'Would you know my name,
If I saw you in heaven.
Will it be the same,
If I saw you in heaven'
Kum 1991 March thla vang lai boruak pawh a nawm lai tak a ni a. Italian actress Lori Del Santo leh a fapa naupang te Conor-a chu Italy atangin New York tlawhin an zina .New York a Appartment pakhatah chuan an khawsa dun a. Conor-a hi Lori Del Santo leh zaithiam Eric Clapton-a te fa a ni a. Hetia New York an tlawh lai hian Eric Clapton-a leh a nupui hmeltha tak mai The Beatles ami George Harrison-a nupui hlui 'Wonderful Tonight' a phuah chhan ngei mai Pattie Boyd-i nen chuan New York a an awm ve lai tak niin Conor-a te nufa awmna appartment bul lawk Hotel room pakhatah chuan an awm ve nghe nghe a.
New York a insak dan 'building law' chuan in chhawng reng reng in tukverhah tlak dal a nei tur a ni tih thupek a chhuah a mahse an zawm tha vak lo aniang Conor-a te awmna appartment tukverh pawh hian tlakdal a nei hauh lo mai. March ni 20 chuan Conor-a te awmna appartment chu a enkawltu nu chuan tukverh vel chu tifaiin inhawng sa in a dah a. Conor-a, naupang harh rual inhlei ve tak mai chu rawn tlan pheiin tukverh bulah chuan a in pal a tukverhah chuan a tla ta a. An awmna appartment hi a building chhawng 53 na a ni a. In chhawng 53 na atang chuan a bula in pakhat chung zawlah chuan a tla ta a. Ka pawh chhawn lovin a chatthla ta nghal a ni.
Eric Clapton'an a fapa thih thu a hria chu a tuar na hle a. Clapton-a leh Conor-a nu Lori hi an innei hauh lova mahse chanchin engkim inhrilh in Clapton-a pawh hian a fapa hi a ngaina em em a. Hemi hma lawk thla 7 vel liam ta ah khan a manager leh a zaina vel a pui tu a 'road crew' ami pahnih leh a zaipui thin leh a thianpa Stevie Ray Vaughan chu helicopter chesualah thi in a lo chan tawh bawk a, a tuar em em a, chutah a fapa ngainat em em mai Conor-a an chan leh a. Clapton-a tuar na lutuk chuan zai a chawlhsan ta hmiah mai a. Hetih chhung hian inah a inkhung chawt a, mahse lehlamah amahah nghawng tha tak a neih phah ve tlat a. A ruihtheih thil tih a thlah phah ta hmiah a. Thla 9 teh meuh zai chu a chawlh san a tichuan thla 9 zet a fapa thi a sun hnu chuan a thianpa Will Jennings-a nen drug addiction chungchang film 'Rush' tih ami tur chu hla an phuah dun ta a.
He film ami tur hla 'Help me up' tih an han phuah zo chu Clapton-a chuan, "Ka fapa tan hla phuah ka duh," a rawn ti chhuak phawng mai a.Tichuan lehkhapuanah chuan Tears In Heaven hla tlar hmasa ber, 'Would you know my name, if I saw you in heaven,' tih chu a ziak ta a. a en vang vang a, 'Time can bring you down, time can bend your knees,' tih chu an ziak leh a, tichuan Will Jennings-a hnenah chuan "phuah zawm rawh" a ti a, a pe ta mauh mai. Jennings-a chuan a 'personal' em mai tiin a lo hnar ngial a mahse Clapton-a chuan a ngen luih ngial avangin Jennings-a chuan a phuah zawm ta a. Tichuan Eric Clapton-a hla Billboard Hot 100 a No 2 te pawh lo ni pha, ram hrang hranga top charts a lang pha, Grammy Awards nomination pawh 9 zet lo dawng, khawvel music awm chhung a miten an theihnghilh tawh loh tur, a fapa a ngainat em em Conor-a a phuahna Tears In Heaven chu a lo piang ta. Mahse he hlaah hian amah chuan 'Woud you know my name, if I saw you in heaven' tih lai leh 'Time can bring you down, time can bend your knees' tih lai chiah hi a phuah zuk awm tlat a. A dang zawng hi chu Will Jennings-a kutchhuak vek a ni. Mahse Clapton-a lung a dum ngang aniang a sawisel lo reng reng.
Tichuan a album Eric Clapton Unplugged ah chuan a dah ta a ni. Hetia thla 9 zet a fapa a ngainat em em sun a zai a chawlhsan vang vang hnu a a rawn zai leh chu a zai dan phung te, a guitar perhdan phung te chu a dang ta vek mai a, a aw pawh a hma aiin a ril raih mai a, a guitar perh pawh a muang fan ta raih mai a ni. A fapa thi hian kawng engkimah amahah nghawng a nei a, a nun phung, a ruihtheih thil tih leh a music kalphung zawng zawng a sawi danglam mai bakah, Clapton-a hian New York a 'buildings rules' chu khauh zawka kenkawh anih a inchhawng sang ten naupangtlak dalna tha tak an neih theih nan a campaign nasa a. Tichuan New York a building zawng zawng te chu naupang tlakdal tha tak an neih theih nan siamthat vek a lo ni ta a ni.
Mak deuh mai chu heti khawpa a lar pui a ma fapa ngei puahna hlaah hian tlar 4 teh tlawng chauh ama kutchhuak a awm hi a mak a, chutih laiin heti khawp a Jenningsa'n Clapton-a rilru, emotional feelings mila a phuah thei hi a mak ka ti bawk.
BigDaddy Hmahmatea
Thu Ngaihnawm Huang
