm fun mawi ken lai chu min rawn pe nghal a. Kei lah chu ka hrilhhai em avangin tawng nachang pawh ka hre lo a, ka lu ka bu ringawt a. Ka rilru a kim lo emaw an tih hial ka ring. Ka aw chu ka chhuah thei ngang lo a ni.

Nu pakhat chuan bawm dang min pek pahin, “Hei pawh i ta tur a nih hi,” a rawn ti ve leh a, a nui sang reng bawk a. A sam dum hlap mai kara a hmel rawn lang chu vantirhkoh ang maiin ka hmu a ni.

Ka inngaihtuah harh a, ka aw pawh chu a chhuak ve thei ta a. In chhunga lut turin ka sawm a, min rawn zui lut ta hlawm a. Pa ber chuan min zui hmasa ber a, an nu leh an fate pahnih nen chuan in chhungah chuan an rawn lut vek a. Naupang pahnihte chuan an bawm ken chu rit an tih deuh avangin an pai deuh khat khat a.

An chhungkua chuan an hming te min hrilh a, an bawm rawn ken zawng zawng chu kan chhungkaw tan a nih thu an sawi a. Hemi te chhungkua hi ka hriat ngai an ni hauh lo a, inhre ngai lo mah ila kan mamawh tur chu an hre khawp mai a. Kan nufa ho inhmingkim turin thilpek chu an rawn keng thlap a, chu mai ni loin ei tur tuihnai tak tak an rawn keng tel bawk a. Ka pawisaa ka lei theih miah loh tur thil hlir mai an ni. Ka rilruah chuan Krismas pangngai tak kan hmang ve thei ngei dawn a ni tih ngaihtuahna a rawn lut nghal a. A ruka ka lo suangtuah ang chu Pathianin a hria a, vantirhkoh a rawn tir ta ni ngeiin ka ngai nghet tlat a.

A hmaa Krismas ka huphurh chhan zawng zawng kha chinfelin a awm ta vek mai a, ka lawm dan chu sawi thiam chi pawh a ni lo.

Vantirhkoh chhungkua chuan an la duhtawk lo cheu mai! Lehkha var hi min pe a, an vai mai chuan an nui sang reng a, pakhat te tein min chibai diat diat a. Kan inchibai zawh chuan ‘Merry Christmas’ tiin min thlah a, zan thimah chuan an chhuak leh ta a.

Thil awm dan chu ka ngaihtuah a, mak ka ti em em a, ka rilru a khawih bawk si a. Ka bul vel chu ka en kual a, bawm chei mawi chi hrang hrang leh thilpek dangte chu a let phung hlawm a.

Ka insum zo ta ngang lo a, ka tap ta hawk hawk a. Lawmna hlirin ka khat a, awm dan pawh ka thiam lo, tap chung chuan ka hawi kual chhen ringawt mai a ni.

Ka thinlung chu thlamuannain a khat a, kan in chhung tereuhte ah pawh Pathian hmangaihna chu a rawn thleng phak a ni tih ka ngaihtuah a, ka hahdam sawng sawng mai a.

Chhuatah chuan ka thingthi a, thilpek chi hrang hrang let rum mai bulah chuan Pathian hnenah lawmthu sawiin ka tawngtai a. Ka tawngtai zawh chuan ka ding a, rizai chuan ka intuam leh a, tukverh bulah chuan ka phei leh a, pawnlam chu ka thlir chhunzawm leh a.

Nichina lehkha var min pek kha ka hrechhuak zawk a. Naupang thil thar nei ang maiin ka zuang tho zawk a, ka va la a, ka hawng ta sawk sawk a. A chhunga thil awm rawn tlachhuak ka hmuh chuan ka meng phar awn awn mai a. Chhuatah chuan pawisa hi a tla darh deuh sang mai a. Cheng nga, cheng sawm, cheng sawmhnih tih velte a ni hlawm a.

Pawisa chu ka chhar khawm a, ka chhiar ta nghauh nghauh a. Ka mittui chu a parawl kuang mai a, ka khawhmuh te chu a fiah lo riai mai a. Chuti chung chuan pawisa chu ka chhiar zel a. Ka chhiar zawh hnuah chuan a bul atangin ka chhiar tha leh a. A vai chuan cheng sangkhat ngawt mai a tling a, ka hnuk a ulh leh teuh mai a, tap tuau chung chuan a riin, “Cheng sangkhat,” ka ti ta ngawt a.

Ka fate muhil chu ka va en a, lawm avanga mittui luang zawih zawih chung chuan a vawikhatna atan ka nui ve ta sak a. Chutianga hlim vanga nuih chu ka nei khat ta khawp mai.

Naktuk mai hi Krismas urlawk ni a ni tawh tih ka ngaihtuah a, a hmaa rilru hrehawm deuha ka awmna chhan ber kha a ni a. Tunah chuan hun reilote chhungin thil a inthlak danglam ta vek mai.

Ka hmelhriat miah lohte avangin ka rilru na leh hrehawm kha a reh vek a, hlimnain a luah khat tlat tawh a. He ni ropui tak hi engtikah mah ka theihnghilh leh thei tawh dawn lo a ni.

Vantirhkohin min rawn tlawh atang khan kum tam tak a liam ve leh ta a, pasal ka nei ve leh tawh a. Kan chhungkua pawh kan awm thei ve pangngai tawh a, kan hlim thei hle bawk a. 1993 hnulama Krismas a rawn thlen apiangin keini aia khawsak harsa zawk hi kan zawngchhuak ta ziah a. Thilpek chi hrang hrang leh ei tur bakah pawisa tlem azawng chu kan pe ve ta ziah a.

Kan chunga thil thleng kha midang chungah thleng ve zel se kan duh tlat a. Pathian hnen atanga malsawmna kan dawn chu midangte kan sem then ve ngei tur a ni tih chu kan rilruah a nghet tlat tawh a. Chutianga thil kan pek chu mi thenkhat te pawhin an chhawm chhoh ve zel kan beisei tlat bawk a ni.

Christmas Thilpek

Krismas Pual

Khaw pakhatah hian nupa fel tak mai, Esther-i leh Mike-a te hi an awm a. Kum tin mai hian Christmas a lo thlen dawn apiang hian Esther-i chuan a thiam ang tawk hian in te chu a han chei a, Christmas Tree te chu inchhungah mai ni lovin an in pawn ah te pawh chuan a dah thin a. Light chi hrang hrang leh thil cheimawina nalh tak tak te chuan an in leh a chheh vel te chu a chei nasa thin hle a ni.

Hetih lai hian Esther-i pasal Mike-a erawh hi chuan Christmas inpuahchahna boruak vel hi a ning thei em em a, Christmas lo thleng tur chu a ning ni lovin mi zawng zawng mai in a an in leh a chhevel an chei te, chhung leh khatte leh thian tha te pek tur a thilpek chu hrang hrang an lei te leh Esther-i ngei pawh in kumtin a a pate awrh tur atana Necktie a leisak ziah te, an pi ber pek tur atana hmai hnawih chi hrang hrang a lei thin te chuan a thaw a ti ipik hle thin a. A chhan chu chutiang thil chi hrang hrang lei nan a an sum leh pai hman zozai te chu a lo chhutpui a, Christmas an hmuah dan chu a rilru chuan tha a tilo hle a, mahse engmah sawi em em lo chuan a nupui leh fanau te pawh chu Bazarah te chuan thil leiin a chhuahpui kumtin ve ziah tho a.

Tum khat chu Christmas hnaih tawh tak maiah hian an fapa Kelvin-a, kum 12 mi hi Wrestling Tournament an siamah chuan a tel ve a. Esther-i leh Mike-a te chuan an fapa inbuan en tur chuan mipui zingah chuan a thu ve a. Junior Level ah chuan an fapa chu chhuakin a khelh hun alo thlen chuan Kelvin-a chu a rawn chhuak hmasa a, chumi hnu ah chuan a tumpui tur mihang (Black) naupang hi a rawn chhuak a. Chu mihang naupang chu a tawiawm tute pawh mihang vek an ni a, veng kir khawr (slum area) pakhat atanga rawn tel ve a ni a. Kelvin-a chu wrestler inthuam dan famkimin wrestling pheikhawk te, lukhum (head gear) te chu a bun in a khum thlap a. Mahse, a tumpui tur pa erawh chuan pheikhawk chhe tak mai, a suihna hrui pawh awm mumal lo hi a bun a, chutah lukhum (head gear) khum tur pawh a nei lova. An lukhum (head gear) chuan wrestler te lu leh beng vel inhliamna lakah a veng tih chu Esther-i te nupa chuan an hre ve reng mai sia. An han inbawh a, an han in paih vel te chuan Esther-i te nupa chuan an rilru tak chuan nuamlo an ti hle mai a. A chhan chu an fapa chu a tha thei ang berin a inthuam a, a tumpui mihang naupang erawh chu lukhum pawh khum lovin a khel a, a inhliam palh an hlau em em mai a ni.

Kelvin te an intum mek lai chuan Mike-a chuan indawm vung vung chung hian, "A pahnih khuan chak thei se ka ti ngawt mai! An theihtawp an chhuah dun sia, khutia a chaklo zawk an awm chuan an rilru te a hnual anga, an tuina tak infiamna hi an khel chhunzawm duh lovang tih mawlh hi ka hlau," tiin a sawi a. Esther-i chuan Mike-a thilsawi chu a hrethiam mai a, a chhan chu Mike-a hi naupang ngaina em em mai mi a ni a. A bik takin infiamna lam a ngaina in a phak ang tawkin naupang tanpui ngai a hmuh chuan infiamna lamah a theih ang tawkin a tanpui thin a ni.

Esther-i chuan a pasal Mike-a rilru put hmang te chu a han ngaihtuah a, an hma lawk a Christmas lo thleng tur chu tum dang anglo takin a tihdan a thlak ta thut mai a. A pate te, an pi ber leh an fate tan chuan engmah a leisak ta lova. Sport thil an zawrhna dawrah chuan kalin wrestling an khelh a an hak thin kawr te, an pheikhawk bum ang thin te leh an lukhum (head gear) khum thin ang te chu a lei teuh a, an fapa Kelvin-a tumpui pa te vengah chuan a pasal Mike-a hriat loh chuan ava sem ta vek a.

A thil tih chu Esther-i chuan lehkha ah a ziak a, envelop ah a khung a, chu envelop chu an inchhunga Christmas Tree an dahah chuan a dah a. A tukah chuan Esther-i lehkha dah chu Mike-a chuan a han hmu a, a lawm em em a, ri chhuah meuh in a nui a. Chu thil chuan Esther-i pawh chu a tihlimin a tilawm em em a, a pasal Mike-a pawh chuan kum dang Christmas ang lo takin phur tak leh tha tho takin chu Christmas an hma a thleng tur chu a hmuah phah ta a.

Chumi kum atang chuan kumtin chuan Christmas lo thlen dawn apiang chuan anmahni thil tur te lei lovin midang tanpui zawngin Esther-i te nupa chuan an rilru an pe ta a. An thiltih chu ziakin envelop ah chuan an khung a, an inchhunga Christmas Tree ah chuan an dah zel a, a tukah a dah tu lo zawkin a chhiar zel thin a.

Chutia envelop an tih thin chu an fate pawh chuan a awmzia te an han hre chhova, Christmas atana an thil thar neih thin te chu kum tin a reh tial tial a, midang a mamawh zawk te tan an thawmhnaw ai te, an toys leina ai te chuan thildang an lei a, anmahni tawkin a mamawh nia an hriat te hnenah chuan thilpek chu an pe ve thin a. An nu leh pa te tih ang bawk chuan an thiltih chu lehkha ah ziakin envelop ah an khung a, an Christmas Tree ah chuan an dah ve thin a. Chu an tih chuan an nu leh pa, Esther-i leh Mike-a te chu a tilawm em em a, Pathian hnen an fate chu hlanin an chhungkaw pum chuan Pathian rawngbawl turin leh an phak ang tawk mi te tanpui zel tuin Pathian hnenah an inhlan thin a ni.

Mike-a te nupa hian an thil tih thin te chu an tu lo awm leh zel te hnenah pawh an zirtir zel a, an thlah lo awm zel te chuan Christmas alo thlen dawn apiangin mi harsa te tanpui nan an sum leh pai leh an thil neih te chu an hmang ta ziah a ni.

Isua Krista, Pathian fapa kha Khawvela damdawiin tha leh changkang berah pawh a piang thei reng, puan tha ber ber leh mutna tha ber ah pawh a mu in a sin thei. Mahse, engvanga ran chaw pekna thleng ah kher rawn piang nge anih? Kan Lal Isua Krista alo pian khan Pathian chuan khawvel a Lal ropui tak tak te pawh Isua chu chibai a buktir thei reng. Mahse, engatinge berampu te leh ran te khan chibai an buk? Engatinge Lalber thar lo piang kha hmun tlawm takah piangin mi tlawm ber ber ten chibai an buk? "Heng mi te ber chunga in tih hi ka chunga ti in ni e," tiin kan Bible thianghlim ah Isua chuan min hrilh kha. He Christmas lo thleng turah hian mi tam tak chu nasa takin a tha ber ber te leiin kan inbuatsaih maithei, mahse tlawm taka nungin kan thil leina ai, kan phal ang tawk tawk te mi harsa leh tanpui ngai te tan kan pe phal dawn lawm mi? I thilpek ho te a i ngaih kha chhungkaw thenkhat tan chuan lawm a tah na tham a tling thei. Chuvangin kan hma a Lal piang chibai buk tur a mi tinreng kan in buatsaihna karah hian midang Pakhat tal tan malsawmna nih i tum theuh ang u..

Krismas Thilpek Ropui Ber

“Kan tan naupang a lo piang a, fapa pekin kan awm ta a"
(Isaia 9:6)

Kan thupui sawi tur hi Krismas thilpek ropui ber, “Fapa pekin kan awm ta,” tih a ni a. He tawngkam hi zawlnei Isaia tawngkam, Lal Isua pian tur hrilhlawknaa ngaih a ni a. A lo to chhuahna rilzia leh makzia hi mihring tawnga sawi fiah zawh rual a ni lo va, sawi loh theih lah a ni hek lo. Hetiang hian i lo thlir ho ang u :

1. Chhinchhiahna pasariha chhinchhiah:
Eden bawhchhiatna avangin Pathian leh mihring chu kan inthen tawh a. Eden huana kan luh theih tawh lohna turin nunna thing chu mei khandaih vir tawn zawk zawka ven a ni a. Thupuan bung 5-8 thute hi Lal Isua pian atanga a thih inkar huapa sawi theih ni mah se, a pianna lamah bel ta ila : Lehkhabu pakhat, a chhung lam leh pawn lama ziak, chhinchhiahna pasariha chhinchhiah tlat chu lalthutphaha thu chuan a kut ding lamin an keng a. “Tu nge lehkhabu hi hawnga a chhinchhiahnate phelh tlak awm?” tiin vantirhkoh chu aw ring takin a au lauh lauh mai a. Vanah te, leiah te, lei hnuaiahte chuan lehkhabu chu hawnga a chhinchhiahnate phelh tlak tumah an hmu zo lo va. Hei hi eng nge a awmzia ni ang? Mihringte sualna avangin Pathian nena kan inkarah indaidanna bang pui a awm a, chumi tikiang thei chu tumah an awm lo tihna a ni âwm e. A hmutu Johana chu a tap ta zawih zawih a.

2. Thu lawmawm a lo thleng ta :
Suala tlu tawh mihringte chhandam turin vanah an zawng a, an hmu zo lo va, leiah leh lei hnuai thlengin an luh chilh tawh a, an hmu zo lo. Nakinah chuan ennawm mak tak mai a lo lang ta! Upa zinga pakhat chuan Johana hnenah, “Tap suh, ngai teh, Sakeibaknei, Juda hnama mi, Davida Bulpui khan lehkhabu chu hawng tur leh a chhinchhiahna phelh turin a hneh ta,” a rawn ti a. Van ropuina hlipin Lal Isua chuan lei hmun tlawm ber a rawn luhchilh a, kraws-ah hma a rawn chhuah a.

3. Ennawm mak thar a lo lang :
Beram No inpekna chu zahna hlanin Thilnung palite leh Upa 24-te chuan an lallukhum phawkin a hmaah an bawkkhup a, “Nang lehkhabu chu la a, a chhinchhiahnate phelh tlak i ni e...” tiin ruah tham loh hla thar an sa a. Johana chuan ennawm mak thar lo lang zel tur chu a thlir reng a. Vantirhkoh a singa sing tam takte chuan aw ring takin, “Beram No talh tawha hi Thiltihtheihna te, hausakna te, finna te, chakna te, ropuina te, chawimawina te, malsawmna te hmu tlak a ni e,” tiin hla mawi ropui an rawn rem a. Chumi zawhah chuan van leh lei chung leh hnuai leh tuifinriata thil siam tinrengte chuan, “Lalthutphaha thu leh Beram No hnenah chuan malsawmna te, chawimawina te, ropuina te, rorelna te, chatuanin awm rawh se,” tiin an au rual a. Thilnung palite chuan, “Amen Amen,” tiin an lo chhawn a, Upate pawh chuan bawkkhupin chibai an buk a.

Hlaphuahtuin “Ennawm mak thar a lang zel ang a thuk si,” a tih ang khan Johana chuan Beram Novin chhinchhiahna pakhat phelh atanga pasarih phelh lai chu a thlir reng a. Lal Isuan chhinchhiahna pasarihna a han phelh lai phei chuan van miten mak an ti lutuk a, ri reng reng awm lovin dar chanve lai chu van a reh thup mai a. Van miten Krismas an hman dan hi kan thlir chuan – lawmna leh mak tihna a inkawp a, lei mite duhsakna leh uina a inkawp a, aw ring taka hla sak leh ngawih thup a inbelhbawm bawk a ni. An tihtakna hmel hi Krismas hmel leh awmzia tar lanna a ni.

4. Zawlneite hnenah puan a ni :
Pa Pathianin a Fapa lei mite a pek tur thu hi chawpchilha lo thleng thut a ni lo va, zawlneite hnenah khan vawi za chuang a lo hrilh tawh a. Zawlneite kaa Lal Isua chungchang hrilhlawkna thute hi vawi zahnih chuang a lang a ni. Zawlnei Mika chuan Isua pian hma kum 750 velah khan Bethlehema Isua a pian tur thu te, vuak leh chilchhak a tuar tur thute a lo sawi lawk tawh a (Mika 5:1,2). Zawlnei Zakaria chuan Isua chu sabengtung chunga a chuan tur thu te, tangka 30-a an hralh tur thu te, a man chu belvawtu ta tur a nihzia te, a zirtirten an phatsan tur thu te, a nâka feia an chhun tur thute a lo sawi lawk a (Zak. 9:9; 11: 7,12,13; 12:10). Zawlnei Hosea chuan Aigupta rama a tlan bo tur thu a lo sawi lawk bawk a (Hos. 11:1). Zawlnei Isaia chuan Isua chu nula thianghlimin a pai tur thu te, a hming tur te, amah hektute hmaa a ngawih reng tur thu te, misualte nena tuar tlang tur a nih thu te, a tiduhdahtute tana a tawngtai tur thu te, mi hausa thlana an zalh tur thute a lo hrilhlawk a (Isa. 7:14, 53:7,9,12). Bethlehema a pian tur chungchangah hian Isua chauh lo pawh Bethlehema piang tur chu an tam ang tiin khawvel mite chuan mi dang chungah bel an tum thin. Chutiang chu tam mah se, pian hlima Aigupta rama tlan bopui leh tangka 30-a hralh a ni ve em, tih chu zawhna pawimawh a ni ang. Chutiang chu Bethlehema mihring piang tawh zingah pakhat sawi tur awm sela, a nih leh a hralhna manin belvawtu hmun an lei ve em? Vuak, chilchhak leh feia chhun a ni ve em? Mi hausa thlanah an phum ve em? Hengte hi mi dang chunga thleng ve zel thei a niin a lang lo. Thuthlung Thar kan chhiar chuan, “Zawlneite hrilhlawk kha a lo thlen theih nan,” tih kan hmu fo mai.

Zawlneiten an hrilh lawk lai hian a hun laia mite chuan dawt muhlumah pawh ngai sela an thiamawm tho mai. Nimahsela a hun laia mite an thih zawh vek hnuah, an thlanah pawh arsi ek a kai that tawh hnuah, a hun takah an hrilhlawkna thu hi a lo thleng dik ta si a. Hrilhlawkna kum zahnih chuang daih, a kim biaia Lal Isua chunga lo thleng hi a mak a, Pathian thu hi a rintlakzia a tilang a, khawvel mite hriat ve loh, kan Pa ram thil a ni. “Pathian thil rel dan hi a va mak em ! hriat phak rual loh a ni.

5. Leiah a lo piang van Lalbera chu :
Lei miten Krismas rim kan hriat hma daih khan van mipuite chuan Krismas hi urhsun takin, mak takin, bawkkhup chungin an lo hmang tawh a. Aw ring takin Beram No zahna hla thar an rem a, a chang leh Beram No inpekna chu mak tiin dar chanve lai an reh thuap bawk a. Chu thu lawmawm chu zawlneite hnenah hriattir an ni a, Isua pian hma kum 700 zet kal taah khan Isaia chuan, “Kan tan naupang a lo piang a, fapa pekin kan awm ta a,” tiin a lo sawi lawk a.

A hun bi a lo kim ta. Chumi zan reh takah chuan, thlasik vur daifim hnuaiah Lal Isua chu ranthlenga a rawn mut zan khan, vana miho mipuite chu Bethlehem daiah an lo pung khawm a, “Chungnung berah Pathian ropui takin awm rawh se, lei chunga a lawm em em mihringte hnenah rem thu leng rawh se,” tiin lei mite hnenah duhsakna sang ber (Shalom) an rawn hlan a.

6. Fapa pekin kan awm ta :

Chutichuan, “Fapa pekin kan awm ta,” tih hi a sawi awl hle mah se, a lo to chhuahna erawh chu a ril hle. Pa Pathian hmangaihna chuan kan inkara indaidanna bang a rawn su chim a, chhinchhiahna pasarihte a rawn nuai bo va, Sinai tlang Dan thuthlung chu khawngaihna thuthlungin a rawn thlakthleng a, Dan chuan Lal Isua chu kawng lai kianin kawng sir a chuh rawk rawk a. Hmun tlawm ber Bethlehem ranthleng chu a rawn chawimawi a, puithiamte leh lal leh zawlneite Office chu a rawn luahlan a, mi sualten pheichham an man a, mi retheiten thang an chhuah a, tlang tenawm ber Kalvari tlang chu tlang ngainatawm berah a rawn letling a. Lal Isua hmaah chuan mi bawlhhlawh sil fai an ni a, thianghlima inngaiten an bawlhhlawhzia an hre thung thin.

He thilpek ropui ber hi a dawn dan dikin kan dawng em? Mi retheiten an dawn chuan hausakna a ni a, natna tuarten an dawn fuh chuan damna a ni a, chapoten an dawn chuan tlawmna puan an sin a, mi duhamten an dawn fuh chuan thilphal an zir thin. Kumin chhunga lusun chhungkuate pawhin he hun hi hnung lam ngaihna hun atan i hmang ral lo vang u. He thilpek ropui hi la ila, thihna en lovin nunna kan en ang a, thlan lam hawi khan thawhlehna lam a hawi ang a, hnuai lam entuin chung lam a thlir ang a, hun kal ta thlira lunglengten hmangaihna thar zel tur lam an thlir ang a, chutah chuan kan duh tak kal tate chu van ropuina hain an hmel kan hmu thei ang.

Krismas dawnin thilpek (present) kan inthawn thin a; thian nei tam deuhte phei chuan Krismas Card an tar tlar dul thin a. Hengte hi sawi nepna ni lovin, mi dangte hnen atanga thilpek dawng teuhtute hian Krismas thilpek ropui ber, ‘Fapa pekin kan awm ta’ tih hi kan dawng lo palh hlauh vang e. He thilpek dawngte chuan, “Van Lalreng, ro- pialral lunghlu ka chhar ta,” tiin ro hlu ber chhar hmel an pu a. Chu thilpek chu an bangah tar mawi lovin, an nunah an tar mawi thin. Fapa pekin kan awm ta, Amen.

Rev Vanlalzuata