Isu, Jimmy Ka Nia

Jimmy chu Naupang fel tak mai, a Thinlung zawng zawng a Isua Hmangaih tlat mi a ni a, Biak In a inkhawm te hi nuam a ti hle a. Inkhawm a hun dawn te hian a kal hma berah a tang a, tlar hmasaber-ah a thu ziah thin a ni.

Jimmy hi naupang te a la nih avangin tawngtai dan tur ala thiam lo hle mai a. Biak In a tawngtai rual hun an han hman te hian, "Isu, Jimmy ka nia...Isu, Jimmy ka nia...Isu, Jimmy ka nia," tih ringawt mai hian a tawngtai ve thin a. A tawngtai rei poh leh a tawngtai ring tial tial a, a tawngtai a rin thin tawh em avang chuan midang tawngtai te leh an thusawitupa te tawngtai chu a tibuai lek lek thin a.

Jimmy tawngtai ring thei lutuk, a han au vel thin chu an kohhran member thenkhat te chuan an ning ta hle mai a, an kohhran hruaitute hnenah chuan Jimmy chu engtin emaw a tawngtai ring lutuk chu tireh turin an ngen a. Kohhran a hruaitute te chu an han inhmukhawm a, Jimmy chu a tawngtaina ngai hlir ni lovin thudang chham tawh tura hrilh turin thu an tithlu ta a.

Chawlhni alo thleng a, chawlhni tuk dang ang thovin Jimmy chu hma takah a kal leh a. An thusawitupa tur chu alo awm tawh a, chu pa chuan Jimmy chu an Biak In sir ah chuan a hruai phei a, Jimmy hnenah chuan, "Bawiha, I tawngtai anih pawhin thu pangngai tak i sawi tawh dawn nia... Isu, Jimmy ka nia ti ringawt lovin aw..." tiin a hrilh a.

Tawngtai rual a lo hun leh ta a, an han tawngtai rual a. Jimmy chuan thusawitupa in a hrilh chu a theihnghilh a, "Isu, Jimmy ka nia," tih ringawt chuan ring deuh deuhin a tawngtai leh ta a.

Inkhawm an ban chuan thusawitupa chuan Jimmy chu Biak In sirah a hruai leh a, a hnenah chuan, "Jimmy, i tawngtai dan kha thlak turin ka ti che sia ngatinge i va thlak lo ve... Kan Biak In ami te hian an ning lutuk tawh a. Chuvangin karleh chawlhni atang chuan Biak In ah hian rawn kal rih tawh lo la a tha ang," tiin a hrilh a.

Jimmy chuan thusawitupa in a thil hrilh chu mak a ti hle a, a rilru a na hle bawk a. Mittui tla zawih zawih chung chuan Biak In atang chuan kawngpui lamah a tlanphei a. Chu veleh chuan Motor pakhat hi chak takin a rawn tlan phut a, Jimmy chu a su per ta lawp mai a.

Thusawitupa leh Biak In a mipui la awm te chuan chu thil an hmuh veleh chuan rang takin an tlan phei nghal a, Jimmy chunga an thil sawi leh an lo nin avang chuan an inchhir em em a. Thusawitupa chuan Jimmy taksa kawngpui a mu reng bulah chuan, "Bawiha, i chunga kan thil sawi te avang khan min ngaidam ang che. Engtik lai pawhin he Biak Inah hian i rawn kal thei anga, i duh duh danin i tawngtai dawn nia... Khawngaih takin lo tho leh teh..." tiin rilru na tak chung chuan a sawi a. An thiam ang angin an han bawihsawm a, mahse Jimmy mar phu chu an hmu ta lova, naupang tlawm tak, Pathian hmangaih tak chu thaw tur a awm ta lova. Accident avang chuan a boral ta a ni.

Aw nem tak hian, "Jimmy, Isua Ka Nia" tiin Jimmy chu a lo bia a.