Ukil Te Zawhna Mak!

Ukilte hi fing kan ti a. Thiam chan tuma thuhretute zawhna an han zawh kual vel chang hi chuan an mawl hmel thei ngawt mai. A hnuaia mi hi Ukilin thuhretute zawhna atthlak an zawh hrang hrangte a ni.

* Alzheimer natna hian eng ang chiahin nge i hriatrengna a khawih?
-Thli ka theihnghilh thin a.
- I thil theihnghilhte chu han sawi teh!

* I fapa naupang ber, kum sawmhnih mi i tih chu engtia upa nge?

* Mr Smith. Europe-ah chuan Honeymoon chawlh hmangin in zin niin ka lo hria a.
- Aw ni e.
- I Nupui i hruai em?

* Ka Pi, fa pathum i nei a ni maw kha?
- Aw ni e.
- Mipa engzat nge?
- Engzat mah.
- Hmeichhia vek em ni?

* I Nupui hmasa nena in inthen chhan chu eng nge ni?
- Thihna vang a nia.
- A tu zawk?

* Tualthattu i hmuh dan chu han sawi teh.
- Tarmit vuah, Hmuihmul dum...
- Mipa nge Hmeichhia?

* Zan dar 10-ah Khumah i Bialpa nena in awm dun atangin i lo rai ta niah i inngai a maw?
- Aw, ni e.
- Chutih lai chuan eng nge i tih?

* He Thlalak hi nangma Thlalak ngei a ni em?
- Aw, ni e.
- He thla an laksak lai che hian i awm em?

* Pakistan indona-a thi kha i Unaupa nge nangmah?

* Motor pahnih an insut lai chuan engtiang chiaha inhlatin nge an awm?

* I Nupui chu i duh taka i neih a ni em?
- Aw, ni e.
- A eng lai tak nge i duh?

* Step atang chuan in hnuaiah a chhuk theih tiraw?
- Aw theih e.
- A chhoh theih bawk em?

* Doctor, Postmortem-a i zai thinte hi Mitthi vek an ni em?

Tunge Fing Zawk?

Japan rama Sahbawn an siamna khawl chu rei tak Research hmanga uluk taka an duan chhuah a ni a. Mihring vil ngai mang lovin chhun zan zawmin hna a thawk thei a. A tawntirhah Raw Materials an chhung lut a, chawhpawlhna leh chhuanna Chamber-ah a lut khawm phawt a, a tawp lamah chuan Sahbawn tlang nalh tak mai hi a rawn tawlh chhuak zur zur mai a. Sahbawn tlang lo chhuak chu Mihring tha tel miah lovin, a tuamna Lehkhakhawng bawm chuan a lo fun nghal zar zar a, Sahbawn 10 zelin Bur khatah a inthawlh lut leh a, Barcode-a chhinchhiah a nih zawhah chutiang bur inrem fel sa chu a aia bur lian zawkah a inthun chhawng leh a. Robot ban lian pui hian bawm lian sawm rem khawm chu Saranga tuam pahin a thuai vir mawp mawp a, Truck lianpui chhungah a indawtin a nawr lut a, Truck chuan Japan rama Warehouse hrang hrangah a phur darh nghal thin a ni.

Mahse khawl chu khawl a ni miau a, Sahbawn bawma Sahbawn tak tak awm lo, Barcode-a chhinchhiah fel vek si chu, a tak awm angin a lo chhuak tel palh leh zauh thin a. Barcode Scanner chuan Sahbawn awm anga ngaiin a chhiar vek bawk si a. An Account a dik thei ta lo va. An dehchhuah zat nia khawlin a chhinchhiah leh, a taka an hralh chhuah zat chu a inmil thei ta reng reng lo mai a.

Engtia chinfel tur nge ni ang tiin, khawl siamtute chuan an ngaihtuah a. Tihsual palh chang awm thin chu chinfel theih ni lovah an ngai a. Scanner chu Barcode Reader ni satliah lovin, Sahbawn bawm chhunga Sahbawn a awm leh awm loh en tel thei, X-ray Scanner ni sela a fel maiin an ring a. USA atangin, a bika siam X-ray Scanner Dollar 60,000 (Rs Nuai 37.31) man an lei a, an hmang ta a. An buai ta lo.

Gujarat-a Nirma Soaps siamtute pawhin chutiang khawl ang chiah chu an hmang ve a, Sahbawn bawm ruak chu Sahbawn tak awm angin an chhiar sual ve fo ta mai a. Engtin nge an tih le?

Crompton Table Fan ₹ 1,800 man an lei a, Sahbawn bawm lo chhuahna zawnah chuan an chhemtir ta vak mai a. Sahbawn bawm ruak a lo tel palh a nih chuan Fan thli thaw chuan a chhem per nawl nawl mai a..! Fan-in a chhem per loh chin chauh chu Barcode Reader chuan a chhiar a, a tawpna chu a ngai reng a ni.

Tunge fing i tih zawk le?

Mizo Hnam Thenkhat Leh An Chi Pengte

Khawlhring:-
Midang
Leidir
Pialtel
Lungen
Tlaute
Milai
Parte
Rawlchhim

Khiangte:-
Tumchhung
Khupchhung
Khupthlang
Mualvum
Khello
Chhingbel
Khiangtechawngte

Chawngthu:-
* Khuntil:-
Khunsut
Khunthlang
Haukawi
Saithleng
Vanchiau:-
Maluang
Chhingruam
Thangchhung

Chawhte:-
Lianhna
Chhuanhawih
Hawnzawng
Chamte
Halte
Thaumau
Tamva
Chawngdang
Chawngfiang
Chawnthik

Ngente:-
Kawngte
Zuahtite
Duahthang
Duahchhak
Lailo
Chawnghawih
Chalngawng

Renthlei:-
Lianhlun
Zachhing
Thangthawl
Tinkulh
Chhingthlang
Sohnel
Thuandurh
Chhonghek

Tlau:-
Bualchhuak
Vantawl
Bawlchhim
Thlengngam

Pautu:-
Chhingate
Tluangate
Buangzal
Chhehlawn

Rawite:-
Zahte
Pialtu
Aite
Buite
Hmungte
Chhawrte
Chhehduah

Vangchhia:-
Theiduh
Zapte
Dochhil

Punte:-
Chhiarthlang
Chhiarchhak

Zawngte

Paite Chi Pengte

Vuite
Dapzar
Sukte
Thaute
Thaizang
Lamzang
Losau
Phunnawm
Phaileng
Dim
Darbung
Dimlo
Vangteh
Zung

Pawi Chi Pengte

Hauhulhho:-
Chhunthang
Sailun
Bawithang
Hauchhum
Thanhrang
Zahau
Khalthang
Hlawnmual
Lalvawng
Chhawnchhek
Huha

Fanai:-
Thaai
Pakhup
Torel
Hniarcheng
Zarep
Hrangtling
Airawn
Ruahngai

Lalpa Laka Kan Rochan Fanaute Chu!

* Hmangaih leh ngilnei takin enkawl la, mahse duat suh ang che. Mei sa tak kaltlang lo chuan kahpathir hi a chhuak thei ngai lo.

* Kherkhiapna laka fimkhur turin zirtir la, fel lutukna laka fimkhur turin zirtir bawk ang che.

* I kaih atan an ban an pek phal chhung che chu kai rawh, nakin lawkah chuan, chak hle mah la i kaih an duh tawh dawn si lo.

* Nangin minute 10 chhung leka i tih zawh theih, darkar khat dawn lai hmanga pindan an tifai lai ngawi renga lo thlir a, lo en peih khawpin hmangaih la, chu chuan 'Ka thiam lo' tih trawngkam lak atang hian a chhanchhuak dawn zuk nia.

* Mihring tha (energy) hi hmanral mai theih a nih loh avangin, mahni pawha khawsak an thiam theih nan an tha (energy) chu ren sak ngai suh ang che.

* Mi thil an ruk pawh, 'Hei, i thil kan ruk a ni,' tih sawi chunga pekkir tir leh ngam khawpin hmangaih ang che.

* Thinrim vangin beng ngai suh la, an sual vang erawh chuan vuak pawh vua ang che.

* Arpa aia arpui khuan rin zawkna chu in nuam a ni ngai lo tih zirtir la, Artui a duh chuan Ar dawkdawlak ri a ngaithei tur a ni tih pawh zirtir ang che.

* Vanrama lut tur chuan vanram chahbi kawl a ngai a, an nun hun chhung zawng hlim taka an hman theih nan chu chahbi chu kawltir ngei ang che

YMA Magazine

Lusei Chi Pengte

Pachuau:-
Lianthung
Liannghawr
Lalbawma thlah
Cherlal
Chhawnthliak
Chuaulak
Darcho
Varchuau

Chhangte:-
Darchhun
Pamte
Vawknghak
Kawl chi
Nghakchi
Lungte
Chawnglu
Lumthang
Tumpha

Chawngte:-
Tuichhung
Lungte
Pamte
Muchhipchhuak

Chuaungo:-
Vanpuia hrin
Chumthluk
Darkim
Zawngpam
Hmunpel
Thlehnghel
Laller
Auhmun

Chuauhang:-
Lathang
Chungpui
Chawnchhawn
Chawnchirh
Khuanglawi
Vaichuau

Chhakchhuak:-
* Hualngo:-
Chalthleng
Bochung
Khupno
Cherput
* Hualhang:-
Chalbuk
Baichi
Chumkhal
Taihlung
Chertluang
Khupno
Fangte
* Lunkhua:-
Sialchhung
Ngalsi
Ngalchhung
Phungchi

Hauhnar:-
Hauthul
Haubul
Tuithang
Senlai

Hrahsel:-
Selpui
Sawntluang
Sumkhum
Saza

Tochhawng:-
Topui
Chhakawm
Tobul
Chemhler
Muchhipchhuak

Vanchhawng:-
Vanlung
Sumkhum
Chemhler
Chengrel
Kaithum

Lal chi:-
Sailo
Palian
Zadeng
Thangluah
Rivung
Chenkual
Rokhum
Chawnglul

Thulakna:- Rintluanga Pachuau Lehkhabu ziah Geography Of Mizoram a mi Liangkhaia ziah a lakchhawn.

Tlangau Mike Vuan Suh!

I rin loh deuhin TV-ah i lang maithei. I tum lawk ni miah lovin i khawlai kal lai chu zawhna an rawn zawt thut thei che.

Chutiang i tang palh a nih chuan, tim suh, tlanchhiatsan suh, i hmai hup duh suh. I lang laklawh tawh a, i hmachhawn ngam loh hian i mualpho nasa zawk. 'Mipui' i ni a, zei tur leh tawngkam thiam tura beisei i ni lo. Nalh tum suh. Hmachhawn la, huai takin i ngaihdan Sentence khat lekin sawi mai rawh. Tichuan i mualpho lo zawk ang.

Thil pakhat hriat ngai a awm:
Electronic tlangaute (Radio leh TV) hian, Microphone lek chhuaka khawlai mipui zinga tu emaw zawhna an zawhin - danah chuan - an zawhna chhangtu chu an Mike an kentir tur a ni lo. I hmui zawna Mike an rawn lek hnaih lai hian Mike chu Lo vuan ve suh! Mike chu ken tum suh. Mike chu khawih lovin i sawi duh chu sawi mai rawh.

A chhan:
1. An mamawh bak i sawi palh thei a, tharum thawhna thlen thei thu dengkhawng te, tawngkam chhia leh zahmawh te pawh i sawi palh thei a, chutiang thu a rik ruala Mike la sawn vat thei turin zawhna zawttute chu 'Trained' an ni.

2. An Mike hnunah chuan, DDK, ZONET, LPS, NDTV, BBC...tih ang chi, a chhuahtute hming a intar maithei. Chutiang a intar chuan an fimkhur zual thin. Chutiang intarna Mike vuan chunga i mi mal ngaihdan i puanchhuah phei chuan, an mualphopui thei tih hriain an inveng a ni. Correspondent-in i hmui zawna DDK Mike a rawn lek hnaih laia vuan lova i ngaihdan i sawi chuan, i ngaihdan i sawi anga ngaih a ni. Chu DDK Mike vek chu vuana i thu sawi ngai i sawi chuan, DDK ngaihdan i sawi anga ngaih a ni ang. Hei hi tlangauho hian an hlau ru hle a ni.

3. A bikin, Edit theih loh Live Broadcast laiin an fimkhur zual. Boruak sosanna hmunah phei chuan News Correspondent-te hian Mike hrui hi an kutah an vet thin. Thlauh an hlauh vang ai mahin, mipui sahawkin chhuhsakin thawm dik lo auchhuahpui nan an hmang ang tih an hlauh vang a ni.

Chutianga News Correspondent-ten an kuta Mike hrui an vet chu zaithiam leh thusawitu thenkhatin an lo hmu a, tul hauh lovah, an zai pah leh thu sawi pahin an kutah Mike hrui chu an vet chiam thin! Zeina aiin mawlna entirna a ni thei mah mah awm e.

Lengzem

La Liga Record Khum Mai Theih Loh Tura Ngaihte

Tun tum chu La Liga lam thlur ve dawn teh ang. La Liga ah hian Real Madrid leh Barcelona an langsar hle tih tu'n kan hai lova, Record tam zawk pawh anni siam hi a ni deuh zela, anni lo pawh Record ropui tak tak lo siam tawh an awm ve nual tho bawk a nia.

Champion hnem ber Real Madrid:
Real Madrid hi khawvel Football Club te zinga hlawhtling ber tiin sawi ila kan sawi sual tam awm lo ve. Real hian League Title vawi 32 teh ngawt an la tawha, anmahni hnaih bertu Barca hian vawi 22 an la tawh thung.
Hei mai hi a ni lova, 1960's chho vela Alfredo di Stefano leh Ferenc Puskas te ho leh 1980's tawp lama Emilio Butragueno enkawlna hnuaia Real team te khan a zawnin League Title vawi nga an lo chawi tawh nghe nghe a ni.

Home a tlawm lo rei ber Real Madrid:
1956-1965 inkar kum kaw chhung zet khan Santiago Bernebeau ah Real hian tlawm an nei miah lo. Stefano, Gento leh Puskas te ho hi khatih hunlaia an Player chhuanvawr te an ni a, Real Madrid team khatih hunlai aia tha kha an la awm ngai lo ve tiin tam tak chuan an la sawi thin reng a ni. European Cup a zawnin kum nga chhung an la a, hemi chhung vek hian La Liga title vawi 7 an la bawk.

Hneh loh nei lova kaltluang rei ber Real Sociedad:
Alberto Ormaetxea hnuaiah 29 April 1979 leh 11 May 1980 inkar khan Sociedad hian hneh loh an lo tawng miah lo.

Season khata Away Goal khung tlem ber Deportivo:
Deportivo la Coruna hian 1964-65 season khan Away Goal hnih chiah khungin Season an khara, Relegate an nih chian hle bakah Away Match ah chak an tawng lo hrim hrim bawk. Sevilla leh Zaragoza laka 2-1 leh 4-1 a an tlawm tuma an khung ve a ni a, 1960's chho bawr vela Youth Academy nei tha berte zinga ngaih an nih rualin an chet that rei ngai loh em avangin Elevator Team ti te pawhin an ko fiam thin bawk a ni.

Goal khung zawn rei ber Lionel Messi:
2012 kha Lionel Messi kum a ni ringawt alawm mawle tih tur khawpin a che ropuia, Goal 91 lai khungin Record dang dang pawh a siam chho zut a nih kha. La Liga 2012-13 Season Matchday 11 leh Matchday 34 inkar khan khel vekin Goal a khung vek bawka, hemi chhung hian Goal 33 a khung a ni. La Liga Season khata Team 19 laka Goal khung thei vek Record a siamna hun a ni bawk.

Season khata Hattrick siam hnem ber Lionel Messi:
2011-12 Season khan niin 5’7’’ a sang Argentine Forward leh Captain ni bawk Lionel Messi hian Hattrick vawi riat ngawt a siam nia. Khami Season hma chiah pawh khan Hattrick vawi 7 a lo siam tawha, Champions League a Bayer Leverkusen laka Goal 5 a khung pawh 2011-12 Season a Messi chungchanga thil chhinchhiah tlak tak a ni bawk awm e.

Hattrick rang ber siamtu David Villa:
2005-06 Season tawp lama Athletic Bilbao leh Valencia an inhmachhawn tum khan 0-0 in 82' thleng an inhnehtawka, Valencia a lut tir chauh Villa chuan 81', 83' leh 85' ah goal thum a rawn khung ta maia, 4' 44s chhung leka Goal thum a rawn khung theih avangin La Liga History a Hattrick siam rang ber a nih phah ta a ni.

Inlan hnem ber Andoni Zubizarreta:
Kum 20 a nihin Athletic Bilbao tan a inlan tana, 1981-1998 inkara a Club khelhna ah First Choice a ni pha vek bawk. Chungte chu Athletic Bilbao (5 Years, 169 Caps); Barcelona (8 Years, 301 Caps); Valencia (4 Years, 152 Caps) te an ni. Hei mai ni lovin Liga a Clean Sheets nei hnem ber a ni bawka, Clean Sheets vawi 233 lai a nei hman a ni. Football khelh a chawlhsan hnu ah pawh Football a bansan tak tak thei chuang lova, Barcelona tan hna hrang hrang a thawk chho ve reng bawk a ni.

Match khata Red Card phawrh hnem berna:
14 December 2003 khan Barca laka Espanyol in si khata hma an hruai hnuah Barca hian rawn lehthal lehin 3-1 in an rawn hneh leh a khauh a, chu ai mahin he Match hian chhinchhiah a hlawhna tur chu Red Card 6 lai mai phawrh a ni hi a ni.
Espanyol Player De la Pena chuan 41' ah Red Card hmasa ber a rawn hmu a, Cocu chuan 65' ah rawn hmu ve lehin Double Yellow Card vangin Raphael Marquez, Ricardo Quaresma (Barcelona) leh Toni Soldevilla, Lopo (Espanyol) te chuan hnawhchhuah an tawk ve bawk.

Coach La Liga Match hmachhawn hnem ber Aragones:
Tun kum 10 kalta chhunga Football khawvel chiah hneh em em tu Spain Possession Football hmuchhuaktu ang hiala chhal ni thin Luis Aragones hian La Liga Match 757 lai a hmachhawn tawha, 2004 a Spain Manager ruat a nih hma khan La Liga ah hian kum 30 chuang lo cham tawhin Club 9 lai a enkawl hman bawk a ni. 1987 khan Barca te pawh enkawl tawhin Copa del Rey a lakpui nghe nghe a ni. Atletico Madrid ah a hlawhtling deuh ber thunga sawi a ni thin a, Liga title vawi 1 leh Copa del Rey vawi 2 lai mai a lakpui hman a ni. 2001-02 phei kha chuan Segunda Divison atangin First Division ah a rawn kaipui leh nghe nghe a nih kha.

Thulakna: Inkhel.com

Khawvela Mipui Vantlang Tana Hmun Tlawh Harsa Zual 10

Khawvelah hian leilung pianken a hmun tlawh harsa deuh deuh, mi nazawng in an thlen theih loh, Mount Everest chhip tih ang te a awm lai in hmun thenkhat chu mihring te siam ngei, mahse mipui vantlang tan a tlawh theih reng reng loh tih theih khawp a tlawh harsa an awm nual a. Heng hmun tlawh harsa deuh deuh te hi a tlawh harsa zual 10 an thlanchhuah te a hnuhnung lam atangin lo tarlang chho dawn ila a tha awm e.

10. Mezhgorye:

Mezhgorye hi Russia ram a khaw pakhat ni in he khuaah hian Mount Yamantaw an tih hmuna Russia sawrkarin hna thawk tura a rawih te an khawsa a, he khua hi 1979 a din tan kha a ni. Mount Yamantaw an tih hi tuipui zawl chin atanga teh a 5,381ft a sang niin Russia ram a Southern Urals an tih tlang dungah chuan tlang sang ber a ni nghe nghe a. Soviet Union a lo kehdarh khan Boris Yeltsin-a hunlai khan he tlangah hian sipai hmunpui pahnih Beloretsk-15 leh Beloretsk-16 te chu siam an ni a. Helai hmun hi sipaiin uluk takin a veng tlat mai a, tu tan mah luh theih leh luh phal a ni lo bur mai a. US sawrkar chuan he hmunah hian Russia hian Nuclear ralthuam te siam in a chhekkhawm a nih an ring a, Russia sawrkar lam thuneitute pawh hi he hmunah hian enge an tih hi a zawt reng bawk a mahse Russia hian a chhang tha duh tlat lo. Achang leh thil laihchhuahna hmun a ni an ti a, achang leh eitur chhek khawlna hmun a ni an ti bawk a, achang leh engemaw buai thut emaw Nuclear War a awm thut a an ram hruaitute thuhrukna tur hmun a ni an ti bawk a, chhanna mumal tak an pe ngai lo a ni. US Satellite te chuan Russian ho hian helai hmunah hian nasa takin lei an lai thin a ni tih chu an hre thei a mahse he hmun hi enge a nih a, helai hmuah hian Russia sawrkar hian enge a tih a heti tak maia a ven uluk tih chu khawvel hian a hre mawlh lo a ni e. He hmun hi khawvela mipui vantlang tana tlawh harsa 10 thlanchhuah te zingah 10 na ah dah a ni.

9. Vatican Secret Archives:

Ron Howard leh Dan Brown-a te film siam, Tom Hanks-a channa hmuhnawm zet mai ‘Angels and Demons’ tih kha kan en deuh fur tawh in a rinawm a. Dan Brown-a hian thil engemaw awm si behchhan a awihawm zet a phuahchawp a ziah hi a lo thiam nasa mai nitur a ni ‘Da Vinci Code’ reng kha khawvelin a buaipui nasa mai. ‘Angels and Demons’ tih a a changtupa ten Vatican Secret Archives ami thuziak an en ruk chungchang te pawh kha luh a har dan leh a chhunga thuziak awmte en a harsat zia te kha a tak tak ni awmtak a ni a, mahse a film ami ang kha chu a ni hauh thung lo. He Vatican Secret Archives ah hian a Archives chhung tak takah chuan enganga chhuanlam pawimawh pawh nei la a luh theih loh a ni tawp mai a, mahse he Archive chhunga thuziak awmte hi en phalna dil in mahni duh ang kha a dilnaah chuan sawi langin a awm ang ang chu a dil chhuah theih vek thung a ni. Mahse an lehkhaziak dahna pindan chhungah hi chuan luh phal a ni lo tawp. He Archives ah hian lehkhabu leh thuziak hrang hrang dahna chhuar, a vaia belh khawma 87Km vel zet a thui a awma, hetah hian thuziak hrang hrang Volume 35,000 chuang a awm a ni. Tin he Archives ah hian Scientific lam thuruk emaw, Kohhran lam thuruk emaw en phalloh bik pawh a awm chuang lo a, amaherawhchu eng thuziak pawh kum 75 aia upa chin lo chu en phal a ni leh hauh thung lo a ni. Vatican Secret Archives hi khawvela hmun tlawh harsa zual 10 zingah a pakuana ah a lang pha reng a ni.

8. Club 33:

Khawvela intihhlimna hmunpui, puitling leh naupang pawhin nuam an tih em em na hmun leh khawvela zinmite tlawh hlawh ber te zing ami Disneyland hi hrelo kan vang viau awm e. Sap ram lam te a ni a MLTP Act tih vel bawr an nei ve lo bawk a zu lampang na na na chu hetiang intih hlimna hmunah hi chuan duhthusamin a awm kan ring a ni maithei, mahse a teuh lo mai. Disneyland ah hian khawilai hmunah mah mipui vantlang tana zu zalen taka zawrna hmun a awm tlat lo. Chutihlai erawh chuan Disneyland chhunga Private Club pakhat, New Orleans Square an tih a 33 Royal Street a Blue Bayou Restaurant an tih mai bula awm Club 33 antih ah erawh chuan zu chu khawvela a changkang thei ang ber chi a awm ve leh thung a, mahse he Club ah hian a mi nazawng a luh theih reng reng loh tlat. Mi nazawng chu sawi loh US President pawh nise a Club Member a nih loh chuan a luh theih chuang hauh loh. He Club 33 Member ni tur hian US Dollar singkhat atanga singthum vel bawr a ngai a, chu erawh anni ram angah chuan nei zo chu an tam mai mahse Member nih hi chuti mai in a theih chuang reng reng loh a, a reilo berah kum 14 chuang zet Waiting List ah awm a ngai mauh mai.

7. Moscow Metro-2:

Hei ve thung hi chu a danglam zar ang. Russian ho khu thuruk hi an thup thei zek nitur a ni khawvel hian an thil neih te leh an ram chhung thil te hi tun thleng hian hriatchian theih loh hi a la nei fur mai a nih hi maw. Leihnuai Rel ‘Metro’ an tih ang chi hi kan hre theuh awm e. Russia ram Moscow khawpui hnuaiah khuan hetiang leihnuai Rel mipui vantlang hman tur hi a tlan ve reng a, chu chu Russia mipui te’n an hman a ni a, mahse a mi nawlpui in an hman ni si lovin Moscow khawpui hnuaiah khuan leihnuai rel kawng Moscow Metro-2 an tih mai chu a tlan ve tlat mai a. He rel kawng hi Stalin-a hun lai daih tawh a an siam a ni a, a hming atan KGB ho in D-2 tih an phuah tih leh kawngpui pangngai atanga metre 200 bawr vel a thuka awm ni in mipui vantlang ina an leihnuai rel kawng hman tura an siam ai pawhin a thui dai zawk ni a sawi a ni. Metro-2 hi a awm tak tak nge awm tak tak lo tih hi Federal Service of the Russian Federation (FSB) ho te leh Moscow Metro Administration lam chuan engmah an sawichhuak ngai lo. Chanchinbu lamin an sawi dan chuan he rel kawng hi Line 4 in a kal a Kremlin leh FSB hmunpui te, sawrkar thlawhna tumhmun bi Vnukovo-2 ami te, Ramenki a an underground town an tih mai te leh sawrkar hmun pawimawh dang dang te pawh a pawh kual vek in an sawi bawk a, mahse tumahin a awm tak tak em tih an finfiah theilo thung. He leihnuai rel kawng Moscow Metro-2 an tih mai hi khawvela hmun tlawh har ber 10 thlanchhuah zinga a pasarihna ni mai nilovin a awm tak tak em tih hriat chian har ber te zing ami a ni hial bawk a ni.

6. White's Gentleman's Club:

White’s Gentlemen’s Club an tih hi kum 1693 lam daih tawh khan Italian pakhat Francesco Bianco (Francis White) an hetih hun laia an thil hmuhchhuah thar 'Hot Chocolate' hralhna hmun atana a siam a ni a. Hun lo kal zelah Gentleman's Club ang chiah hian an hmang chho ta a, 'Betting Book' an tih ang chi, pawisa inchawina hmunpui pakhat a ni in an pawisa inchawi dan pawh a dangdai thei khawp mai a. Tukverh Darthlalang a ruah mal far luang thla pahnih awm hian khawi zawk in nge a mawng thleng hmasa ang tih in rinsiak te hian £3000 chuang te an inchawi thin a ni. He Club ah hian Hmeichhia chu tel phal a ni lo bur mai bawk. Engatinge Sap pachal Club mai mai si khawvel hmun tlawh har te zingah a tel ve kan ti a ni maithei a mahse he Club ah hian Member ni lo chu a luh theih loh bur mai a. Member ni tur hian ram pakhat Lal chhungkua ami nih emaw, a nih loh leh ram khat Politician ram hruaitu lu nih emaw a Member ni lai tu emaw in Member dang pahnih tal hriatpuina a Member ni tura an sawm emaw a nih ngawt loh chuan Member nih theih a nih miau loh avangin mipui vantlang pangngai tan chuan eng anga pawisa nei ngah tan pawh, 'khawnge ka'n tei lut ve mai mai chhin,' tih ngawt theih anih loh avangin khawvela hmun tlawhpawh harsa ber te zingah a parukna ah a tel ve ta a ni.

5. Area 51:

He hmun hi US khawthlang lam a Nevada chhim lam deuh Las Vegas atanga hmar thlanglam 133Km vela awm a ni in US Sawrkar Military Airfield hmun zau zet mai a ni a. He hmun hi US Sawrkar in Ralthuam thar a duan a a siamchhuahna leh a enchhinna hmunpui a ni. Mi thenkhat ngaihdanah chuan he hmunah hian US Sawrkar hian Thlengthlawkthei tla an chhar te leh Thlengthlawkthei a chuang chesual ta te ruang an chhar te pawh an dah khawm thin in Roswell hmuna Thlengthlawkthei tla ni a an sawi leh a chhunga Aliens chuang te ruang an chhar te pawh kha an dah niin an ngai bawk. Area 51 hian chanchin neuh neuh a ngah hle mai a, a bul hnai a awm te pawh hian helai hmun huam chhungah hian thil thlawk mak tak tak te pawh an lo hmu fo tawh thin ni in an sawi bawk. He hmun hi mipui vantlang mai pawh nilo US Sawrkar mi pawimawh tan pawh phalna bik neilo tan chuan luh thianglo a ni tawp mai a. Sipaiin uluk takin a Area pumpui mai hi an venga, phalna nei lo a lut ru emaw a hung chhunga lo lut emaw chu a Duty te hian kahhlum theihna an nei tih Warning Sign an tar fer fur mai a ni. An sawi dan chuan he hmunah hian US President meuh pawh phalna neilova a luh chuan kahhlum thiang a ni an ti mauh mai a, Sawrkar lam lah in he hmunah hian enge awm tih lah an puangchhuak duh der bawk si lova, chanchinbu mi te leh mi pawimawh dang pawh luh an phal miau loh avangin mipui vantlang tan ngat phei chuan Area 51 a luh tum chu Pialtlep a liluh tum tluk zet a thil khirh anih avangin khawvela hmun tlawh harsa ber te ziangah chhiar tel a ni reng dawn anih hmel.

4. Room 39:

Hei pawh hi hria kan tam vak in a rinawm loh khawp mai a. tin, khawvel hian a hre chiang lo takzet bawk. Room 39 an tih hi North Korea hovin kum 1970 chho vel a an din ni in a ruka KimJong-li tan a ramdang pawisa an rama chawk luh dan tur ngaihtuah tu pawl ‘Secret Organization’ anga an din ni in an hmunpui Room 39 an tih taka hi khawi hmun berah nge a awm tih hi khawvel hian a hre lo hrim hrim ringawt mai a ni. An rin dan ber chuan Workers’ Party an tih ho Building, Pyongyang, North Korea khawpui berah a awm ni in an ring. He pawl hi Bureau 39 tih an ni a, a hming hi eng vang chiah a phuah nge an nih a hriat loh a, mi thenkhat ngaihdan chuan he pawl hian China leh Switzerland velah Bank Account 20 vel bawr hmangin Pawisa lem te leh a ruka Pawisa thlengna te an kalpui niin an ngai a, tin, Drugs leh silai lam a sumdawnna te pawh an khawih pah reng bakah an thuhnuaiah hian khawvel pum huap sumdawnna ang chi 120 chuang an nei ni in an ngai bawk. Chutih lai erawh chuan he pawl hi a awm tak tak ngei em tih pawh hi khawvel hian a finfiah thei meuh lo chu a ni a, a awm leh awm loh pawh finfiah hleihtheih loh leh an hmunpui ber pawh khawnge tih hriat chian theihloh chu a mipui vantlang ang tan phei chuan han tlawh ngaihna a awmloh hrim hrim avangin khawvela hmun tlawh har ber te zingah a palina ah chhiar tel a ni ve ta a ni.

3. Ise Grand Shrine:

Japan ram a Ise Grand Shrine an tih hi in ropui leh lian sipai ten an ven khep khup tih lam a ni ve hauh lo mai a, an Ni Pathiannu (Sun Goddess) Amaterasu pual a an hmun thianghlim a ni a. He hmun hi Lal Isua pianhma BC 4 na bawr vel atanga lo awm daih tawh kha ni in Japan Imperial History a an thil pawimawh ber mai pakhat ‘Naik’ an tih mai Darthlalang chikhat Japanese Mythology a hmun pawimawh tak mai luah tu chu he hmunah hian dah a ni a. He hmun hi in engemaw zat di in leh eng engemaw a sak awm khawm a ni a, mak deuh mai chu Shinto Sakhaw ho rindan a piannawn lehna entir nan kum 20 dan zelah an thiat darh a an sa tha leh thin a, tun kum 2013 khan an thiat darh a, an sa tha leh tawh nghe nghe a ni. He hmunah hian an Puithiam te emaw leh Japanese Lal chhungkua, an Lal emaw, Lalnu emaw an Lal fa te emaw an nih loh chuan luh thianglo a ni tawp. Minister lehkha pentui hring ngat a ziah tih vel neih vanga luh theih ngawt chi a ni lova, Chief Minister vua leh vang nih vang ngawt a luh thei chi pawh anih loh avangin khawvela hmun tlawh har 10 thlan chhuah zingah pawh a pathumna hialah a lang pha a ni a. He hmunah hian i lut duh a nih chuan Shinto Puithiam hotu i nih emaw Japanese Lal fa i nih emaw a ngai hrim hrim tawp a ni mai.

2. Mount Weather Emergency Opperations Centre:

He hmun ve thung hi chu a hming hi tunlai film khawvel chhiatrupna lampang en thin chuan kan hre fo maithei a. He hmun hi Cold War lai vel a US sawrkar mi pawimawhte engemaw chiatrupna rawn thleng laka a him theih nan a an thuhrukna hmun atana an siam a ni a. An ram sawrkar mi pawimawh te an dam khawchhuah theihna atana beiseina hnuhnung ber ang atana an duan a ni. He hmun hi Federal Emergency Management Agency (FEMA) in a an enkawl bik a ni a, a chanchin hi mipui vantlang hriatah engmah tlangzarh anih loh avangin rinthu bak chu sawi tur a tam lo hle mai a. Tunah hian Function pangngaiin a Function reng a, US ram chhunga inpiakpawhna lam zawng zawng hi he hmunah hian a kaltlang vek tih bak chu an hnathawh dan engmah hriatchianna a awm lo a ni. He hmun hi mipui vantlang tan tlawh phalloh a nih mai bakah tlawh an tum pawh phalloh a ni tawp mai a, hei vang hian khawvel a hmun thlawh har ber 10 thlanchhuah te zingah a pahnihna a ni phak ta reng a ni. Mount Weather Emergency Centre chuangchang hi chu pa inti thil hria in emaw a chanchin a sawi teuh anih chuan eng Web Site pawh rawn tlawhchhan se an rinthu tho an sawi tihna a ni mai... Highly Classified a ni tawp.

1. RAF Menwith Hill:

Hei chu British ho lam chan ve thung. RAF Menwith Hill hi British Military Base ni in khawvel pum huap a Spy Network an tih mai ECHELON an tih te nen a in thlun zawm vek a, Satellite Ground Station a nih nghal mai bakah khawvela inbiak pawhna lam lo lak penna hmunpui leh Missile Warning System khawvela changkang ber awmna hmun a ni bawk a, tin, he hmun hi US National Security Agency hnuai a US National Reconnaissance Office in a an Satellite Ground Control Station ni ve nghal in heng an Satellite Antenna te hi thil var mum pelpul lian tak mai awmkhawm an ni a, heng te hi ECHELON ho hmanraw chikhat ni a sawi a ni bawk. ECHELON hi Cold War lai a Soviet Union leh a lamtang ho inbiak pawhna vel lo ngaithla ru tur a kum 1960 chho vel a an din kha a ni a. Cold war hnuah pawh hian Terrorist te inbiakna te, Drugs a sumdawng ho inbiak rukna te, leh ram dang dangin thu pawimawh a an inbiak tawnna te lo ngaihthlak ruk nan an hmang zui ta zel a, an sawi dan phei chuan khawvel ram pum a Telephone leh Radio Wireless Communication a mipui vantlang inbiakna thleng hian an duh duh an ngaithla ru thei ni a sawi a ni hial thin. RAF Menwith Hill pawh hi mipui vantlang tan chuan kal phalloh mai pawh nilovin a tum a tum chhin pawh awih loh a ni tawp mai a. Heti taka hmun pawimawh leh tlawh har anih avang hian khawvela hmun tlawh har 10 thlanchhuah zingah a No-1 ah dah a ni ta a ni. I Fb chas nena zan rei a in inbiak CK na te kha an lo hre kar lo ang tih i sawi thei miah lo. Hetiang anih avang hian helai hmun hian mimal zalenna, an Privacy a palzut a ni tiin sawisel pawh a tawk nasa viau thin reng a ni.

Thulakna:- BigDaddy Hmahmatea IV

Facebook

Thubelh:- Heta hmun tlawh har an rawn thlanchuah hi a Source ka rawn dah listverse.com ami hi a ni a, anni lo Source dang ami ah pawh hengho tho hi a ni tlangpui a, mahse an dah dan indawt erawh a inang lemlo thung.

Hmangaihna

Tlangval Pakhat hian a Bialnu Bike-ah a phur a;
Hmeichhia:
Kan tlan chak e mai ka hlau a nia!
Mipa:
Anuam a lawm le tlan chak hi!
Hmeichhia:
Mawh tak tak..Ka hlau a nia!
Mipa:
Ka Hmangaih che min ti phawt la.
Hmeichhia:
Ka Hmangaih che tih te chu i hre reng a lawm…’ka Hmangaih che’..Kan tlan zawi deuh thei tawh ang em?
Mipa:
Min Hmangaih tak zet chuan nghet takin min han kuah teh.

(Hmeichhia chuan nghet takin a kuah a..)

Hmeichhia:
Tlan zawi tak tak tawh la.
Mipa:
Ngawi rawh lawk, ka Helmet hi phelh la nangman khum lawk teh, Helmet khum hian min ti khalh nuam lo, ka duh angin ka khalh thei ṭhin lo!

A tuk zinga Chanchinbu chhuak tin deuh thaw ah chuan ti hian a in ziak a,
“Nizan zanlai pelh vel khan mipakhat leh hmeichhe pakhat Bike a in phurin an chesual a, Kawng hrul a Building in bang an su a ni. A khalh tupa chu a hmunah a thi nghal a, a hmeichhia zawk erawh chu chhan hman a ni, an chetsual chhan hi Bike Brakes fail vang a ni tih hmuhchhuah a ni bawk” tiin!!

A mipa hian a Brakes a fail tih zawng a hre teh meuh mai, mahse kumtluang runhmun lenpui a, fanau maltluan chawi dun tur leh, thihna chauh loh chuan thenlo tur a hmangaihna a lo hlan tawh, a hmangaih mengmawii chuan a Brakes a fail a ni tih a hriat vaih chuan a chiai nasat tur ziate a ngaihtuah a, a rilru chu a tal buai ve ngawt ang le!
Tichuan a Brakes a fail a ni tih hriattir a, tih chiai vak ai chuan hmangaihna thu hnuhnung in hlan a, duhthawh tak a in kuah rialin, a duhlaii tan a anun hlan a lo thlang ta zawk a, Helmet khum tirin a duhlaii nunna chu a chhanhim ta a ni.

A ho i ti em..
Hman deuh khan he thu hi Magazine Pakhatah hetiang teh nuaih lo deuh hian ka chhiar tawh a. Mahse a thu ka rem thiam ve lo va, Facebook a ka hmuh danin ka rawn dah ve tawp a nih hi.

Hriatzauna - Nungchate

* Ar in zawr hnap a ruah a do cuan khua a cheng thin.

* Awle te hian an lei an chhuah thei lo.

* Awle ha hi a thar tha dang in a thlak leh zel thei.

* Khawvela Bawngpui lian ber chu 2268 kg laia rit ani.

* Chingpirinu hi Nov-March ah a kiu thin.

* Sai Puitling Ha hi 4 Kg leh a chanve a rit ani tlangpui.

* Khau hian a Khup atangin Ri a hre thei.

* Sihal te hi Ui bauh ang in an bauh ve thei.

* Uiin rim a hriat theihna hi Mihringin rim a hriat theihna aiin a let 1,000 in a tha zawk.

* Vamur hi Thinghnah neiah a fu ngailo.

* Uihli te hi an taksa let 350 a thui an zuang thei.

* Tuikep te hi an damchhung in a changin a Pa ah, a changin a Nu ah an chang thin.

* Sazuk hian Ralvengtu anei thin. Vahrit leh Ramar te hi a vengtu a ngaih ani.

* Sahuaite hian Ni an hmu ve ngailo.

* Sahuai hian Pangang leh Changpat a lawm hle.

* Sai leh Sakei te hian Sawhthig an hal em em.

* Phengphehlepte hian thil tui leh tuilo hriat nan an Ke an hmang.

* Rulte hian maimitchhing chungin anla hmu thei tho. An mit vun hi an en tlang thei.

* Sava mei hi 12 ani a, a thla hi 18 ani thung.

* Sangha zingah Shark chauh hi mit khinghnih khap thei awmchhun ani.

Mak Leh Dangdai

Death Valley Thlaler vaivuta Lungpui te leh Lungte te thui tak taka an tawlhsawn fo na chhan khu tun thleng pawhin Scientist te meuh pawhin a chhan an la hre thei lo a, an la sawi fiah thei hek lo. Thil mak tak zawng a ni. Lung lian leh rit tak tak te khu vawi khatah feet 100 tam a thui te an tawlhsawn thin a. Chutia thui tak tak an kal thinna chhan ber nia Scientist ten an ngaih chu Thli bing na tak leh leilung a danglamna eng emaw thleng vanga awm niah an ngai a. Mahse chu pawh chu a dik thei chuang lo. Lungte chu an kalna lam a in ang lova, an kal chak zawng leh an thlen chin pawh a in ang lo tlat. Lung kal thin zinga thenkhat tisawn thei tur khawp thli chu thli satliah lo tak a nih a ngaih ngei dawn avangin. Tun thlengin mithiam ten eng vang a kalsawn a, che sawn thin nge an nih a, eng tin nge an chet sawn theih a, an kalsawn theih tih an la finfiah theiin an la hre thei tlat lo.

Cincinnati Office pakhat a Manager hna thawk, David Booth chuan zan sawm lai a Mumangah DC-10 Thlawhna tla a hmuh avangin a ngaih tha lo chuan May 22 ah American Airlines chu a Mumang hrilh turin a Phone ta nge nge a, a Mumang chu a hrilh ta a. Chu thu a hrilh atang a ni rei vak lo, May 25.1979 ah chuan American DC-10 chu Chicago bulah a tla ta nge nge a. A chhung a chuang mi 273 laiin nunna an chan zui bawk.

Johann Hurlinger, Austria mi chuan kum 1900 khan Vienna leh Paris inkar mel 800 laia thui chu, Ar kal (kuta lei beng, ke van vawr) in a kal chhuak ngat zu nia.

Manchester khaw Puithiam pakhat Rev. Geoffrey Howard chuan kum 1975 khan Wheelbarrow nawr chungin Sahara thlaler mel 2000 zet a thui chu ni 93 chhungin a kal chhuak.

Anglo Saxon ho chuan an Nupui te tisa chakna lama an sosang lutuk nia an hriat chuan an then hmak thei. Chu chu an dan bu-ah an ziak thlap bawk.

Pope Paul III khan Nawhchizuar 45,000 vel zet hlawh a pe thin ni ngei tur ani, a hlawh sem chhuahna lehkhabuah an hming a tlar thla thut hlawm mai.!!

Kum 1992 khan North Carolina State chhung Newton khuaa mi pakhat Ken Barger, kum 47 mi chuan zanlaia a Phone Call dawn chu chhan tumin, harh chiang mang lovin Phone chu a han ban a, Phone emaw a lak a intih lai chuan .38 Smith Pistol an khum bul dawhkana an chhawp zawk chu a han la palh ta hlauh zawk chu niin, a beng zawnah tak chuan a han hmet puak palh zuia, a thih phah daih a sin le.

Viscount Paemerston chu a vanduai ve khawp mai. Billiard Table-a nula a mutpui lai takin lungphu chawlin a thi daih.

West Virginia ah chuan school naupang a thaw a purun rim nam chu school an kal phal sak a ni lo.

Thu ziak thiam tak leh lem ziak thiam tak Jerry Seinfeld hi lemchan lama a inhman hma chuan mi hnuaia inhlawhin Electric Bulb dawr a nghak ve thin.

George Bernard Shaw chu kum 29 mi a nihin Hmeithai pakhat nen an chesual dun hlauh mai a. Chu a thil tawn chu a hnuah rapthlak a ti leh hnuhnawh ni ngei tur a ni, kum 15 chhung te meuh mai chu mipat hmeichhiatna lamah reng reng a rilru a pe duh lova, a hman pawh a in hmang duh lo hrim hrim.

Sanghawngsei hian a tuihal vanglai takin Minute 3 chhungin tui Litre 100 vel a in thei.

Australia rama dum Sazu chikhat, Antechinus pa te khu an han hur mai mai khawp a, an damchhung hun chu a nu pawl nan ringawt an hmang tawp mai a, chumi avang chuan chaw zawnna hun pawh an nei thei ngai lova, riltamin an thi tawp zel thin.

Samak Vun hi Mihring Vun let 10 lai vel a chhah a ni.

Hmanlaia Egypt ho chuan an Zawhte a thihin a sun nan an mithmul an pawt kawlh thin a, Zawhte that hremna dan pawh an nei na rem rem khawp mai 'Tihhlum' a ni tawp mai.

Dalmaitian Ui te hi an pian hlim chuan an var a, mahse an rawn than len hian an vunah rawng dang a rawn inkap bial ve chawp mai thin a ni. Tin Dalmatian 10 zela pakhat te chu an beng a ngawng ngei ngei bawk a. Chuan Ui zingah Dalmatian te chauh hian ruh natna chi khat (gout) an vei thei.

Mithiam te chuan, Chungu tur nei, Arrow Frogg te hian mihring 2,200 vel dawn lai tihhlum theihna khawp Tur an pai an ti.

Rul chikhat Garter an tih te chu an tui ve ngai lova, mahse tum khatah no 80 chuang vel lai te a hring thei thung.

Mu chi khat Peregrine Falcon an tih te chuan an awmna atang a mel 5 vel a hlaa Parva awm an hmu thei!

Bolivia rama Thing vang tak mai Puia Raimondii an tih chu kum 150 hnuah a par thei tawk a, chutah a par zawh ve leh a thi zui nghal thin.

Broccoli helah hian Serthluma Vitamin C awm zat let hnih vel a awm a. Tin Broccoli chiah hi thlai zinga nervous sysrem nei awm chhun an ni, chuvang chuan mithiam te chuan 'na' a hre ve theiin an ring.

Kum 1920 bawr vel khan America ramah chuan Cinema hall chhunga Popcorn ei an khap tawp. A chhan chu a bengchheng lutuk an tih vang mai a ni.

Nylon puan hmuchhuaktu Wallace Carothers chu a thil hmuhchhuah Bazar-a an zawrh hmain a inawkhlum daih.

Pa Hmangaihna

Putar damlo na tak hi a awm a, a natna vang chuan a â deuh vek tawh a. Tumkhat chu a Fapa hnen ah, ka fapa, "In chunga rawn ri leh deuh huk thin chu eng nge ni a ti a." A fapa chuan, "Chawngzawng," a ti a, a Pa chuan, vawi hnih nan a han zawt leh a, a fapa chuan a chhang leh a, vawi thum lai a han zawh hnu chuan a Fapa chuan a ning ta a, "Ka hrilh tawh lovang che, ninawm engmah i hre tawhlo i â tawh a nih hi." a ti a.

Chumi hnu rei vaklo ah chuan a pa chu athi ta a.

A fapa chuan, apa thih hnu chuan, apa thingrem chu a han en vel a, a pa Diary a hmu hlauh a, an han en chuan, tiang hian alo in ziak a, "ka fapa hian kum 3 mi a nih lai in, kawtlaiah ka lenpui a, ka pa heihi enge tiin chawngzawng chu vawi 27 lai min zawt a, ka chhang zel a.. Tiang a zawhna min zawt tur fa pa ka nei hi ka va lawm em!" tiin alo in ziak a. A fapa chu a tap ta zawih zawi a, a inchhir hle a..

Mizo Chanchin Laisuih Ami Thenkhat

Hriat ve hrim hrim atan.

Mizorama Mizo tawng a Chanchinbu kan neih hmasak ami a thu thenkhat a inziah dan ang ang in thangthar te hriatah ka’n tar lang ve a nge. Tunlai kan sms hawrawp te pawh min hriatchhuah tir zawk hial ani...

Laishuih No. 2 Aizawl 24 August 1898
Sahrang Kap thu:
Tu-pawh sakei-te savom-te a kah she la a lu borsap hnena a entir she la tangka shomhnih leh cheng nga a hmu ang, tin sakei no a kap she la tangka shom leh cheng hnih leh duli a hmu ang.Tin savom than kin a kap she-la tangka shom a hmu ang tin savom no a kap she-la cheng nga a hmu ang. Tin sa dang a kap she-la a man a hmu lo vang. (Hei hi a in ziah dan ang ang a ni. Bawrhsap in Sakei leh Savawm kap tu lawmman a phal na ani e)

Thu Dang Leh (Nau hnuchham chungchang):
Hma shang in naoshen a nu in a thi shan chuan naoshen chu mathei lovin a thi thin.Nima-shelatun lai in an ti nung thei. Naoshen chaw a la ei thei lo a nu in a thi shan chuan Aizawla an ron hruai che la Bor sap in a om pui ang a nu hnute ngai lo vin sai doi um in bawng hnu te tui nuam takin a hnek tir thin. Nikuma Aizawl kiang Thakthing khua a Darngenga nupui a hraichhe a a fa chu Bor sap nupui in a chawm dam ta tuna a pa hnena a om le ta le...
Tuna pawh Bor sap nupui hnena Mi zo fa pahnih an om. Chaw an ei theh huna an pa te hnena an om le ang.

Thil Zur Thu;
Lushei leh vai thonthu lehkhabu Sap in a ti chhuak a, tupawh a lei duh chuan cheng khat in ron lei ron she. Thimal pakhat tangka shom ruk man leh Thival tangka shom hnih man Bor-sap awfisa a om, tupawh a lei duh chuan ron lei roh she. An lei dawn tak meo chuan a man tolh tawk a om ang.

Phaitual Zinna Chanchin Thu:
Phaitual zin turin Borsap nen a nupui nen a fa nu nen Khamliana nen Thangchhingpuia nen Suaka nen Zika nen an kal a, Hringchar thlanga Tuiruang leh Tlong infin a an thleng a, chutah meilong an hmu a, meilonga chuan an chuang a thlanglam an kal a..Khulhkhut(Kolkata) khua an thleng a, chumi erawh chu khawpui lian pui a ni a, in pawh lung in hlir lianpui pui shang tak tak ani a. Tin,kot lai a chuan lamlian zao tak in an shiam a, a lai a sakor tawlailiir hnuk a khat in an kal a... a shirtuak a chuan mihring a khatin an kal mur mur bok a, kotlaia chuan khonvar tam takin an hal a, chhun ang in a eng a..Phaitual zong mihring an tam em em, an ropui hle a ni. Khulhkhut khua chu a dung leh a vang ni khat kal a ni.
(Hei hi Mizo Lal thenkhat te Bawrhsap in Culcutta a fan pui report LAISUIH no 4 a chhuak an ziah dan ang chiah ani.)

Hriat Ve Atan:
Mizo Chanchin Laishuih tih kha a hmasa ber chu 1898 May-June a chhuah niin thla 2 emaw thla 3 emaw inkar dan a chhuah ani. 1902 November thla atangin thlatin a chhuak chanchinbu Mizo Leh Vai Chanchin Lehkhabu tih a lo chhuak ta a, Dina Nath Press, Syhlet a chhut ani. A chhuah tu leh enkawl tu chu Major J.Shakespear-a Mizovin Tarmita kan tih kha ani. Tarmita hi A.R.Giles khan a pui a, rei tak an enkawl dun a. Tichuan 1911-1936 thleng Makthanga'n a enkawl leh a. Mizopa Editor kan neih hmasak ber ani. Chumi hnu ah Lalkailuaia leh Sainghinga ten 1937-1941 thleng an enkawl ve leh a, hetih chhung hian chanchinbu tha tak tak a rawn chhuak ta a he chanchinbu hi chu a tawp zui ve ta thung ani.

Mizovin thlakip a chhuak chanchinbu mumal tak kan neih hmasak ber Mizo Leh Vai Chanchin Lehkhabu chhuak hmasa ber November 1902 a thuziak awm te leh a ziak tu te:-

1. Sappui thu-Tarmita ziak
2. Vuta leh Lalpuithanga indo tir na thu-Suakhnuna(Pukpui Lal)
3. Sa ka' thu-Suaka(Durtlang Lal)
4. Aizawl chancin-Suaka
5. Chatuan Vok-sa thu-Zosaphluia
6. Nghaisakna-Zosapthara
7. Ram leh Hnam Dang thu te(Hma thu)-Zosapthara
8. Hmashang Chanchin-Lalhrima(Sebawng Lal)

Sources:- BigDaddy Hmahmatea IV
Facebook