Kraws Hlimthla

Khaw pakhatah hian tlangval pakhat, Pathian awm ringlo (Atheist) chhungkua atanga seilian hi a awm a. A naupan tet atangin infiammi tak a ni a, tui hleuh lam a tui hle a. Infiamna chi hrang hrang a khelh thin chu bansan a, tui hleuh lam chu zir zel turin a rilru a insiam fel a, chumi lampang ah chuan nasa takin a beiin hma a la a.

Naupan tet atang ti chho a ni bawk a, a thiam in a thian te zingah chuan a thiam fi lawr lak a. Nasa takin a ti chho zel a, an ram tana Olympic a tel ve chu a thil tum ber a ni.

Pathian awm ringlo ni mahse a thian kawm ngeih ber erawh chu Kristian tha tak mai a ni thung a. An inkawm ngeih em em a, a thianpa chuan Kristianna chungchang leh Isua Krista'n Kross a kan tan a tuar thu te chu a remchan hun apiang hian a hrilh thin a. Mahse chu tlangval chuan engah mah a ngaihsak lova. A naupan lai atanga Pathian awm ringlo chhungkua atanga sei lian a ni bawk a, Pathian leh Isua Krista chungchang leh an chanchin te pawh chu a hrelo ve hle a. Mahse a thianpa in Pathian thu a hrilh lai te chuan tha tak chuan a ngaithla ve tho thin a. A sawi piangin a ngaithla a, mahse engah mah a ngai tak tak chuanglo a ni.

Zankhat chu, chu tlangval chu mi haw tawh hnu vek ah chuan an College a an tui hleuh zirna thin ah chuan a kal a. Light te chu a in off vek a, a thim hle mai a. Thla eng tlem a zawng chuan leihlawn leh an dawhsan te chu a chhun a. Swimming pool tak chu thla eng chuan chhun lo mahse alo kal fo tawh na thin anih avangin amah chauh a han hleuh vel leh han zir chu a chak a, leihlawn ah chuan a han lawn chho a. An dawhsan sang ber a han thleng a, chuta tang chuan zuanthlak tumin a taksa te chu a han sawizawi a.

A zuangthla tur chu dawhsan hmawrah chuan banphar hian a han ding a, chu veleh chuan ama hlimthla thla eng in a chhunna chu bangah chuan ava hmu a, a taksa hlimthla chu Kross ang chiah hian a lo awm a. Chu a hlimthla a han hmu chiah chu amahah mak tak maiin Thlarau Thianghlimin hna a thawk ta a, amah leh amah pawh chuan a in hrethiam lo hle mai a. A thianpa in Isua Krista'n Kross a a tan a tuar sak thu a hrilh thin thu chuan amah chu a deng ta dawt dawt mai a. A tap ta zawih zawih mai a, a thianpa in a sawi thin Isua Krista leh Pathian thu a hrilh thin te chuan amahah kawngro alo su in, hna a lo thawk reng ani tih te a hrechhuak a. A thingthi a, a thiam ang ang in Pathian hnenah chuan a tawngtai a, ngaihdam te a dil a. A nunah Isua Krista chu lut tur ten a sawm ta a.

A thawm chu an College enkawl tu chuan a hriatin an swimming pool awmna ah chuan ava lut a, light chu a han on a. Swimming pool ah chuan tui reng reng hi alo awm lova, an tihfai lai a lo ni a. Chu tlangval chuan swimming pool ruak huau mai a han hmuh chuan a rin thar tak Pathian ngei chuan a awmpui ani tih chiang takin a hre ta a, Pathian chu a thiam ang tawkin a fak a, chuta tang chuan Kristian, mi piangthar tha tak a ni chho ta a ni.

Thil ho te a kan ngaih te hi Pathian hian alo hmang thei hle a. Testimony kan nei a ni emaw, Bible chang kan rilru ah alo awm a ni emaw, Pathian hnathawh keimahni a alo awm anih chuan upbo mai lovin i puangchhuak thin ang u. Kan bula mi te tan leh kan thil post/comment lo chhiar tu te Pathian hnen a hruaithleng tu a ni thei tih hria ila, Pathian hmaah hian thil engmah te lua a awm lova, engkim siamtu hnena mi hruaithleng tur hian engkim hi kan hmang tangkai thei vek a ni.