Mipa Naupang Pakhat

Khaw pakhatah hian Pastor a awm a, a fapa Naupang kum 11 mi nen chuan Chawlhni chawhma inkhawm ban apiangin an khua ah chuan kalchhuakin Pathian Thu inziahna lehkha te an sem kual thin a.

Tum khat chu an tihdan phung pangngai ang tho chuan Chawlhni chawhma inkhawm ban chuan Pathian Thuziak (Bible Tracts) sem tur chuan an chhuah leh ringin a fapa chu a insiam mawlh mawlh mai a. Chutih lai tak chuan ruah nasa tak maiin a rawn sur a. Ruah a sur bur bur lai chuan a fapa chuan, "A pa, ka inring e. Chhuak tawh ila," tiin a pa chu a han au a. A pa chuan, "Eng atan maw i inrin a?" tiin a chhang a. A fapa chuan, "Pathian thu kan sem dawn kha..." tiin a chhang a. A pa chuan, "Bawiha, ruah a sur alawm," tiin a chhang a. A fapa chu a pa bulah chuan a tlanphei a, mak tih hmel deuh hian a en a, "A pa, niminah pawh ruahsur laiin i chhuah tho kha!" tiin a pa chu a chhang a. "Bawiha, ruah a sur nasa si a, i chhuak lo mai ang. Vawiin chu kan chawl ve nimai rawh se," tiin a chhang a. Mahse, a fapa chu a pa hriat loh chuan ruahsur karah chuan a chhuak ta tho a.

Naupang kum 11 mi chauh chuan an khaw chhung ah chuan ruahsur karah chuan a kalkual a, a theih theih hnenah Pathian Thuziak chu a pe a. A then chu an inah te lutin a pe bawk a. Darkar 2 zet chutia a vahkual hnu chuan Thuziak chu 1 chiah a bang ta a. Chu Thuziak chu han pek mai tur a zawng a, mahse tumah a hmu remchang lova.

A awmna atanga lang thei in chu a pan ta tawp mai a. Ava thlen chuan a kik deuh dat dat a, mahse tuman kawngka chu an rawn hawng lova. A chawl a, an kik leh thin a. Mahse, tuman an rawn hawng chuang lova. A beidawng chuan chu in chu kalsan mai a tum a, mahse a rilru ah han kik leh chhin hrim hrim a duh leh a. Haw a tum zet chu a inher a, kawngka chu ava kik leh a, a chum in a chum bawk a. A kik lai mek chuan kawngkapui chu a rawn inhawng a, nu pakhat hian, "E... Mama, eng nge ka tihsak theih che? Ruahsur kar karah te hengah te i rawn kal," tiin alo zawt a.
Mipa naupang chuan, "Ka pi, ka rawn tibuai che a pawi ka ti khawp mai. Mahse, thil hrilh tur che in ka rawn kal a, chu chu 'Isua'n a hmangaih che' tih hi a ni," tih pah chuan a Pathian Thuziak ken chu a pe a, ngawi reng chuan a tlan haw leh ta mai a.

Hun a han liam a, a kar leh Chawlhni chu a rawn inherchhuak leh ta a. Chumi tuk chuan Naupang pa Pastor chuan dan angin inkhawm chu a han kaihruai leh a, inkhawm an tan hnu chuan thu a sawi hma chuan, "Testimony sawi duh te kan awm em?" a han ti a.
Chu veleh chuan Biak In hnunglam atang chuan nu pakhat hi muangchang hian a ding a, tihian a sawi ta a, "Keimah chauh a awm ka ni a, kum tam tak chhung keimah chauhin ka inah ka khawsa tawh a. Ka chhung leh khat ten min boral san vek tawh a, tin, thian tumah ka neih loh avangin tumah inleng leh min rawn tlawhtu hi ka nei ngailo bawk a. Ruah a sur hian ka khawhar na hi a zual thei em em a. Chawlhni kalta khan ka nun khawhar lutuk chu hrehawm tihna ka nei a, inawhhlum ka tum a. Thutthlengah ka dingkang a, hrui chu ka nghawngah chuan ka hling vek tawh a. Zuanthlak ka tum lai tak chuan ka in kawngkhar chu tu emaw hian a rawn kik dat dat mai a. Ka han nghak deuh a, an kal mai ang tih rilru ka pu a. Mahse, kal ta lo chuan a rawn kik leh thin a. A rawn kik leh tak avang chuan thutthlenga ka dingkang zet tawh chu ka chhuk leh a, kawngkapui chu ka va hawng a. Mipa naupang hi huh vek hian pawnah hian a lo ding a. Chu naupang chuan Thuziak pakhat hi min pe a, 'Isua'n a hmangaih che' tih thu hi min hrilh bawk a. Naupang chu a tlan leh daih avang chuan kawngkhar chu ka khar leh a, ka tihtum ngai bawk tih tum chuan thutthlengah chuan ka han lawn leh a. Mahse, ka rilru ah chuan kha naupang te khan Pathian Thuziak min pe turin leh Isua'n min hmangaih thu min hrilh tur khan ka in a rawn pan vang vang a ni awm si a tiin ka ngaihtuah a. Kum tam tak mai ka kawngkhar hi kik lovin a awm tawh a, mahse kha vantirhkoh te reuh te khan a rawn kik tlat mai a ni. Inawhhlum tumna chu ka rilru atang chuan a bo ta a, thutthleng atang chuan ka chhuk a, ka thingthi a, Pathian hnenah chuan ngaihdam ka dil a, Ama tan a nung tawh turin ka inhlan nghal a ni. Tukin khan hma takin ka thova, hemi ka thil tawn chanchin hi he Biak Inah hian sawi ka duh a, ka rawn inkhawm vang vang a ni," tiin a sawi a

Daktawr Leh Mi Pakhat

Daktawr pakhat hi Mitthi vuina a a awm lai hian an rawn Phone a, Emergency, Urgent Surgery anih thu an rawn sawi a. Hmanhmawh phili tak mai hian Damdawiin ah chuan a rawn tlan lut rawk rawk mai a, a rang thei ang berin an rawn kohna chu inthlak sawk sawk pah chuan a han ngaihven ta a...

Patling pakhat chuan hlauthawng hmel tak leh Lunngaih hmel tak hian a lo nghak reng tawh a. Daktawrin a han biak veleh chuan, thinrim tak hian, "Engati em em nge i va han thang rei em em ve maw le... Ka fapa thi lek lek in a awm a, Hmanhmawh i tum eih lo a mi a?" alo ti pang pang mai a. Daktawr chuan, nui suk chung hian, "Ka tihpalh takzet ani, Damdawiinah ka awm loh lai tak ani a, ka theih ang tawka rangin ka lo kal vat alawm, chuan, khawngaihin lo in bengdaih tum hram ta che, ka hna kan hawk zung zung ang e," a ti a. Chu veleh Chu Patling chuan, "In bengdaih a...I fapa heting dinhmunah hian ding ve ta se, i inbengdai thei dawn bik em ni... i fapa chu thi ta se, engtin nge i tih ang a?" a han ti leh pang pang a. Daktawr chu nui leh suk pah in inzaina Room ah chuan a lut ta a.

Darkar khat hnu vel chuan Daktawr chu hlawhtling tih hriat tak hian a rawn chhuak a. Hmanhmawh taka tlan chung chuan, "Pathian vang liau liau in i fapa chu kan chhan thei ta hram e, ka hmanhmawh deuh a, thil awmzia chu Nurse kha ilo zawt mai dawn nia, Pathianin awmpui zel che u rawh se," a ti ta a. Hmanhmawh tak chuan a tlan chhuak ta nghal a.

Nurse lo chhuak hnenah chuan chupa chuan, "Ngati nge Daktawr kha ava hmanhmawh ve, engmah pawh ka zawt chiang hman reng reng hleinem," a ti a. Nurse chuan a bianga mittui tla hrukfai pah chuan, "A fapa kha nimin lawk khan Accident-ah a Boral hlauh mai a, I fapa zai tura kan Phone lai pawh khan a Fapa vuina a a awm lai tak ani a, i fapa a chhanhim ta bawk a, Vuina hmang zo turin a haw ta anih kha.." a ti ta a.

Bible Hriatzauna I

Bible Lehkhabu zinga 'India' hming lanna chu Estheri Lehkhabu chauh hi a ni.

Bible a Inthawi hmasa ber nei a, Maicham hmasa ber dintu chu Nova a ni.

Bible a thu tawp ber chu Amen tih hi a ni.

Bible a Pawisa lang hmasa ber chu Darik a ni.

Bible a Sava hming lang hmasa ber chu Choak a ni.

Bible-a Lehkhathawn ziak hmasa ber chu Tirkhoh Paula a ni.

Bible in Zawlnei tia a sawi hmasak ber chu Abrahama a ni.

Bible a Hmeichhe thil ru hmasa ber chu Rakili a ni.

Bible-a Musical Instrument lang hmasa ber chu Tingtang a ni.

Bible a fa phir hring hmasa ber chu Rebeki.

Saula tih hi Dil chhuah emaw, Lalpan a dil tih na a ni.

Bible a Mihring zinga thinrim hmasa ber chu Kaina a ni.

Bible Lehkhabu tawi/te ber chu II johana hi a ni a, chang 13 chiah a awm.

Bible a Lehkhabu lian ber chu Sam bu hi a ni a, bung 150 a awm.

Bible a chang tawi ber chu English ah chuan Johana 11:35 hi a ni a, Mizo Bible ah erawh chuan I Thes.5:6 hi a ni thung.

Bible a chang sei ber chu Estheri 8:9 a ni.

Bible a bung sei ber chu Sam 119 hi niin, bung tawi ber pawh Sam tho niin bung 117 hi a ni.

Samsona tih hi a Mizo tawng chuan 'Ni fapa', 'Tihhran', 'Chak' tihna a ni.

Bible ah hian 'Lalpa' tih thumal hi 1855 lai a awm.

Bible Bu 66 zingah hian Estheri Lehkhabu ah hian Pathian hming vawikhat mah ziah lan a ni lo.

Bible a Lui hming lang hmasa ber chu 'Pison' lui hi a ni.

Bible ah hian Lal Isua hming atan leh anihna hrang hrang atan hming 116 lai hman a ni.

Bible a Chanchintha ziaktu mi Pali te hming chhinchhiahna (Symbols) tan heng te hi hman a ni.

Matthaia:- Mihring thla nei.

Marka:- Sakeibakbei thla nei.

Luka:- Bawngpa thla nei

Johana:- Mupui

Isua zirtir 12 te chhinchhiahna (Symbols) atan heng te hi hman a ni:-

Petera;- Chabi bawr

Andria:- Cross (X ang)

Philipa:- Cross leh Chhang pahnih emaw Mistiri bungrua thil kil li tehna.

Bartholomai:- Bible chunga Chemtea savun zai (lip) lai lem.

Jakoba (a te zawk):- Thingzaina

Thoma:- Thalngul leh rin kil li nei.

Simona:- Sangha lem.

Johana:- Berhbua Rulpui lem awm.

Mathia (Juda Iskariota thlaktu):- Lehkhabu leh Hreipui.

Matthaia:- Pawisa ip Pathum lem.

Jakoba (a lian zawk):- Lukhum leh Tiang, (Mithianghlimten an hawl leh khum thin).

Juda:- Lawng leh akarna ngul leh Mistiri thil kil li tehna.

Bible in Hremhmun hming hrang hrang a sawi dan te:-

1. Meidil

2. Leilawt

3. Mei leh kat leh thli lum tak

4. Kan ral hmang mei

5. Seol hruihrual (lungngaihna hmun)

6. Lungngaihna leh tahna

7. Tah leh ha thialna hmun

8. Rawhtuina mei

9. Mitthi khua

10. Kumkhuaa alh

11. Thlarau bawlhhlawh awmna

12. Pathian sawichhiatna hmun

13. Chatuana boralna

14. Pawn khawthim

15. Inchhir sawt tawh lohna hmun

16. Chawlhna hmun awm lohna

17. Chatuan hremhmun

18. Hreawm tih vanga Lei sehna hmun

19. Setana leh a Tirhkohte awmnan a buatsaih

20. Chatuana thim chhah mup

21. An thaw anmahni kangraltu mei

22. Kangmei na tawk tawrhna

23. Mei leh Kata nghaisakna hmun

24. Ui, Dawithiam, Inngaih ching, Tualthat apiang leh adang te awmna hmun

25. Pathian thinurna no inna hmun

27. An lung thih ngai tawh lohna leh an mei mih ngai tawh lohna

28. Tuisik far khat chauh duha an dilna

29. Sawtna awm tawh lova khawngaihna an dilna hmun

Bible-a thil hming thenkhat in a a entir te-:

Tum thing:- Ropuina, Chawimawina, Hlimna

Hlumbel khawnvar:- Pathian eng

Tawtawrawt:- Temple a Pathian bia a kal tur entirna

Thei buhfai:- Beiseina Lawmawm

Grape hnah:- Rah hmasa ber, Pathian hnena hlan tur, Grape rah seng hun entirna.

Lily, Rose:- Temple cheimawi nana an hman chuan Pathian thianghlimna leh dikna entirna

Thei buhfai hnah 1 emaw 3 ( a kuang telin):- Sakhaw mi nihna te, Thianghlimna te leh Dikna te a en tir.

Kristian te chhinchhiahna hming leh a entir te:-

Arsi lem (Zung Nga nei);- Pianna, Isua pian chhinchhiahna.

Arsi lem (Zung Ruk nei):- Siamtu Pathian.

Rin bial:- Chatuan, tawp nei lo.

Mit lem:- Pathian engkim hria leh hmutu.

Thuro lem:- Thlarau Thianghlim.

Thei buhfai:- Thlarau rah, Kohhran hmasa.

Theipui;- Rahchhuahna, hnathawh tha.

Apple:- Sual bul, sual ata chhandamna.

Sidar thing:- Thianghlimna, chhe thei lo.

Ngunhnam:- Thlarau lam indona.

Tum thing:- Taksa, Tisa a hnehna.

Kraws hnuaia Luruh ro leh Ruhro inkawkalh:- Thihna chu hnehin a awm.

Horoscope - Pisces

Pisces (The Fish)

(February 20th to March 20th

Piscean tam zawkte chuan hmun pakhata rei tak awm leh inkhung ngawt ngawt an thei lo. Chu ai chuan hmun tin hmun tanga vahkual nuam an ti zawk. Damlai tuipui hi chen a, hmun hrang hrang tlawh kual hi an nuam tihzawng tak a ni. Hmun changkang leh mawi, engthawl leh dangdai apiangah Piscean ho chu an fuankhawm tam mai.

A tlangpuiin khawvel thilah an tum a sang ngai mang lo, sum leh ropuina te hian a hip ve mang lova, chuvangin nupui/pasal hausa tak an nei a nih ngawt loh chuan an hausa lutuk ngai lo. Piscean ngaihdan chu Millionaire nih kher a ngai hleinem tih hi a ni. An hetih vang hian mi duham tak an awm lova, an naktuk hun tur an lungkham ve run ngai lo bawk. An sign Sangha ang pawhin tui zangkhauh sut ai chuan in lentir an duh zawk ang mai hian Piscean ho pawh hian buaina leh harsatna te hi tlansan ai chuan sepui ruah tuar ngawt an thlang zawk thin a ni. An mize her leh mize ngurchuai tak hian a tiduhawm thei riau. An nunkhua a tihbuai loh a hnu khawvel thil thleng te hi an ngaihven lem lo.

Sawiselna te, hekchhiatna te hi an tuar thei riau, an inchhut ngen khum tlat thei. An hetih avang hian mi zaidam, thinur thei lo ang hial a ngaih theih an ni. Mahse a ni ngawt lo an dawhtheihna a puahkeh tawh vek vek chuan tawrhlelhawm tak an ni, mahse rei an thinrim ngai lo thung. Ruihtheih thil an ti ngai lo tlangpui a, inthiarfihlim turin an fing tawk deuh zel. Mahse thingpui, coffee, squash etc. vel hi an khulh thei riau.

An chhehvel a thil reng reng mihring leh rannung thing leh mau thlengin a tha zawng leh mawi ti zawngin an thlir thin a, chuvangin hmun ti nuak nuak leh buaina hmuna mi hruanghrau puipuite nena buhchangrum leh sa ei aiin – inngeih dial diala chawthing bar hona hmuna chen an thlang zawk. An thiltih reng rengah hlawhtlin lam aiin hlawhchham mai in rinna an nei lian zawk. Chhuan an chham em a nih loh chuan hlim takin an awm thei tlat.

Pisces sign hi sangha pakhat mai aiah pahnih a ni tih I hre tawh phawt anga, a chhan chu Piscean te hian thil an tih reng rengin ngaihdan inletling hlauh an neih thin vang a ni. Heng sangha pahnih te hi an hawi zawng a inang lova, pakhat zawk hian khawmual lam a hawi laiin pakhat erawh chuan limawng lam a hawi thung a. Chutiang bawkin Piscean ho pawh hian asang ber nih an tum loh vek pawhin a hniam ber dinhmunah an indah thin. Sangha hian a sir lama thil awmte chiang taka a hmuh theih laiin, an hmaa thil awm an hmuh thelh fo thin ang mai hian Piscean ho pawh hian a behbawm vel chiang taka an hriat laiin a pawimawh ber an hriat hmaih fo thin.

In elna leh intihsiaknaa inhawlhlawr chi an ni lo nain an han tih ve tawh vek vek chuan an hnehsawh viau zel. Zahzumna hi an pianken nimahsela mipui hmaah an khur chhe ve ngai lawi si lo. Amaherawh chu lemchan lama hlawhtling thei tak te pawhin lemchan khawvel chhuahsan phahna sawisel hi an digest thei thaklo, an hriatrengna hi a tha em em naa an telephone number tih ang reng hriatreng tur anga ngaih hi an theihnghilh duh riau thung. Mak ve deuh mai chu thil engemaw lo thleng tur hi an hrelawk thei riau, abik takin vanduaina lamah a ni bik zual.

Aries hi Birth Sign a ni ang bawkin Pisces hi Death Sign a ni ve thung. Zodiac sign hnuhnung ber anih avang hian a hma ami sign i.e Aries, Taurus, Gemini etc mizia an mizia ah hian engemaw tal chu a tel vek a ni. Chawp leh chilha thil sawi zung zung theihna hi Virgo mizia atanga an neih a ni a. Thil chik taka han ngaihtuah leh dik taka thil tih an duhna hi Libra mizia atanga neih a ni bawk. Hlimhlawp an lawmna chhan pawh hi anmahnia Cancer mizia inphum vang a ni. Chutiang bawkin, lainatna pawh hi Cancer leh Saggitarius mizia atanga an neih a ni a, a chang chuan Saggitarius ang maiin frank tak takin thu an sawi thin a, an thilphal em em bawk. Capricorn ang maiin an duty-ah an inpe zo viau, Gemini ang maiin rang tak taka a tawng leh rilru chak fu chang a nei bawk. Taurus ang maiin zawmthaw tak leh damduaiin an awm thei a, Scorpion ang maia thiante tana inpe zo an ni bawk. An mizia tha tak pakhat chu mahni intheihnghilh thak khawpin hun kal tawh leh lo la awm turah an cheng thei.

Positive Qualities:

1. Chhura Umpui mu hriat

2. Thil awmzia sawifiah thiam

3. Ngilnei

4. Mi tana inpe zo

Negative Qualities:

1. Duh duha kawih er theih

2. Mi lungleng thei

3. Mi rual pawllo

4. In khuahkhirh theilo

Horoscope - Aquarius

Aquarius (The Water Bearer)

(January 21st to February 19th)

Hemi huna piang a tung chhova kalte Sign atan chuan ‘Tui chawitu’ an lo hmang tlat mai. A tello a khawsak kan rel theih loh chu ‘tui’ hi a ni tlat a ni. Khawsak rel chu sawi loh, tui tello hian kan nung thei lo. Chutiang khawpa pawimawh chawitu ni tafam chu Aquarian ho hi engemaw an nih le? I chhiar dawn teh ang.

Aquarian te hi an pianken rengah mi nunnem leh hahdamthlak tak nimahse tihawl tak an ni lem lo. Midangte han tih chiai leh hrilhhai taka han siam vel hi nuam zu ti riau a. A tlangpuiin aw thawp, ngaihno bei tak leh hawihhawm tak an ni. Sawilawk hleih theih lohna mize thlak thut thut an ching. I nuihzat chuan a nuihzat ve ang che, chutiang bawkin I sawisel chuan a sawisel ve mai ang che. Chutiang bawkin Ha aiah ha, mit aiah mit tih ang deuh kha a nih mai chu. Thian tih tawngkam hi an leklam viau niawm a sin, An tawihte nena an han inhmuh sakhi a, an inban hial pawh hian, ‘thian tal chu kan la ni ang chu', an tihram zel. An mizia hi tawngkam hnih/khat maia sawifiah theih a ni lo, mawl anga sawi mai theih loh, han hmuhsit dawna hmuhsit ngawt chi si loh. Harh zawk zawk lo leh nuamsip lawm ang reng, ngaina silo an ni. An mi ngaihnat zawng pawh hi tuallim leh lar tak an ni ngai lo; mi hriat lar lem loh tak an ni duh riau.

Politics hi an ngaihven a, sports lamah hian an tui a, a ruk takin naupang hi an ngaina bawk. An mitmengah hian engemaw riau a awm a, ngaihno a beiin, thil hre thei leh thiltihtheihna tak nei hi hialin a hriat. Zalenna ngaina mi tak leh mahni thu duhzet, mi hlim thei leh nelawm ang reng tak an ni. Chumai bakah mi biangbiak thiam, ngilnei ang reng tak, mi khawngaih thei tak leh zakzum ang reng tak an ni bawk. Huau huau leh puipunna lamah an hmel hmuh tur a tam bik. Thian ngaina mi an ni a, thiante tan an inpe zo hle thin. A chang chuan an khua a har theiin an ngui thei hle thin. Hetianga an awm tawh hi chuan tuma chimbuai an duh lova, mahni chauh a awm an thlang zawk thin. A malin an awm emaw mipui zingah an awm emaw an awm dan phung leh hriatna tha tak an hloh ngai lo. Thil hlui leh tihdan lo awmsa hi an ngaihlu ve lova, tih dan thar hmuh chhuah a, hman nghal an duh thin. A hun leh a hmun a zir leh bula mite a zirin Aquarian te chu an inthlak danglam zung zung thei a ni.

Thiante tana an inhuamthui ngaihtuahin thian tha erawh an nei tam vak ngai lo, a tam lam aiin a that lam an ngai pawimawh a, chuvangin, thian tam tak neih del dul ai chuan thian tha a chhiar ngam tlemte neih an duh zawk. An hetih vang hian hun engemaw chen bak tihtakzetin thian an kawm peih ngai lo. An rilru vawikhat I hneh tawh chuan eng hunah pawh I tan a inhawng reng tawh ang. Tun hunah hian an cheng ve lova, hun lo la awm turah an rilru a cheng zawk thin. Midangte ngaihtuahna piah lama an awm tlat avang hian an lungrualpui thian kawm tur pawh an van reng a ni. Midangte ke chhe ruala pen ve turin hnungtawlh erawh an tum der lo, chu ai chuan mahnia khawhar taka awm an thlang zawk. Aquarian hi sun sign zingah finna sign tih hial a ni. Za a sawmsarih vel ngawt mai hi vanneihna huangah an cheng a ni. An thil ngaihtuah hi a vantlang nazawngin an tawm phak meuh lo.

Mi rilru zau tak an ni a, an ngaihdan chuan mitin hi u leh nau vek kan ni. Aquarian mitah milian leh mite kan awm chuang lo, mitin hi kan inang tlang vek a ni. Thil pakhat ringawt a an damchhung hman an duh ngai lo, chutiang bawkin, thu intiamkam promise an duh lo. Hun an tiam vek vek a nih chuan an bawhpelh ngai lo thung. An ngaihdan tlang takin an sawi mai thin a, mahse midangte ro an rel sak ngai lo, an ro rel sak pawh an duh lo. Insual leh intihbuai an duh lova, inngeih taka awm dial dial hi an duh dan a ni.

Dawt sawi leh mi bum hi an duh lo, midangte ta puk hi an duh lo bawk. Chutiang bawkin midangte thil puk tir pawh an duh lo bawk. Khawvela thil hriatrengna nei tha ber chu an nilo na in rilru chak tak an ni. Chawp leh chilhin thu ruahtham loh chu an sawi nghal zung zung thei. Ngaihdan tha tak tak an pawchhuak zung zung thei a ni.

Positive Qualities:

1. Thudik zawng mi

2. Mi rinawm

3. Thil chhut peih

4. Nelawm

5. Rilru zau

6. Ngilnei

7. Chhutbuai ngai vak lova thil hre thei

Negative Qualities:

1. Rilru leh awmhmun thlak thlak

2. Mi inkiltawih

3. Mi phutkhat

4. Mi sehhel

5. Mi rinhlelh hmang

Horoscope - Capricorn

Capricorn (The Goat)

(December 22nd to January 20th)

Kel kham kova a han che tla vel hi I hmu tawh chawk anga, kham lawnah na na chuan tluk loh rim an nam hle a. He hun inkara piangte Sign atan hian Kelpa hi an lo thlang tlat mai. Eng vang tak ni ang maw? (An be el el thin chu a i em lo ang chu.)

Capricorn ho hi chuan hma an sawn theihna tur hmunah awm hmun an khuar thin. An thil ruahmansa tihhlawhtlin theihna hmun apiangah an tlei thei zel mai. An chhinchhiahna ‘Kelpa’ hi kham leh tlangsang lawn chi a nih avangin Capricorn ho pawh hi vantlang chunga leng an ni. A tlangpuiin midangte enbik leh thlir nih aiin midangte thlirtu nih an thlang a, an hetih vang hian mipui zinga in lan thlazen nih an duhlo khawp mai. Amaherawh chu a ti mi tawh vek vek chu tluk rual an ni lo.

Mi thutak leh lungleng thei tak an ni a, mahni inphatsan ngai lo leh mahni inthunun thei ang tak an ni deuh zel. Eng anga hlawk leh dengkhawng pawhin an khum mahla an thinrim ve mai mai lovang. An landan satliah maiah chuan mi zuamawm leh hlauhawmlo tak an ni a, zuamsual awl tak an ni. An pawnlam landan piah lamah hian perek hmawr zum tak aiin an hlauhawm zawk. Thil engpawh hrechiang hmasa lovin an risk ngawt ngai lo, tumna a awm chuan kawng a awm tih aiin kawng a awm chuan tumna a awm tih hian an rilru a rem zawk. Hlauhawm engpawh huama thiltih aiin kawng tluang leh him, an hriatchian chauh an zawh thin. Kelin an aia kham lawn sang zawk kal khan leh rahbi lo zawngtute a ensang zawk (dah chung zawk) thin ang hian, Capricorn ho pawh hian an aia thil ti thei zawkte chu itsik tak aruangin an ngaisang zawk thin. Hlawhtlinna hi an rin avangin thuneitute an zah thiam a, dan leh dun anga thil tih an duh thin. Amaherawh chu Capricorn tam zawkte hian an aia thil ti theite an ngaisang ringawt a, tluk ve tumna rilru leh el ve na rilru an neilo fo thin, a tul tawpkhawk a nih loh chuan hmelma an insiam duh ngai lo.

Mi huamhap chuhhelh leh duham tak an ni ngai lo, chutiang mite chu hmasak tirin kawng an kian mai thin, mahse vannei zawkah an tang leh duh riau thung, an fimkhur em em a, humsual an dai ngai lo tih theih a ni. Itsikna, duhamna, chak lutukna, phur thut thil tih, thinurna, inthlahdahna leh dawngdahna tul lova in rel vak vak, thatchhiatna leh fimkhur lohna te hi Capricorn danah chuan humsual a ni vek mai. Hengte hi mi tam tak tlukchhiatna a ni fo a, mahse anni ho chuan an pehhel hram thin.

An thil tum ti hlawhtling tur atan theihtawpin hmanhmawh lutuk lovin an bei thin. Leilehna a kut a nghah tawh chuan a hnunglam an hawi tawh ngai lo. Capricorn thenkhat chu mi lungleng thei (romantic) deuh mai an ni a, zanthla eng no tak leh phengphehlep mawi tak thlawkte hian an lung a len tlat thin. Mahse mi tam takte angin an lunglen vangin kawngdik an hmuh thelh ngailo thung. Capricorn hla lama tui tawh vek vek chu an tia lawm hla an han phuahte hian a behbawm vela kual thui lovin a point takah an lut nghal chat thin. Punctuation thleng hian dik thlapin an hmang thin a, Capricorn zah phurh I duh chuan a hleihluakin khawsa lo la, a awm tawk, mi aia uchuak lo hi an ngaihdan leh duhdan a ni.

Capricorn thenkhat chu thu zaizaptu an nih dawn loh chuan hnathawh duh loh an ching thin, mahse chutiang mi chu an che fuh ngai lo, tih lawm thei pawh an nilo, midang buainaah an inrawlh duh ngai lo. Mahni seh seh mual hranah an ti mai thin. Thawk-a-phitah midangte thurawn an pe ngai lo, miten an thu an ngaichang em tih an thlithlai hmasa te te thin. A thu I ngaichang tih a hriat chuan phur tak leh that tho tak leh dik nia a hriat chu a hrilh zut zut tawh mai ang che. I zawm ngei pawh a phut nghal ang. I zawmlo tih a hriat chuan a hranpa ngatin a chapchar duh ang che.

Mahni duty hlen ngei an tum thin, an hlen ngei bawk thin. An dinhmun a nghelngheh hma chuan nupui/pasal lam an ngaihtuah ngailo tluk a ni. A tlangpuiin mi zakzum, pawisawi lo leh ngilnei ang reng tak an ni. Fimkhur takin an hun kal tawh an chhut a, an hun hman dan an ruahman thin. An vanglai hunah mahnia ding lovin an aia thiltitheite kohvah an in nghat thin.

Positive Qualities:

1. Ngelnghet

2. Mi tum ruh/sang

3. Zuai har

4. Thil chhut thiam

5. Mi taima

6. Tih tawh ti tlur mi

Negative Qualities:

1. Mi rinhlelh ching

2. Huatthu chhia

3. Mi rilru dawih

4. Mahni hmasial

5. A chhe zawnga thil dawn mi

6. Mahni tanna lam tan bur

7. Mi luhlul

Horoscope - Sagittarius

Sagittarius (The Archer)

(November 23rd to December 21st)

Hemi huna piangte Sign chu ‘Thalkap mi’ (Archer) nen inmil berin Sun Sign zir mite chuan an hria. An chhinchhiahna atan pawh thalkapmi an hmang. Saggittarius ho hi harhvang, fiamthu deuh tak leh awm hle hle thei lo an ni. Mi kawmnuam tak leh midangte ngaihven thiam tak an ni. Ngaihtuah chiang mang lova thusawi zung zung mi an ni. An hetih vang hian an tum reng pawh ni lovin mi rilru an tina fo thin. Rilru thianghlim, mi hlimthei leh midangte tihlawm tum ta reng reng an ni.

An awm hle hle theih loh vang hian hmun khata thut reng emaw, din reng emaw an thei lo. An kal reng reng pawh hi an harhvangin an ti ngei nguai lo. Lainatna an ngah a abikin ran an duat thei hle. Saggittarius ho hian risk lak vel hi nuam an ti a, thil huphurh awm tak tak han chai vel te hi nuam an ti. Thil reng reng tih zung zung an duh thin a, zawiawi leh ngurchuai an ngaithei bau lo. Dik leh tha nia an hriat chu huaisen takin an sawi nghal mai thin. Midangte ngaihdan a ni ve em tih leh, mite tan a pawi em tih lam an dawn chang lo. A ruh lang rawt rawtin thudik nia an hriat chuan an sawi mai thin, A duh chuan a pawm anga, a duh loh chuan a pawm lo mai ang tih hi an ngaihdan a ni bur mai. An thu duh lutuk eawh chu hrehawm tih chang an nei fo thin. Mi tlang tak an ni a, an rilru chu chhemtheia vut thun ang a ni mai, zep tit tet an thiam lo.

Mi huat an hlawh khat viau, mi frank tak an nih avangin an mizia hrechianglo ten an ralkhat huat ngawt thin na a, hriat thuaka ngeiawm thuak, hriat chian poh leh ngainatawm tawlh tawlh chi an ni. Mite fak leh tihlawm an duh fo thin. Mahse a nazawng chuan an hlawhtling bik lem lo. Typical Saggittarian te hi mi hlim thei an ni tlangpuia, mahse an huat zawng tak thu an dawn fuh chuan khawnvartui a mei alh tih mih tum ang maiin an vung hluai thin. Midangte thuhnuaia awm nuam an ti ngai lo, mal len ngauh ngauh hi nuam an tih zawng tak a ni. Thil tih laklawh laia ralbang chi an ni lova, midangte tanpuina an duh lo bawk. Hmeichhia an nih chuan tharum aia tawngka a buaina chinfel an duh mai thin. Saggittarian ho hi cho sual awl tak an ni a, kuttum nen a Bull Dozer sual tum ang deuh an ni, mi nazawng han tuar chi a ni lo.

Saggittarian ho hian rinawm lova puh hi an pai zam theih loh ber a ni. Diklo taka puh leh tih hmingchhiat tumna ang chi hian khawdang a hawi tir thei lo, a hnulawk a an inchhir lehna tur khawpin an che bawraw thei thin. An danglamna ber chu damdawiina luh ngai khawp hiala an sawisak hnu pawh nise, pangpar nen an kan leh peih lawi si a ni. A chhan ber nia lang chu ngaihtuahna fim hmang lovin an che nghal mai thin niawm a ni. An tleirawl/rawlthar lai hun hian Sakhua an ngaihven lo duh khawp a, mahse an upa tial tial a sakhua lam an ngaihven tial tial a, tin veivah ngaina mi an ni a. Englai pawhin zin chhuah an in peih at reng a ni. Thupui fun taka thil tih an peih lova, an theih zawng a nih pawhin thil lian tham deuhah lo chuan an phur peih lo. Saggittarian ho hi experience chhawr thiam tak an ni.

Sum leh pai hman an thiam teh chiamlo, an kuta awm ang ang chu hman nghal zel mai an duh thin. A hmei a pain hmeichhiat/mipat lamah an sihhnip duh phian. An hmel duhzawng takin an han mitmei ralh tawh chuan achhia leh atha an dawn chang tawh thin lo. An pan nghal ruak ruak zel mai a ni awm e. An tihsual an hriatchhuah meuh chuan Phengphehlepa khua alo tlai zo tawh thin. A leh pekah fimkhur viau tum mahse a ngai bawkin an awm leh a, a lehpek a ni leh pek thin. Saggittarian ei leh in duh leh mi thinchhe tak an awm fo mai. An hmeichhiate hi an tha duh phian, mikhual leh inleng lo chhawn vel an thiam. A hun tak aia tlai deuh a thiltih an ching ang bawkin tlai khawhnua a in hmuhchhuah an ching. An hriatna a tha phian, an thil hriat tawh leh lehkhabu an chhiar tawh an theihnghilh tawh mai mai ngai lo, hriatrengna tha viau e ti lovin an haihawt duh riau.

Positive Qualities:

1. Thil phal tak

2. Hlauh nei lo

3. Thil ngaizam thei

4. Mi rilru sang

5. Thil chik mi

Negative Qualities:

1. Mahni inring lutuk

2. Thil uluk lo

3. Mi zeizia hre lo

4. Mi mumal lo

5. Chapo

6. At huai ching

Horoscope - Scorpio

 

Scorpio (The Scorpion)

(October 24th to November 22nd)

Hemi huna piangte chhinchhiahna chu Khawmual Kaikuang (Scorpion) a ni. Khawmual kaikuang chu rannung hlauhawm tak, a seh pawh na tak, zan lama eizawng chi a ni. Tur hlauhawm tak a nei a, chu a tur chuan mi a zuk chuan zeng, engmah ti thei lovin an awm thei. Thihpui hial tham a ni. Amaherawhchu, khawmual kaikuang hian mahni inven nan leh ral beih nan lo chuan a hranpa takin mi a zuk ngai lem lo.

Sun sign ring mite chuan Scorpio ho hi an tih ru deuh riau, dik tak chuan zuam sual awl tak an ni reng a, mahse khawmual kaikuang ang bawkin anniho hian mahni inven nan leh hmelmate beih nan chauh lo chuan tur an leklam ngai lo. Mize thup thiam tak leh mahni inthunun thei tak an ni. An mitmeng ngawt pawh hian thil a ti thei hle a, mit lasawn lek lova an melh chuan mi naran chu an buai mup mai a ni. Rilru nen lam an hmu tlang ta mai emaw tihawl tak a ni.

Mahni an inhrechiang a, an tih theih leh theih loh chin an thliar thiam thin. A nihna baka fak chiamin emaw sawichhe bawrh bawrh mah la, engah mah a ngai lovang. Mahni a inhriatchian em avangin fak emaw sawi chhiat emaw in kawng ro a su lo. Scorpion rau rau ah November thla a piang ho hi chu an nghet charh lo deuh. Dan naranin mahni in control thei tak an nih avangin an zah tum pawhin an sen tawn tawn ve lo a, an beng a ling ve vu vu lo. Eng hunah pawh dam thlapin an awm thei tlat. A nui tam vak lo na a, a nuih vek chuan suai a awm tlat thin. Mi tawng zawk zawk lo an ni, engemaw chang chuan phulhlut chang an nei a chutih lai chuan engemaw riau tum an nei a nih duh. Inthup thiam tak an ni tlat. Mi hlauhawm lo leh pawisawilo taka ngai a I inveng manglo a nih chuan I che sual fovang. Khawmual kaikuang kha hre reng rawh.

Mi rilru tlang tak an ni a, thil tihsak turin han ngen la ihe lovin a tihsak nghal mai ang che. A theih zawng a nih chuan, a theih loh erawh chuan a chhang fi thla nghal der ang che. An ngaihdan zawt fo suh hlawhtlin chang nei mahla rilru nat phah hun a awm ang. Mi thlarau nunram lak duh vang ngawtin an rilru lo pui an sawi ngailo, an ngaihdan dik tak an sawi tlang mai thin, a fak che chuan a fak che a ni mai, lawm hle rawh. Thiante tan an rinawm hle, thian chungah hmangaihna sang berin Scorpion hian an thiante an hmangaih, thian tan thih an ngam. An chunga thate an theihnghilh ngai lova, engemaw tal an tihsak ve ngei ngei thin chutiang bawkin vawikhat inchaltauh vaih chuan vawi hnihna chu pumpelh phet I tum ang. Kut thlawn an tuar duh lo, dawih zawk a tan an hreh a, a kaw tawpah pawh mei kawhin tan an khawh thin. Mahse mi inringlo lai leh chaklo zawk Arpa chan lai chuhin an ching hrep ngai lo.

A ta ngei nia a hriat chu a keipui sa hauh hlur thin. Tum bul fak nei lo mahse a remchan dan anga zawi muanga hmasawn chi an ni. An duhna lamah chuan tih theih loh ahleih an nei mang lo, an hlawhtling deuh zel bawk. An tih lamah tawh vek chuan vantlang chunglam an ni deuh zel. Mupui (Eagle) hi an sign a ni ve thova, hei vang hi a ni ang Scorpion ho zingah mi huaisen tak tak an tam riau, hlauh an nei mang lo. Tin, Laiking (Green Lizard) pawh hi an sign a ni tho bawk. Chu mi entir chu, mi tana inhmangzo, phuba la ngailo, Pathianin kan hmelmate chu a la hrem ang chu, ti tlat chi an ni. Arsi chanchin zirmite leh Sun sign zir mite mak tih riau chu Scorpion lo pianchhuah atanga rei vak lo (kum 2/1 chhungin) an chhungkhat laina hnai, tu emaw tal an thi duh, tin, Scorpion thih hlim chhawnah an laina hnaiah nausen a piang duh an ti tlat bawk a ni. Hei hi 95% a dik an ti leh nghal. (rapthlak lam pawh a pawl deuh roh.. I awih lo leh I thu thu..hehe)

Positive Qualities:

1. Mahni inthunun hneh

2. Mahni inringtawk

3. Mi aia sang nih duhna rilru pu

4. Remhria

5. Mi biangbiak thiam

6. Huaisen

7. Mi thunun thei

Negative Qualities:

1. Mahni invoh bik

2. Thikthu chhia

3. Mi chungtlak

4. Verther

5. Lainatna neilo

6. Chapo

7. Mi tawrawt

Horoscope - Libra

Libra (The Scales)

(September 24th to October 23rd)

Libra chhinchhiahna chu ‘Bukna’ a nih avangin Libran te hi thil tha leh chhia khaikhin a, buk tawn thin an ni a. Thian an ngaina hle na a huau huau erawh an lawm vak lo, mi nunnem tak an nih avangin remna palai atan an tha khawp mai. Thusawi rem an thiam ang bawkin thu vaivir pawh an thiam riau. Mi nundam tak an nih avangin remna palai atan an tha. Mi nundam tak an ni na a, thupek ang chi hi chu an pai thei thei der lo. Libran te hi mi rilru chak filawr tak an ni duh khawp mai, kawng leh lamah chuan an chiai awlin, bum pawh an sam lawi si. Tawng duh tak mi thusawi pawh ngaithla peih tak angin awm hle hle thei lo mi nimahsela, a-biling-a-balangin thil an ti ngai lo. Mi tam takte ngaihdan chuan Libran te hi hmangaihawm, hmeltha, duhawm leh hlim thei tak an ni.

Engemaw chenah dik mahse a dik famkim bik lo. An chhinchhiahna bukna a nih avangin duhthusam nun Balance tak an ni chuang lo. Amaherawh chu an nun hi Balance an tum hle. Bukna pawh hi a in Balance hma chuan a inrih chhawk chhen ang hian Librian-te pawh hi an nun in balance hma chuan hlawhtlin leh hlawhchham, sual leh that, thatchhiat leh taihmak, vanneih leh vanduai an chhawk chhen thin. An landan tlangpuiah chuan mi zawiawi leh ngaihno bei tak an ni bawk. Kawng leh lamah chuan mi ninawm, buaina cho chhuak mi, tihmawh tak an ni bawk.

An landan tlangpuiah chuan mi duhawm tak an ni, enthuak chuan an thatna hmuh mai a harsa. An thinrim em em lai pawhin an hmel a lang duhawm thei tlat thin. An aw hian ngaihno a bei riau zel a nia. Sun Sign zingah Libran chauh hi tawngkam dengkhawng tak tak hla thu mawi tak anga sawi thiam an ni. Khawtual nula hmeltha emaw, ramkhat nula hmeltha han tih tur ang chi chu an ni lo nangin Libran ho hi han belhchian hian that rukna tak an neiin ngaihno an bei riau zel. Amaherawhchu, an Mipa te hi Hmeichhia hmel thatin an hmel tha duh riau va, an Hmeichhiate pawh Mipa Hmelthatin an hmeltha thei bawk. An Mipa te hi an nuin, an Hmeichhiate an pa tihna a ni chuang lo.

An nuih hian ‘suai’ an nei a, kan lam hawia an han seih meuh chuan kan tan khawvel hi apar ni mai lovin, kan khu chem chem anga kan khu ral vek dawn emaw tih mai tur a ni thei a nia. An nun a in Balance chinah ngat chuan duhthusam nilovin an aia thlan tur an awm chuang lo ti ila thu kan uar lovang. Pheichham kan man hi a ni ngawt mai. Han kawm chiah hian a tirah chuan tawng an chuhin tawng vena hun pawh I nei lo mai thei mahse, a hnu lawkah I thusawi a ngaithla deuh deuh mai ang. Remna palai atan an tha kan tih tawh kha, a bik takin October thla chhuak phei chuan tharum thawh leh thisen chhuah tih lam hi an duh lova, mitin inngeih dial diala awm hi an duhthusam a ni. Thil inhmeh leh inchawih an ngaihtuah peih hle. Hna thawh lai chuan thawh ngawt ngawt, chawlh vek vek chuan suahdur thlah a, midum chawlh der mai an duh thin. An tih tawh lam chu ti tlur mi an ni a, an taksa chhiatna tur thleng pawhin an tih tawhah chuan an rilru an pe thin. An mize famkim hrelo tan chuan mi thatchhe taka ngaih loh vek pawhin mi taima taka ngaih mai theih an ni. A chhan chu, hna an thawh lai chuan Japanese, an chawlh lai vek chuan Samdala kan tih kha.

Hrechiang hmasa lo chuan thil an ti ngawt ngai lo, an theihtawpin thil an chik hmasa phawt thin. Chuvangin hun pe hmasa lova nawr chuk chuk chi an nilova, tur chi pawh an ni lo. Thil reng reng an tih hmain ngun taka ngaihtuah an duh thin, mi mumal lo tak an nih pawhin mumal lo nih chu an duh bau lo. Amaherawh chu tlang taka an dik lohna hrilh chuan chawp leh chilhin pawm nghal lo mahse a ruk tein an in siam that phah ve thin. Han chhaihkawlh tawh laileng chuan tawrhhlelhawm tak an ni. Mahse mi ancheh leh thinchhe bula awm an ti thei thak lo, tin, a hleihluak a thil tih leh thu uar ang chi an digest thei meuh lo. Ri inchawih, rawng inhmeh, thu leh hla inmil lam an ngaina a. Engemaw kawngah tal an themthiam duh khawp mai. Thil tha, fel leh mawina an ngaina a, in felfai, chaw tuihnai leh rimawite, titi thiam tak thusawi ngaihthlakte leh thawnthu ngaihnawm tak chhiar te hi an duhzawng a ni.

Positive Qualities:

1. Palai thiam

2. Tho thang tha

3. Ngaihno bei

4. Mi tluang leh dik

Negative Qualities:

1. Mi ngaihsam

2. Thu mumal nei lo

3. Mi depde

4. Fing vervek

5. Danglam awl

6. Zakzum

7. Mahni hmasial

Horoscope - Virgo

Virgo (The Virgin)

(August 24th to September 23rd)

Virgo hi ‘Thianghlimna’ (Virginity) tihna a ni. Nulat/Tlangval kawnga Thianghlimna kan tih ang teh tlur hi chu a ni lova. Amaherawhchu Virgoan zingah ‘Senior’ tak tak leh Nupui/Pasal nei lova leng tar thak an awm nual a ni.

Malpui pahniha mu an ni emaw, malpui pali a mu an ni emaw, Virgoan chu hriat an awlsam riau, mi thawmna tak an ni ngai lova, mi tawng cheh leh kam tam an ni ngai lo bawk. Mahni chauh pawh a hlim taka in awm tlei thei chi an ni a, mi thil chik, tul manglo thlenga dilchhut leh duhtui an ni duh khawp mai. Tin, hun hi an hlut a, alo thlawn mai mai a liam tir an duh lo. An Hmeichhiate pawh zawiawi tak, dam dap mai an ni, a chiah chiah fai fel taka ti mi an ni chawk.

Huau-huau leh mipui punkhawm luih luihna ang chi hi Virgoan te tuallen duhna a ni lo. Chu ai chuan hmun fianrial midangte chimbuai phak lohna hmuna awm an thlang zawk, rilru duhaisam vak vak leh boruaka Lal in sak tih ang hian an thinlungah hmun a chang lo. Hetiang mai maiin an ngaihtuahna hmang turin an awlthawng tawk lo. Hun pawh an insiam duh ngai lo. Virgoan te hian dan naran in thil engemaw tal vei an nei duh khawp mai. An rilru hnawhtu harsatna emaw lungkham emaw an nei duh chawk thin, mahse mi hlim thei tak an nih avangin thil vei an nei tih erawh a hriat mai mai theih loh.

A tlangpuiin ngaihnobeina riau an nei a, mi hip theihna tak an nei chawk bawk, an heti chung hian insawiselna tur an hre viau si. Inchei an uluk a, kawrkilh hmaih leh Nectie suih kawih tih ang reng an nei ve ngai lo. An pawnlam landanah mi zawiawi leh mihring tling tak angin lang mahsela, rilru lamah puitlin lohna tak an nei duh riau, an tih tura awm hna an thawk zo meuh lo thin. Amaherawhchu Virgoan te hi mi rinawm, in nghahna tlak tak an ni thung. Leh lamah thung chuan, thil tih hreh leh huphurh deuh an neih changin dam loh der an ching riau, a chang phei chuan anmahni pawhin an damlo tak tak emaw an inti hial thei. An hetih avang hian lemchan hi an pianpui Talent a ni e, an ti hial mai.

An hriselna an ngaipawimawh a, mi nazawng aiin an inbual peih chawk, hriselna chungchangah hi chuan anmahnin ngaihdan an nei a, thatchhiatna hi an ngaithei der lo. Tin, midangte nen an inhambuai duh mang lo, a hmei a pain hmangaihna lakah hian an inveng thiam a, hmangaihna lak dan an thiam, a hmei a pain hmeichhiat mipatna leh hmangaihna hrim hrimah pawh hian an buai khat khawp mai. A hun leh hmun an thliar thiam fo thin.

Zaidam leh nunnem tak nimahse, an thinrim tawh laileng chuan tawrhhlelhawm tak an ni thung. An nun a nem avangin an bula awm a hahdamthlak a, abik takin damlo tan an ngaihawm riau zel, Virgoan Hmeichhia Nurse hnathawkte phei chuan ngainat an hlawhin fak an hlawh viau zel. A nazawngin an eilo nain damdawi an lek lam hle. Amaherawh chu an ei hmain a hnathawh dan leh eng natna atan nge athat tih an hrechiang hmasa kilh kelh phawt thin. Hriselna lam an ngaih pawimawh avangin an zin veivahna reng rengah damdawi engemaw tal an pai ve ngei thin. Thil an chin dawklak tawh chu an sim leh lawk lawk thei tawh ngai lova, khawi hmunah pawh nise an ching zui zel thin.

Mi tanpui an hnial ngai lova, mi tanpui turin an inkau reng thin a ni. Amaherawhchu kutdawh leh dawngdah vanga retheite hi khawngaih avang ngawtin an tanpui ve ngai lo. A thian tha leh laina te tan chuan engmah ui reng an nei lo a thian tan that chhuah a hnial lova, an tawih leh thian thate tan a inphal rai hle thin. Lukhawng nei tur lem lovah sum leh pai an khawhral duh lo. Harsa taka an thawh chhuah sa a nih avangin awlsam taka hmanral mai mai an remti ngai lo a ni. Mi duhtui tak an ni a. Thil an tih tawh chu uluk takin an ti zel. An duhthu a sam hma chuan tam lua awm lovin an ti nawn tluk tluk peih a ni. An tih theih na na na chu thei lo angin an insawi ve ngai lo, an tih theih miah loh pawh a chang chuan ti thei angin an insawi mai zel. Thil dik mang lova tih an duh lova, thil fel mang lo leh dikhlel deuh an ngaizam ve mai mai ngai lo, an rilru a kap run zel, ngawih bopui lovin an sawi tlang nghal mai thin.

Ngawi renga thil ti mawp mawp mi an ni a, tawngka aiin chet dana lantir hi an duhdan a ni. Dik deuh deuh a mi hnial an thiam a. Mahse an hnialdan let der tawh hnu pawh an thawi dam thuai thei. Librian ang deuhin midang famkim lohna hmu thei fu siin an ngum khak an hmu lo tlat thin.

Possitive Qualities:

1. Thil chik mi

2. Awmze nei taka thil ti thin mi

3. Thil chuktuah thiam

4. Mi ngawichawi

5. Thusawi fiah thiam

Negative Qualities:

1. Mi sawisep hmang

2. A hleihluaka mi duhtui

3. Mi chek ngel

4. Mi chapo

5. Mi dang dik lohna hrethei

Horoscope - Leo

Leo (The Lion)

July 24th to August 23rd

July 24th leh August 23rd inkara piangte ‘Sign’ chu Sakeibaknei (Lion) a ni. Chuvangin Leo mizia leh Sakeibaknei nunzia hian inlaichinna thui tak a nei a. Sakeibaknei hi Ramsa zingah chuan Lal anga ngaih a ni ang bawkin Leo ho pawh hi an ‘Royal’ deuh ruih mai a, mizovin a Sailo ngur mai kan tih ang hi an ni mai ang chu.

Midangte chunga leng thawkin an thaw a, an ngeng deuh ngulh thin. An che leh hawiher reng reng pawh hi an induhtawk hmel bik. An tawng ve puat puat duh lova, muang chiang kelh kawlhin thu an sawi thin. An phili chung khat khawp mai, khawi hmunah pawh awm se, mi pawimawh ber (Centre of attraction) nih an duh thin. An beisei anga mitten an ngaih pawimawh loh chuan nuam an ti thei thin lo. Leo ho zingah rual pawllo tak an awm ngailo tluk a ni. Leo ho zingah an Lal puan hlipa, in ngaitlawm taka awm an awm zeuh zeuh a, mahse an rilru chhungril takah chuan an Lal nihna a bo tak tak chuang lo, Leo ngilnei leh zaidam takte pawh hian an chhungkhat leh thiante chunga roreltu nih an tum tlat thin.

A tlangpuiin, Leo ho reng reng hian ‘Thupek” an ngai thei lo, thupe tura piang an nih vang pawh a ni mahna, thunei awm taka midangte thu han pek vel hi nuam an ti a, an hetih vang hi a ni ang Leo ho zingah Educator, Politician, Phychitriat etc. an tam riauna hi. anmahni buaina erawh an ching fel thiam duh lo khawp mai. Dan naranin zah phur tak leh thil ti thei tak an ni viau zel. An beisei anga zahder leh fak an hlawh loh erawh chuan an rilru a hliam thei em em a. An beisei anga han fak chiah erawh chuan an intih tuavawnna leh intih uapna zawng zawng chawp leh chilhin a bo nghal duak thei thung.

Antia lawm, thupui an vai laklawh lai hian zahder tak chungin an kawr hak inhmehzia emaw han hrilh zauh la, an lawm ata-lang hian an thusawi lai pawh a khaihlak vek thei a ni. Rem an hre fu bawk, alo thlawnin tha an seng ve ngai lo, a thau hlawih tur a awm loh chuan thil ho lamah an inham buai ngai lo, rilru luh ngaih khawpa thusawi an thiam a, an hetih vang hian puitham deuh chinah hruaitu nih an tlin riau zel. Mahse mi rilru hneh duh avang ngawtin an ngaihdan lo pui an sawi tlawr ve ngai lo a, thu an pehhel ve hni hne ngai lo.

Nupui/Pasal chungchangah chuan an hma chu an hai kaw thei khawp mai, Leo zingah Senior tak thlenga leng hmuh tur an vang khawp mai. An thu an duh avang hian kawp mil har fu angin lang mahse an cheng hre fuh tan chuan mi tih nuam tak an ni lawi si. Hmangaihna (Love) tello chuan an tan nun hi khuang lova chai ang a ni. Leo zingah Senior tak thlenga malpui pahniha mu I hria a ni thei e, mahse a Luck loh vangah ngai mai suh. Kawplai mek a neih loh vek pawhin nghah lai tal chu a nei ngei ang. An thu duh luat vang leh an chapo luat vanga an Nupui/Pasal te nena inthen hi Leo zingah an tam khawp mai.

Midangte koki nghenga nun hi an duh bau lo, miten an zarzo se tih hi an duhdan a ni. Mi chaklo leh tanpui ngaite an ensan thei lo, mite tanpui hi an tih turah an ngai tlat. Mi tanpuina dil an hreh a, tanpui phei chu duh lo tak an ni. An theih chhung chu mahni kea din an duh thin. Mi rethei, tanpui ngaite tanpui nuam an ti a, an neihin a tlin bak thlengin mite tan an inpe phal thin.

Nuamtawl ngaina mi an ni a, hlimhlawp atan chuan an neih an renlo khawp mai. Mi thiltithei tak nih an chak em em a, thil tam tham deuh pukah va dil la, nei miahlo mahse puk chawp pawhin I mamawh zat chu a pe tho tho ang che. Midangte hmusit nih hi thih hrehin an hreh a, chuvangin mite tanpui thei leh neinung tak ni turin thi leh thau pawlhin hna an thawk thin reng a ni. Thil an tih tawh chu a laklawhah hai mai lovin a tawp an thleng ngei thin. Mi rilru lian leh nghet ngang anni a, ngaihdan an sawhsawn zing zeng ngai lo. Hnathawh lai chuan thawh tawk, chawlh vek erawh chuan thin thi a chawlh an duh thin. Thil pakhat an rilru an pek lai chuan thildang chu an ngaihthah thak a, chuvangin ngaihzawng kawp tih ang vel hi an ti ve lo, thian an nih chuan thih thlengin rinawm, hmelma an nih erawh chuan chin tawk awm lova tuarhlelhawm an ni thung.

Positive Qualities:

1. Mi thil phal

2. Mahni in vawng fel

3. Mi zahawm

4. A tha zawnga thil dawn mi

5. Thothang tha

Negative Qualities:

1. Mi nasa

2. Pawisak nei lo

3. Mi chaldelh

4. Mahni inngaihlu

5. Dawhthei lo

6. Mi chapo

7. Thil tih thut hmang Mi tawrawt leh chapo

Horoscope - Cancer

Cancer (The Crab)

(June 22nd To 23rd July)

Cancer chhinchhiahna chu Chakai (Crab) a ni. Sun Sign zirmite chuan he Chakai man hun tha ber chu zan Thla eng hnuaiah a ni tiin an sawi thin. A chhan chu zan Thla eng hnuaiah hian suangtuahna leh mumang khawvela cheng turin an mizia chikim nen an rawn vak chhuak thin a ni. Thla (moon) nen hian an miziaah inlaichinna thil tam tak a awm nghe nghe a ni. Thla hi ralin, dein, lo bial thin mahse, a danglam tak tak ngailo ang hian, Cancerian te pawh hi mizia mumal lo ang takin lang mahse an danglam tak tak ngai lo. An hlim lai vek vek chuan mi hlim thei tak chauh ni lovin mite chawk hlim thei tak an ni. Cancerian tluka fiamthu ngaina leh lawm hi an tam vak lovang. A tlangpuiin mi nunzawi, zaidam tak an ni, puithu takin awm mahsela chawp leh chilhin an inti nelawm leh mai thei. Leos leh Saggitarian ang teh huamin mipui mitfukna nih chak lo mahse lar an chak tawh laileng chuan mi cheng han hmeh per dan an thiam riau. An rilru chhungrilah ngaihsan leh ngaihsak nih an chak, hmingthanna (fame) hi a hlei a hluakin an um ngai lova, amaherawh chu duh lo hlauh chu an ni ngailo thung. A dik chiah chuan Cancerian te hian han duh hluah hluah leh han chak hluah hluah an nei lo ti ila kan sawi sual lovang.

An rilru a na awl hle a, chutih rualin midangte rilru tihnat leh beidawng let dera siam hi an hreh em em bawk. An lungngaih vek vek chuan lungngai theih tawpin an awm a, an lungngaina tuifinriat mawnga midangte hnim luh ve mai pawh an hnial lo. A chuan chhe zawng a thil dawn mi an ni a, an hlim em em lai pawhin a chhan awm lovin ngui thut an ching thin riau bawk. Cancerian ho zing rau rauah a chuan chhe zawnga thil thlir duh lo mi chu reilo teah mi awhawm tak an ni thei.

A naranin an mittui a tla lova, a tlak tawh vek vek chuan an hlim tawp a nih loh vek pawhin an lungchhe vankai emaw a ni thin. Dimdawi thiam an ngai a, chuti lo chuan an lungchhe thuai mai thin, a nih loh vek pawhin a kal bosan daih ang che. A rilru i tih nat chuan ngawi rengin a kalsan daih ang che, tuma hriatpui lohin a tuar tlawk tlawk mai ang, a chang chuan Scorpian ho angin phuba lak an ching a, mahse a rukte in a ni thin. Cancerian te hian an lungngaih leh beidawnna hnuaiah tanpuitu leh hnemtu an ngai thin. A tlangpuiin phuba la thur thur leh mi thungrul tu tu chi an nilo, vawikhat in inlaichinna i sah chah tawh chuan zawm leh chu thil theih loh tluk a ni tih hre mai rawh.

Cancerian mize dang leh pakhat chu engemaw tumin a chhan hriat lohva bung deuh taka mi chhan hluk emaw, titau niawm taka tum bur an ching thin. An mizia hrelo tan chuan kan chungah an thinrim ta mai emaw tihawl tak a ni, mahse a nilo, hei hi chu an mize pakhat Crabby Spells a ni zawk, a chhan awm lova lungngaih viau te, khawvel leh nun hrim hrim nin hluah hluah chang an nei thin, mahse rei phei chu a awh ngai lo. Thla hi a thim changin I cancerian tawih pawh thimin a nang vel a, dawhthei takin nghak hram hram la, thla a de leh angin a hmel a rawn eng leh mai ang.

Thil suangtuah leh chhui dawn an thiam duh khawp mai. Tin, an hriatrengna a tha duh phian bawk, an Experience an chhawr thiam riau, an hunkal tawh ngun takin an chhutin an buk tawn peih thin. Hmanlai thil an ngaisang a, pi pu te nun leh hmasang nun hian an lung a len riau thin. Hun kal tawh leh nunhlui chhui mi an nih avangin ‘Mental Archealogist’ tih hial an ni. An chengvawng peihin thil tul lo leh hlui tak tak pawh an dah tha reng thin. Thuruk an vawng thei em em a, dawp chhuah a khirh viau bawk. Chakai hian thil a cheh tawh laileng chuan a thlah mai mai duh tawh lova, a bawppui bal hial a ngai thin, chutiang bawkin Cancerian ho pawhin an pawm tawh chuan thian, ngaihdan leh ngaihzawng thlengin an thlah mai mai duh tawh lo, an thihchilh thak duh mai zawk thin a ni. Chik hmasa lo chuan thil reng reng an ti ve ngawt ngawt ngailo thung, lungsi taka a thlan tawh chu sawisel eng ang mah la, I chil I seng thlawn mai a ni ang. Mi an tanpui dawn pawhin beng sikin an inngaihtuah te te thin. Midang tanpuitu an lo awm ve dawn chuan an ral bang hlauh duh thin. A lo thlawna insen hi an duh ve lo. Tui tla chhar ngai pawh awm se, a biling a baling chuan a zuangthla mai lo, hmanrua a hmuh ngang loh chauhin a in hnim huh duh chauh ang. A tawp khawk lovah tha a seng ngai lo. Thil a tih tawh chuan a hnu lamah an tal buai loh nan hnuhma fel tak an nei thlap thin. An hmaa tihtur hmachhawp chu a harsat poh leh chonaah ngaiin an tlanchhiatsan ngai lo.

Positive Qualities:

1. Mi rinawm

2. Mi khawngaihthei

3. In pe zo

4. Mi hneh thei

5. Thil ngaihruat thiam

6. Hriatrengna tha

Negative Qualities:

1. Ngui thei

2. A chhuanchhe zawnga thil dawn mi

3. Rinhlelh hmang

4. Mi phunchiar

5. Tui lai rap

6. Rilru na awl

7. Ngaihdam harsa ti mi Mahni inngaihnuai

Horoscope - Gemini

Gemini (The Twins)

(May 22nd to June 21st)

Gemini chhinchhiahna chu ‘Phir’ (Twins) a ni a, Geminian ho hian mize pahnih an nei a, an mizia mumal tak hriat fak theih a ni mang lo. Geminian ho mizia leh rilru hre tak tak tur chuan chhut thiam fe a ngai thin niin an sawi, an Thawmhnaw, hna, an chenna leh an hmangaihna thleng hian sawh sawnin an thlak zung zung thin a ni.

An leili hi a thain an tawng rang duh khawp mai. Geminian ho hian chanchinbute hi phek hnung lam atanga chhiar an ching riau pek a ni awm e. Geminian, a bul atanga a tawp thleng a chhiar nghal peih an awm mang lo, an awm a nih vek pawhin Sun Sign dang Influence-tu an nei a lo ni thin. A nih loh leh an thlahtute ah Taurian or Capricorn an awm a ni tal ang an ti thin. An thil tihah rei an bur peih lo, an ning zung zung thin. Geminian te hi an thinchhia in an thin a ram tlangpui a, an thinrim hma a mahse an thinrim rei ngai meuh lo. Vawikhat thinlung taka mi huat an neih tawh chuan damchhungin an ngaidam tak tak tawh manglo a ni.

A hmei a pain puithu lutuk leh ngur chuai tak, rilru leh ngaihtuahna hmang vat vat thei lo mi chu Geminian ho hian zu ngaithei hauh lova, a chhan chu anni chuan an thil tih lai leh dinhmun an hrechiang viau zel atin ni. An hrechiang hle a nih lem loh pawhin engemaw chen tal an hre ngei thin. A tih fuh emaw tihpalh emaw a nih loh chuan Geminian te hi hmun pakhatah emaw ngaihdan pakhatah emaw I khengbet thei miah lovang. An fin leh fin loh pawh a hriat tak tak theih loh, an kawlawk khat khawp mai, han in sawiawk dawn mahse an insawi veng leh thuai thei thin. Mi naran bum thei tawk chuan an fing kar deuh zel. An hetih vang hi a nih mahna Geminian ho hian an aia mawl leh hretlem zawkte han tih chiai hi nuam zu ti thei hrep a, an kum aiin an lang naupang tlangpui bawk.

Mi tam takin thil pakhat pawh kan chai tawk laiin Geminian ho hian a rualin thil pahnih tih hi an harsat mang hauh lo. Hnakawp an thiam riau tihna a nih chu. Sava, a thla khirh vek chunga bawm chep taka khung ang main thil tih tur duan lawk thlip thlep zul zuia hnathawh hi Geminian tam tak chuan thawpik thlak an ti thin. A tlangpuiin Geminian ho hian hna hautak deuh thawh an hreh tluk zetin, thil ngai reng an ngai thei lo. A dik chiaha sawi chuan a hun taka thil ti thlip thlep mi chu an ni lo. Typical Geminian chu a tlangpuiin, huntiam aia tlai hreta chet an ching. A chhan chu kawng laka an mit la zawng thil en khawtlai tur emaw, an hmelthriat han biak khawtlai tur emaw an hmu thei em atin ni. Geminian (rilru awm hle hle thei lo) chuan amah chawkphur a, tihlim reng thei thil a nih loh vek pawhin a tihdan thlak zung zung mi an duh thin. Chuti lo chuan an ngui tlawk tlawk thei tlat. Thil engemaw ti tura Geminian in a thlem che a nih chuan a tirah han hnialin han duh lo sa teh mahla, a tawpah chuan I ti tho vang, hnial rual loha mi han thlem leh han tih vel dan an thiam riau alawm, I awih zawng a ni emaw Eskimo (vur rama cheng) meuh pawh Ice Cream lei tir thei khawpin tawngkam an thiam e zuk ti mauh a. A bik takin June thlaa piang Geminian te tan rilru leh ngaihtuahna thup a tul tlat chang a awm. Pisces ho ang maiin an chhungril nundan ang lo taka khawsa tura mawlhtu a awm tlat thin. An hetih vang hi a ni mahna mi le lo tak nia mi tam tak ten an ngaih pawh hi, a tul dan ang azira an insiam danglam theih vang leh mihring inlaichinna kawnga hma anlak thiam em vanga sawi a ni. Sun Sign zir mite chuan Geminian ho hi (Mental Karate) niin an sawi thin. An duh ang hawi zawnga hnathawh kual vel dan chenin an hria a, I rilru ram lak dan chenin an hria a ni. I ngaihtuahna ruhrel indindan chenin kar lovah a chhut chhuak vek thei a. I kuta rul kaw zen dan pawh a hria a ni. An duhna hun leh hmunah chuan eng thilah pawh, tu lakah pawh insawi luh an harsatlo khawp mai a. Tin, Geminian te hian khuanu thilsiam mawna nature an ngaina duh hle bawk.

Geminian tam zawkte hian tawng chikhat aia tam an thiam a, khawvel huap thilah phei chuan French tawng hi an ngainat ber an ti. Engti kawng zawng emaw tak chuan thu leh hla lamah an chungchuang chawk thin. An tawngkam thiam a leiah dawtsawi an chin phah thei a, mi bum ching tak an ni thei bawk. A tlangpui erawh chuan Geminian ho hi mi rinawm tak an ni, an tana pawi tur thleng pawhin an rinawm reng a, thil suangtuah vak vak mi an ni. An suangtuahna khawvel hian ri kham chin a nei lo. Sum, hmingthanna, hausakna, hmangaihna tih angah hian Geminian tan chinlem a awm lo.

Possitive Qualities:

1. Kawm nuam tak

2. Rilru chak

3. Tawngkam thiam

4. Harhvang

5. Phur thei

6. Mi hlimthei

Negative Qualities:

1. Dawh thei lo

2. Rilru hmanhmawh, le lo

3. Mahni hmasial

4. Thudik pehhel ching

5. Mi rinawm lo

Horoscope - Taurus

Taurus (Bull)

(April 21 to May 21)

April ni 21 leh May 20 inkara piangte ‘Sign’ chu Bull (Bawngpa) a ni a, chutiang a nih avang chuan Taurian ho hian thian siam an harsat lova. Tanpui ngai te tanpuitu an ni duh hle bawk. An tum ruhna vang leh an taihmakna avangin an thiltih tumah an hlawhtling fo, an thil tih tumah a chanve in an kalsan ngai lo.

Taurian ho hian thil tul lo sawi leh tih hi an hreh hle thin a, mi tana harsatna siam an hreh hle bawk. An rilrua an thil tum chu an sawh sawn ngai lo tluk a ni. Tin, an thil tih reng rengah an fimkhur hle thin bawk. Thil tul lova Risk lak mai mai an ti ve ngai lo. A tlangpuiin Taurian ho hi zaidam, remna leh muanna duh mi an ni bawk. Experience atanga thil zir hi an ngaisang hle a, mi dang tana mi hnawksak leh buaipui ngai nih hi an hreh hle thin. Taurian ho hi Chhungkua a mi pawimawh leh Hmangaihna ngah berte an ni duh hle.

Taurian ho hi an luhlul a, tin, a rilru ang lo miin a sawi emaw/hrilh emaw pawhin a awih duh lo. An thil tih tur hrilh hi an ngaithei lo hle bawk. Miin an dik lohna an hrilhin, an nihna ngei ngei pawh pawm harsa ti mi an ni. Mi rel nih an duhlo hle bawk. ‘Ngaidam la, theihnghilh rawh’ tih hi an rilrem zawng a ni lem lo. Miin I va Bright lo ve emaw, I va ti mak emaw tih ang chi te hi an haw mai a, dik chiah chuan sawisel an ngai thei lo, Khawvel thil an ngaina hle bawk.

Taurian ho hian Love lam hi an la urhsun thei hle. Tin, an Hmeichhiate hi Hmeichhia hnap mai an ni chawk. Chubakah Sex lamah pawh an Frank hle a, thil a ngial a ngan a sawi chi an ni (an Pasal te hnenah). Hmangaihte bulah thuzep an nei lo, Taurian Mipa te hi a tlangpuiin an kalna lam chu dik ber leh tha berah an ngai tlat thin a, in Chhungkhura nuamsa taka awm hi an ngaisang hle bawk.

Positive Qualities:

1. Dawhtheihna nei.

2 Mi Rinawm.

3. Khawvel thil a mi hausa.

4. Mi tluang.

Negative Qualities:

1. Koham.

2. Mi luhlul.

Horoscope - Aries

Aries (The Ram)

(March 21st to April 20th)

Aries hi Zodiac Sign hmasa ber a nih avangin ‘Birth Sign’ tih a ni. Beram pa (Ram) hi an chhinchhiahna a ni. An mizia hi Nausen nungchang nen inan na tak a awm. Nausenin mahni hmakhua chauh an ngai angin Arien chuan mahni hmakhua chauh an ngai thin. Nausenin an Nu leh Pa leh Thenawmte mutui lai pawh ngaihtuah miah lova zanlaiah pawh a tap rawng rawng ang mai hian Arien chuan a duhzawng neih a tumna kawngah mi mitmei aveng em em lo.

Nausenin duattu leh Hmangaihtu a ngaina ang bawkin Arien pawhin thil tha tihsaktu leh amah Hmangaihtu chu a theihnghilh ngai lova, thil tih sak ve ngei a tum tlat thin.

Nausen hian hlauh an hre meuh lo, Arien te pawh hi an huaisen hle, nausen hian an intih kan hma loh chuan meialh hlauh nachang an hre ngai lova, hlauh chu sawi loh khawih an chak thin. Han intikang tehreng pawh nise, mei kanna hliam a dam rual rualin meialh khawih an tum leh mai thin. Arien pawh chutiangin an hneh loh, anmahni sawisa hrep tawhtu pawh nise, an hliam a dam rual rualin an sual leh ngam nghal mai thin. Nausen hi hlingin chhun mahsela, anuin damdawi a han hnawih a, a han tuam bim bem hnu chuan a tap a bang nghal mai thin ang hian, Arien rilru na pawh hi anmahni lainattu tak tak atawn rual rualin a dam chawpchilh thei mai thin.

Mi rilru tlang tak mai anni a, I hmaa a landan ang ang kha anih dan a ni mai. Mize thup an thiam ve lo. Tin, dawtsawi hi an duh lova, an sawithiam hek lo. Thudik tak sawi mai an duh zawk thin. Mi luhlul leh ngawltawt tak an ni chawk a, neih an tum tawh ngat chu tuma phalloh leh dan rual an nilo, an nei leh nge nge thin. An hlawhchham chian hle pawhin an bei a dawng ve mai mai ngai lo. Rilru thianghlim tak an ni chawk, an thiante pawh tlang takin an kawm a, ngainat an hlawh viau zel, chutiang bawkin thian pawh an ngaina hle. An beisei anga an thianten an lo ngainat loh chuan an rilru a na thei hle thin. A tlangpuiin, mi tuarchhel leh pachang tak an ni. A lang a pauin an mittui a tla lova, Arien mittui tling I hmuh a nih chuan a rilru ana tawpkhawk tih hre mai rawh. Khumbet meuhva an nat tawh chuan ngaihthah mai mai tur a ni lo, an hniam hle a ni tawh thin.

Arien ho reng reng hian midangte aiin thiltitheiah an inruat a, an ti thei chawk bawk. Vawikhat thil antih tawh chuan hlawhtlin ngei tumin an bei thin. Mahni indah pawimawh chi an ni a, mahni inring tawk tak an ni bawk, mi thilphal tak leh ngainatawmtak an ni tlat lawi si. Sum leh hausakna ai mahin hmingthat an thlang zawk thin. Fak leh chawimawi an ngaina a, an beisei bawk. Thinbutut an nei duh riau, awm lo deuh a thinrim thut an hmang thin. Mahse rei an thinrim ngailo thung. A chang phei chuan an thin a rim tih pawh hriat anih hmain an thinrim a reh hman reng thei. An thin a han rim tak tak chinah chuan khua an hmu tawi thei hle a, an duh reng pawh nilovin tawngkam dengkhawng tak tak an chhakchhuak a, mahse menah thlak mai tur, a chhan chu an thinrim a reh rual rualin an inchhir leh nghal mai thin vang a ni.

Mi pawisawi leh mi rilru hliam an hlau a, mi rilru tina nia an inhriat chuan ngaihdam dil an hreh ngai lo. Thu leh hlaa inbakkaih tih lovah chuan hmelma an nei ngai lo. Mi mal chungah phei chuan an thinrim ngailo tih theih a ni.

Mi rel an chinglo khawp mai, mi chu ‘tha’ an tih loh chuan ‘sual’ an ti mai. Pawnlam landan aimahin chhunglam landan an ngai pawimawh a, sum leh pai avangin ngawtin kawppui tur an zawng ve ngai lo. A chipchiar aiin, a tlangpui hriat hi an duh tawk. Mi aia hnuai nih an hreh a, vantlang chung nih an tum ran thin, an rilru leh ngaihtuah dan an sawh sawn zung zung ngai lo.

Possitive Qualities:

1. Mi paukhauh.

2. Ngaihtuahna hmang mi.

3. Mi huaisen.

4. Mi taima/thahrui nei.

Negative Qualities:

1. Dawhthei lo.

2. Rilru letbut.

3. Mahni hmasial.

4. Thikthu chhia.

4. Mahni inngaihlu.

Dik Leh Ril

Millionaire te hi kan nui khat pharh mai. - Dale Carnegie

Nun dan thianghlim hi a langsar ber tur chu a ni. Lawng mite kawng kawhhmuhtu In eng (Lighthouse) te hian thawm an nei hran lo, ngawi rengin an eng mai a ni. - DL Moody

Hmeichhia chuan kum 18 a nih thlengin Nu leh Pa tha a mamawh a. Kum 18-35 inkarah chuan lanmawi a mamawh a. Kum 35-55 inkarah chuan hna tha tak a mamawh leh a. Kum 55 hnu lamah chuan Pawisa chiah a mamawh tawh. - Sophie Tucker

I ngainat leh i huat zawng te hian eng nge i nih a lantir thin.

Mihring len zawng tehna dik tak chu ze nghet tak aneih te, a thil tum san danah te, a khawngaihna phek zau lamah te, a hmangaihnain a thlen theih chinah te a chiang ber a ni - DN Jackson

Kum 20 kan nih lai chuan miin engtin nge min ngaih tih kha kan buaipui em em a. Kum 40 kan nih chuan mi min ngaihdan kan pawisa tawh lova. Kum 60 han tlin meuh chuan miin kan chungchang an ngaihtuah peih reng reng lo tih kan hmuchhuak chauh thin - Jack Falson

Midangte dik lohna kan hmuh ran tluk vek hian hauhsakna hi neih awlsam ta sela chuan mi zawng zawng hi kan hausa vek tawh ang - Apples of Gold

Kan tum ram thlen hi tihpalh thil a ni lova, duhthlanna lam thil a ni zawk. Lo nghah chi a ni lova, hlawhtlinna a ni zawk - William Jennings Bryan

Mihring hi eng tikah nge mithiam (Educated) a nih? Nun dan a thiam a, hmangaihna a hriat a, beiseina a neih a, tawngtai dan leh thih hlauh loh nachang a hriat hunah mi thiam a ni thin. - JF Newton

Hun leh ni inthlak danglamte hian anmahni tawkah lawmna an keng tel thin. - Spanish thufing

I chunga khuanu ruat chu hahdam takin pawm mai la, i chanpual khuanu pek che chu hmangaih la, i thinlung zawng zawngin hmangaih ang che. - Marcus Aurelius

Hmangaihna thawnthu tak tak chu a tawp ngai lo. - Richard Bach

Hmangaihna hna hmasa ber chu ngaihthlak hi a ni. - Paul Tillich

Thawh/thil tih hmaa hlawhtlinna tih thu hmuhna kawng awmchhun chu Dictionary ah chauh a ni. - Vidal Sassoon

Vawikhat nupui pasal neih hi chu kan tih ngei ngei tur kan duty a ni a, vawi hnih neih erawh chu thil atthlak tak a ni a, vawithum nei phei chu atna vang a ni tawh zawk. - Dutch Proverb

Thih hi nun channa nasa tak a ni lo. Kan dam laiin kan chhungril lamah eng thil nge thi a, kan rilru ah eng thil nge kan thih tir zawk tih hi a ni. - Norman Cousins

Rinna hi malsawmna zawng zawng innghahna bul a ni. - Jeremy Taylors

Duh ber neih tluka thil lawmawm leh duh ber chan tluka (vanduai thlak) thil hreawm a awm lo.

Hmangaihna dik chu thil tha nen a kal dun zel. Hmangaihna neih hi finna bul a ni.

Dodal loh hi a ruka in tanpuina chi khat a ni.

Hmangaihna chu a nasat veleh hmangaihna avanga ngaihdamna chu a ropui thin.

Hmangaihte kalsan chu thihna Dar ri ang a ni.

Hmangaihna hi hlimna chabi a ni a, chu hlimna chu dam reina chabi a ni.

Hmangaihna chu ngaihdamna tawp thei lo, dimdawi taka en rengtu a ni. - Peter Ustinov

Pencil

Vawikhat chu Pencil siamtu hian bawma a Pencil siam chu a khung hmain, Pencil hnenah chuan, "Pawn lama ka thawn chhuah hma che a i hriat reng tur thil panga hrilh che ka duh a ni. Ka thu chah, hrilh che chu i vawn tlat chuan Khawvela Pencil tha ber i ni ngei ngei ang, chuvang chuan ka thu chah tur che hi i va vawng reng dawn nia," tiin a han hrilh a.

Thu chu tiang hian a han chah ta a..
A hmasa ber atan chuan, "Thil tam tak i ti thei dawn a, nimahsela miin an hman leh an hum che i inphal phawt a ngai ang" tiin a han hrilh a.

A dawttu atan chuan, "A khat tawkin na em em maiin Chem hriamin an la zum thin ang che a. Mahse Pencil hman tlak i nih theih nan chu chu i tawrh a ngai dawn a ni," tiin a han hrilh leh a.

A dawt leh atan chuan, "Ziah dik loh i neih palh pawn i siam tha leh thei ang," a han ti leh a.

A palina atan chuan ti hian a han hrilh leh a, "Nangmaha pawimawh ber chu i chhunga awm kha a ni reng ang tih i hre tlat dawn a nia," tiin a han chah leh a.

Tichuan a tawp ber na, a pangana atan chuan tiang hian a han hrilh, chah leh a, "I ziahna hmun chu engpawh nise, i hnuhma i hnutchhiah ngei ngei tur a ni. Ziah harsa takte pawh a ni mai thei e, mahse eng thil pawh ni rawh se, i ziak zel tur a ni a, i hman tlak reng tur a ni," tiin.

Tichuan Pencil chu a thawnna tur bawmah chuan a khung tha mawlh mawlh a. A thawnna tur hmun leh khaw lamah chuan a thawn ta a.

Pencil hnena a Pu ina thu a chah, hrilh atang khian eng thil te nge zir chhuah tur i neih le? I han sawi chhin dawn teh ang.

A pakhatna ah chuan, "Thil ropui tak i ti thei a ni tih i inhriat angai a ni. Pathianin a chelh tlat che i in phal phawt a, midang te pawn an chhawr che leh i zar an zo i in phal phawt chuan. I dinhmun lam kha in en suh, eng nge i tih theih tih lam kha in en zawk ang che. Nangmah ah khan eng thil tih theihna nge awm a, Pathianin a dah tih in en zawk ang che,"

A pahnihna ah chuan, "I nun kha eng lai pawn buaina leh harsatna te'n bu khuar tumin an bei reng dawn tih hria ang che. Tu ten emaw an la tina ngei ang a, hliam hun an la nei bawk ang che. Beidawnna te leh Manganna, Lungngaihna te pawh an la siam sak chein i la tawk ve vek dawn a ni tih hria ang che. Mahse, chung Buaina leh Harsatna Beidawnna leh Manganna i nuna an thlen te avang chuan hma lam pan ngam lo leh i hmaa tih tur awm hmachhawn ngam lovin awm ngai suh ang che. Chung Buaina leh Harsatna te avang chuan i nun khan chakna thar a lo neih phahin, Buaina leh Harsatna hmachhawn dan a lo thiam phah dawn a ni tih hria ang che,"

A pathumna ah chuan, "I thil tihna kawng thenkhatah te chuan han tihsual chang leh han tih dik loh chang te i nei ve thin dawn a ni tih hria la. Tumah mi famkim tihsual leh tih dik lo nei thei khawp a mi tha leh famkim an awm si lo a ti raw? Mahse chung i tihsual leh tih dik lohna avang te chuan ti dik lo reng turah leh tisual reng turah in ngai suh la, chung i thil tih dik loh leh tih sual atang te chuan, tisual nawn a, ti sual reng tawh lo turin in zir zawk thin ang che, chu chu a ni hlawhtlinna leh mi ropui nihna chu,"

A palina atan chuan, "Nangmaha pawimawh ber chu, i pawn lam lan dan leh Incheina te, i Make up hman man to zia leh i Lirtheih neih a that a, sum leh pai i ngah a, in leh loh tha tak tak i neih a, thiamna sang tak tak i neih te kha ni lovin i chhungril nun zawk kha a ni fo ang tih hria la. Nun tha tak nei turin in zir thin ang che, pawnlam mawina leh thatna te hi chuan ni reilote bak a daih ngai si lova!"

A tawp ber atan leh a pangana atan chuan, "Khawi hmunah pawh awmin kal la, sulhnu chhia ni lovin sulhnu tha, mite'n nangmah a tha lam kawnga an hriat rengna tur thil hnutchhiah i tum zawk thin tur a ni ang. Eng ang dinhmunah pawh ding ni la, i hmaa tih tur i neih leh i hmachhawp te chu, harsa dawnin khirh viau dawn pawh nise i ti zel tur a ni ang a. I tlanchhiat san ngai tur a ni lovang,"

Nc-a Chinjah
Thu Ngaihnawm Huang
Facebook