RSVP Hmangchang

IT lam hawi ni lo mahse, Invitation ah RSVP kan dah ve ta fo hlawm bawk a, tlem bihchian țul tihna in mi nawr a, a chiang zawkte chawhphurna atan kan share chawm mai ang e!

Kan society ah chuan, sawmna (invitation) kan semchhuah ah RSVP hi dah ve sa eng ang mah ila, 'response' a let țha mawh hle a. Function inbuatsaihna atan pawh, 'response' behchhana inbuatsaih chi a ni lova, invitation semchhuah zat ațanga in hisap a ngaih phah fo țhin. Chu chuan țul lovah sum a luanral tir țeuh țeuh lawi si. Mahse RSVP hi intih changkanna atana dah mawl tawp chi a ni lova, a dawngtu in a sawmtu a biak letna tur dah tel ngei ngei tur a nih hmel viau..

Entirna atan Lianan RSVP dah tel thlapin inneih sawmna 500 a sem chhuak a. Response 50 a hmu let a. A ruai buatsaih turah response behchhan chi a nih loh avangin invitation based in ruai a buatsaih a. Mi 240 in an kil sak a. Liana chuan a țhiante mawl a tuar tihna a ni.. Țul lovah mi 260 ei tur a siam thlawn duai a, a tan chuan uiawm tham chu a ni ngei ang..

A chunga ka entirna vang hian he thil hi share a țul tihna ka neih phah a, a hre zawkte sawi zawm atan pawh 'RSVP hi' chhawpchhuah hi tih makmawhah ka ruat phah ta a ni. Inti hria leh intifing lamah in lo ngaihkawih loh ka beisei.. Kan society hian awareness kan mamawh em a tin ni..

RSVP Chu:
A sawmtuin a mi sawm hnen ațanga chhanletna a beiseina hi a ni ti ila a fiah mai awm a sin. French ho țawngkam 'répondez s'il vous plaît' tih ațanga lak a ni a, "please response" tihna ang a ni a. RSVP chuang invitation dawngtu chuan chhanlet kha a tih tur a ni a, invitation a dawn ațanga ni 2 chhung ngeia reply tura beisei an ni tih an hre tel tur a ni..

RSVP Chi Hrang Hrang Te:
Tunlai chhanah awlsam kan duh chho tulh tulh a. RSVP ngawt pawh ram changkang te chuan an duh khawp tawh lova, a buai lo tur tihbuai palh an hlau tel bawk nen RSVP dan pawh chi thum laiin an hmang ta niin a lang. Hetiangin:

☀ RSVP: A kal tur leh kal lo tur te thliarfel duh ho chuan RSVP pangngai hi an la hman chhunzawm zel niin a lang.. A kal tur leh kal lo tur list hrana dahin a kal tur zawk milin an inbuatsaih mai țhin..

☀ RSVP, attending only: Mi țhenkhat chuan kal pawh tum hlei lo te tihbuai an hlauh vangin a kal tum te chiah in report turin an ti mai țhin a. A in report zat milin an lo inbuatsaih mai țhin..

☀ RSVP, regrets only: Țhenkhat ve thung chuan a kal thei lo tur ten thuphachawi an duh ringin, a kal lo tur te zawng response an beisei a, invitation semchhuah zat ațangin response an hmuh zat kha an paih a, chuta țanga chhuak zat behchhan chuan an inbuatsaih mai țhin..

Ka sawifiah thiam em ka hre lo.. Sawi tak angin hei hi developed countries lamin an hman dan tlanglawn a ni a. Manner ni bawk si, economy khawih thei thil ni bawk si, keini a rethei zawkte hlei hlei tan hian applicable ni ta se a va duhawm ngai em! Mahse, chu mi tur chuan mipui nawlpuiin a kalphung hi ngaih pawimawh nachang kan hriat a țul bawk si.. Response pawimawh dan hi i inhrilhfiah hlawm zel ang u..

SmartPhone hum vung si hian țhing deuh deuhin kan awm ang tih hi a hlauhawm țhin si a, kan mobile chiah a smart lohna'n, nang leh kei hian kawng tinrenga hmalam pan kan mamawh a sin.

Muankima Khawlhring

Bible Chang Lar Ber

Mi maktaduai 37-ten Internet atanga Bible an chhiar atanga survey an lak a ni,

Topverses.com chuan Bible chang lar dan indawtin a dah a. Bible print a kan hmuh anga Genesis atanga tan lovin a chang lar ber ber te chu zawn awlsawm zawk nan a dah hmasa a. Chang lar 100 atanga chang 87 chu Thuthlung Thar atanga lak a ni.

Bible chang lar ber chu Johana 3:16 a ni a. A dawttu Johana 1:1 aiin a letin mipui chhiar a hlawh a ni. Bible bu then hran zinga lar ber chu Ephesi a ni thung. Bu tawi deuh lam hian chhiar an hlawh deuh niin a lang. Malakia chu Thuthlung Hlui a chhiar hlawh ber a niin, a pumpui thu ah chuan 19-na a ni ve thung. Bible chang lar 10-te chu:

1. Johana 3:16
Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan.

2. Johana 1:1
Atirin Thu a awm, Thu chu Pathian hnenah a awm, Thu chu Pathian a ni.

3. Johana 14:6
Isuan a hnenah, “Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo.

4. Mathaia 28:19
Chutichuan kal ula, hnam tina mi zirtirahte siam ula, Pa leh Fapa leh Thlarau Thianghlim hmingah chuan baptis ula.

5. Rom 3:23
Mi zawng zawngin thil an tisual tawh vek a, Pathian ropuina an chang zo ta lo a ni.

6. Ephesi 2:8
Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni.

7. Genesis 1:1
A tirin Pathianin lei leh van a siam a.

8. Tirhkohte 1:8
Nimahsela Thlarau Thianghlim chu in chunga a lo thlen hunah thiltihtheihna in la nei ang; tichuan Jerusalem khuaah te, Judai leh Samari ram khaw tinah te, kawlkil thleng pawhin ka thuhretute in ni ang,” a ti a.

9. II Timothea 3:16
Pathian Lehkha Thu zawng zawng hi Pathian thawk khuma pek a ni a, zirtir kawngah te, thiam loh chantir kawngah te, zilh kawngah te, felna zirtir kawngah te a sawt bawk a ni.

10. Rom 10:9
“I kain Isua chu Lalpa a ni tih i tan a, Mitthi zing ata Pathianin a kai tho tih i thinlunga i rin chuan chhandamin i awm ang,” tih hi.

Bible bu lar 10-te:

1. Ephesi
2. Jacoba
3. Tita
4. I Johana
5. II Petera
6. Johana
7. Philippi
8. Kolossa
9. Rom
10. I Petera

Bible bung lar 10-te:

1. II Peter 1
2. Sam 1
3. Johana 2
4. Jacoba 4
5. Rom 12
6. Isaia 53
7. Johana 3
8. Rom 1
9. Jacoba 1
10. Tirhkohte 1

ђ๓คг tlคภﻮtє

Sorkar Hna Hi

Sorkar & Sorkar Hna
Vai len hnua Kumpinu hnena kan intukluh atangin, sorkar chu hneh rual loh, dawt kang zawh loh, ngaihtuah phâk loh khawpa tha leh fing, a zar zo nihlawhthlak mai ni lovin, sorkar belh theih phei chu pheichham manna ni chiahah kan ngai a. "Pathian zarah..." ti mai lova, "Pathian leh sorkar zarah," han tih kherte kha kan nu leh pate tawngkauchheh pakhat a lo ni thin. Vawiin thlengin nu leh pa tamtakin, sorkar pachhiatna hi rin ngam har kan la ti. Chu chuan kan fate eizawnna kawng dap thlengin a timuang a, nghah chhuah tur awm si lovin kan fate hi sorkar hna kan nghahtir thuap mai. Hei hian hnam than a tithu. Sorkar leh sorkar hna hi a chhia a ni lo. Rahsi leh MCS inkara mite hian sorkar hna thawh thatzia leh thlamuanthlakzia chu kan hre vek. A thatna lam chu sawi ngai lovin kan hre tawk. Hriat lutuk vanga âtchilhna hian min tibuai zawk. Sorkar kan belh duh dan leh sorkar hna thawh kan tum dan hi mihring min tichangtlunga chhuan chhenfakawma min tât hriamtu aiin chhuan tlarana min chantirtu a ni thei. Thlakhlelh thil pawngpaw neih ngawt hi, a neitu rilru a inpeih loh chuan, piansual phah theih a ni. Chuvangin, sorkar hna thawh chauh hi ngelnghehna awmchhun emaw kan tih loh nan, thangthar ngaihtuahnaah heng thute hi tuh a tul ta. Sorkar hnathawh loh tur tihna ni lovin, sorkar hnathawkte tana fimkhur a tulzia i lo sawi dawn teh ang. Lo thawk ve tawh ka nih avangin "ka" ti-in sawi tum bawk ila.

Mimal nun
Sorkarah chuan mahni sùm tiat hriat a har. Sorkarin hlutna min pek tel miah lo hian, mihring mihrinna hau ringawtah 'engtia hlu nge ka nih' tih hriat hi sorkar hnathawk tan thil harsa tak a ni. Officer ni tlâk khan pension tlengin clerk hna ka thawk thei, clerk atana rin tlak loh khan officer hna ka thawk reng thei bawk. Mahni nihna dik tak aia inngaih-hniam a awl a, nihna phu lova inngaih-ropui a awl bawk. Hlawh phu lo riauva inhre chunga hlawh kham si lova min awmtirtu chu mahni dinhmun dik tak hriat chian thiamlohna hi a ni. Chhungkua, kohhran leh khawtlang kan hmachhawnin, kan awmna hmun leh hun azira mahni nihna dik tak leh sorkarin 'i ni' min tihna dah lansarh thlâkthleng nachang hriat hi thil finthlak tak a ni.

Mi-in changkangah min ngai laklawh tawh si, chhunglama kawrawng chungin pawn lama nihna humhalh a ngai a. Kan inlantir dan hian kan 'class leh standard' a keng tel si a, ti fuh loh laklawh thenkhat hi chuan lemchang chunga pension-in thlan kan thleng dawn a ni. A rukin mahni kan inringhlel a, mahni ber kan inrin ngam loh chuan, chhungrila defense mechanism a lo thangharh a, mahni duapkaina thupna atan rintlak loh dang kan zawng a, midang rel nuam kan ti thin. Kan thawh rei leh mi rel kan thiam a ni mai!

Chhungkua
Office dawhkan thutchilha eizawngte hian office-a kan hnathawk lai hi kan fate entir ila, hahdam riauvin min hre tlat. Sumdawng leh dawrkaite angin kan fate hian min lainat vak lo. Hahdam taka hlawh la nia min hriat chuan min ren lo. Hei hian sum lalûttu zahawmna a tihniam a, chhungkaw rorel leh hmarel a tichingpen. Thenkhat phei chuan, kan office nunphung hi faten an hmu ang tih kan hlau zawk. Min rawn phâwk thut sela, zât sawm lo inchuh ila, computer games lo khel ila, Bible lo chhiar ila, chanchinbu lo bih duai duai ila, engtin nge min ngaih ang?

Chhungte lainat hlawh khawpin kan office hna chu lo hahpui viau pawh ni ila, chhungten min thawhpui thei lo. Chhungkuaa tan tlan theih loh eizawnna a ni. 'Taima taka lehkha zirin, ka pa hna hi thawh chhunzawm ila...' tih theih a ni lo. Eizawnna kawnga chhungkaw tradition siam theih a ni lo va, chhuan khatah chatin bul tan that zel a ngai.

Sorkar tha tel lova thawh hlawhtlin nei lo tan, fate eizawnna kawhhmuh ngam a har. Hei vang hian, sorkar mi fing tak pawh hian fate eizawnna kawhhmuh ngaihna kan hre lo fo. Eizawnna tamzia thiam taka sawi a awl, fate kawhhmuh erawh chu har kan ti tlat.

Hna
Hna reng reng, khawi atanga lokal nge, eng vanga thawh ngai nge, khawiah nge a kal zel dawn, eng nge a nghawng chhuah dawn tih leh, eng nge a hlutna tihte hre miah lova, puten 'Thawk rawh!' an tih vang ringawta ka dawhkana lo thleng chu ka thawk a nih chuan, ka experience rei zawh poh leh ka mawl ang a, ka ning bawk ang. Hlawhtling ngei tur nia ka hriat erawh chu phûr takin ka thawk thung ang. Chutiang kan beisei lai chuan, ramin a chhiatpui tur, pute eirukna remchang tur leh department mualphona tur tih hriat lâwk hnate hi thawh a ngai thin a ni awm e. ‘A tawpna tur hriat hi hriat loh aiin thawh a hrehawm zawk chang a awm’ an la ti deuh deuh. Hei aia hrehawm tur chu mahni aia mawl hnena put-up hi a ni!.

Thiamna lamah hniam zawk, efficiency leh integrity chhe zawk, zu heh zawk, rawn tlak loh zawk, department timawitu aia tihmingchhetu, mahni vengah pawh ar venga kan iai turte thutlûkna nghah a tul changte hi a awm a ni awm e. Tlawm thlâk ve ngaih ngaih tak tur a ni.

Chu thangah chuan sorkar hnathawk tamtak kan âwk. Kan hna thawh thenkhat hi hmasawnna hna a ni lo, invenna hna a ni. Kan thawh hi hna ni lovin, sahimna a ni fo. Kan hnathawh chu ram hmasawnna tur aiin, kan mualpho lohna tur leh kan hmingthatna remchang atana hman kan tum tawh zawk. Ka mualpho dawn ai chuan ramin hma sawn lo mai rawh se. Ka hmingchhiat dawn ai chuan hna chu kal muang mai rawh se.. ti kan awm. A dik em?

Hna thiam fal vanga hah fal hlau kan tam ta. Hna thiam vangin kan kaisang lo va, hlawh a pung lo va, kan hah fal ringawt! Hna thiam ve lo kha hna thiam aia a hahdam phawt chuan, hna thiam châkna leh thiamna hmanga inelna hmachhawn ngamna a bo a, ngaihtuahna a muthlu a, nun a ho a, mihring hlutna a tlahniam thin. Chutiang eizawnaa kum 60 chuang zet thlenga ring han rawlh chu..!

Heng aia la rapthlak zawk chu hna awm lo hi a ni. Chhungkaw chawmtu, in lama zahawm ve tak chu office-ah ka kal ve nitin a. Mahse, hna a awm tlat loh chuan, a hun takah kalin, haw hun nghâkin ka thu nileng ringawt ang. Mahni tawka rintlak inti, hna awm se ram tana thawk thei leh thawh inhuam ve, hetia engmah thawk lova thla tawp hlawh lâk nghâka ka thut hlan hian, khawiah emaw, tute emaw chu mahni kea dinga sumdawngin, chhungkuain an thawk bawrh bawrh niin ka hre lehnghal a. Nilengin, mahni inzahpuiin ka inringhlel ang a, pa tling lo leh hlu lo riauva inhriatna ka nei ang a, ka zak ru tlat ang a, ka chawm chhungkua, ka chenna kohhran leh khawtlang leh, ka hmangaih ram leh hnam lakah ka inthlahrung tial tial dawn a ni. Rilru hah chunga hahchawlh hahthlakzia leh rapthlakzia kan zir mek. Kan la zir zel dawn. Hna nei lovin khawvel a thunun ngai lo va, hna nei lovin zahawmna a nei lo va, hna nei lovin pawimawhna a nei lo. Mizoram pa fing leh fel tak tak, a ruka he Eden natna veitu hi kan va tam sawt em!

Work culture a chhiat lutuk tawh chuan, beidawng takin thuthmunah ka phun lungawi ang. Ram hmasawnna thu han sawi thin mah ila, chhungrilah, mahni inthiamlohna lian tak ka neih loh vêk leh ka ngaih a sam tial tial ang a, nun ka uluk lo tial tial ang. Ram thanmawhbawk hi keimah ka ni tih min hrilh mah se mawhphur phâkah ka inngai lo thuai ang. Hna a tlem miau chuan, chhiatni thatnia office hun chhunga chhuah chu dan bawhchhiatna aiin, mi fel nihna a lo ni ta zawk a. Chutiang lama intheihsiak chu inthlahrun a hnehin kan intihhmuh ta zawk. A chhan dik tak chu hna thawh tur tlem vang a ni.

Hlawh tlem leh hlawh lak tlai te hi chu thil pangngai a ni. Mihring pangngai tan hna nei lo chunga hna thawh hlawh lâk tluka tlawm thlak leh mihring zahawmna tichhe thei thil dang a vâng. Rilru zelthel hi setana pûm a ni tih thufing hi sorkar hnathawkte hian kan tidik mek. Nula leh nu valai, ei tha, awm awl, intuai fai leh inchei nalh, ni tin maia hna thawk si lova an thawhpui tlangval leh paho bula an va tawlh ringawt mai hi - han ngaihtuah teh - mahni venga kohhran hmeichhe hruaitu zinga mi ni ve si khan, crossword a va thai nileng ang a, sorkar hna a thawh tirha tum sâng ve tak khan Internet zahmawh a bih nileng ang a, kohhran rawngbawltu langsar tak khan zat sawm chuh a rawn thiam thar ang a, nula fel tak khan titi bawlhhlawh a dawng nileng kumtluan ang a, tlangval fel khan mi nu khuaikhem dan bâk thiam belh a nei lo vang. Khuanun zah a ngai a, kan inuire sup sup lova a mak ngawt zawk!

Hlawh
Khawvel awmphung leh mihring nunphung kalh zawnga eizawnna ke chheh hian mi dik a tihnual fo. Hna kan thawk ang, thawh tam leh kan hlawh tam ang, thawk lo chuan kan hlawh lo vang. Chu chu leilung awmphung a ni. Sorkarah chuan, mi aiin thawk tam pawh ni ila, kum tluana rui ral ringawt, thla tawpa hlawh la tura lokalte nen kan hlawh zat leh hlutna a inang leh thin. Hah fal leh hahdam fal te, thiam fal leh thiam lo falte hlutna inanga teh hian mi fel a aikhirh thin. A tawpah chuan, thawhpuite zinga mawl ber, thatchhe ber leh rin tlak loh ber chu intehfungah kan lek chhuak a, "Ani pawhin hlawh a la reng tho.." tiin, mifel tluk tum lovin, misual aia kan felna kan chhuang ta mai thin a ni.

Tin, dan bawhchhe lova sum lakluh belhchhahna kawng dang a tlem hle. Thiamna leh taihmaknain a tlin pawhin, chuktuah huan siam bâk tih theih kan nei tlem hle a ni. Sumdawnna dawr hawngin hralhsum thil kan dekchhuak thiang lo va, contract leh supply hna kan thawk thiang lo va, quarry leh sangha dil kan neih pawhin sorkarah chhinchhiahtir thlap a ngai. Chuvangin, dan dik taka hausak tum tan chuan, sorkar hna hi thawh chi a ni lo.

Hun
MCS pakhat a thih khan, MCS dang zawng zawngin Airport-ah a ruang hmuah a nih tur thu puan a ni. An thawhpui an sunna leh an inlungrualzia entirna a ni. Kawng lehlamah chuan, Kan ropuina nia kan ngaih lai tak hi kan mualphona lantirtu a ni thei. An office an chhuahsan avanga ramin a buai phah lohzia a lantir a, an hun hlut lohzia an lantir bawk. Bank Manager ruang hmuak turin transaction hour-ah Bank Manager zawng zawng Airport-ah inkoh khawm theih a ni ang em? Teuh lo.

Heti khawpin lirthei a tâwt a. New Delhi-a km 45 leh Aizawl tlangdung kawngpuia km 5 kalna atana hun kan senral hi a inzat vel a ni. Vei nei lova pawngpaw lirthei tawt siam hi sualna entirna a ni lo va, mawlna entirna a ni. New Delhi lêt riat zetin kan ram hmasawnna a kal muang tih entirna a ni bawk. He mualphona vei ber tur chu khawpuia sorkar hnathawk kan ni. Eizawnna hmun kan thlen hma theih chuan kan hlawh pawh a tam thei tur a ni a, mahse, a huna thlen leh thlen lohin kan hlawh a khawih tlat lo. Chuvangin kan vei lem lo. Hun leh hna leh sum kan la suihzawm mumal lo a ni. Mi ramah chuan, hun hi sum a ni tih thufing hi a dik. Leiah lungphu leh hun a hlu ber. Hmasawnna thilte hi heng pahnih tihlu zualtu an ni deuh vek. Kan sorkar hnathawkte nunah he thu hi a dik hma chuan Aizawl traffic jam hi a reh lo vang. Traffic Jam-ah kan tang a ni satliah lo, hun hlutna hriat mamawh lo sorkar hnathawk rilru tuiek 'jam'-ah kan khawpui hi a tang a ni zawk.

Zalenna
Mi tinin lansarh leh fak hlawh kan duh ru vek. Office-a thawhpuite aia langsar chuan a awhna tur thang a kam tam a ni mai. Sorkarah chuan low profile-a awm thiam a tûl a, 'mi fing' chuan langsar lo thei ang bera hriat hlawh a tum thin. Naran tak chunga hotute hriat hlawh nih a ngai. Ar tial fina fin hi mifel tan hahthlak deuh a ni. Office pawn lama talent larpuitu chu, office lama dawhkan tawmpuitu chuan "Office lamah chuan ho ve tak a ni!" a ti fo mai thei. Pute aia lar phei chu a tha hauh lo. Talent a that leh thawpik a zual.

Mahni thawhna hmuna sorkar kalphung fel lo chu hmuh a awl. Chhung lamah rawtna tha han thlen ila, a sawt loh bakah, thawhpuite hêk kan lo ni palh thei. Pawn lamah ngaihdan tarlang turin kan kut leh kâ phuarin a awm si. Art, literature, science leh academic research lam thilte a nih ngawt loh chuan Sorkar mi naran chuan vantlang hmaah tawngka leh ziaka ngaihdan tarlangin ka chhuah thiang lo. Secretary chinin ama department chungchanga press conference kovin sorkar ai a awh thei chauh a ni. Media lama sorkar hnathawk chanvo chu hniam tak a ni. Chuvangin, Taitea Pa, Mami Nu, Estheri Pu.. tih angrengin, sorkar hnathawkten mahni hming thupa thu ziah kan ching. Mipuiin sorkar hnathawk min entawn a, mahni inthupa ngaihdan puanchhuah chu a changkang emaw an ti ta. Thangtharin intihhmuhin, hming thupa electronic message uchuak thehdarh an uar zui. Democracy hmanga zalenna ram ni chungin, mahni hming tarlang ngam lova thuchhuah tamna ram kan lo ni ta reng mai. Sorkar hnathawkte hian he hnam hi dawihzep culture-ah min hnuk lut mek a ni.

Dawih si, thawpik si chuan eng nge kan tih? Inphenna atana kohhran leh pawl hmangin rawl kan chhuah. Kohhran leh pawla sorkar hnathawk kan inhmanna chhan hi kohhran leh pawl tihchak kan duh vang a ni vek kher lo, thawpika inhriatna lak atanga tlanchhiatna remchang mamawha kan inhriat vang a ni lek thei. Pawl leh kohhran kaltlangin 'civil' lem kan chang thin. Chutia pawl han addict tâk hnuah chuan, eng thil pawh ti dawn ila, pawl tha chakna tel lova hlawhtling thei lova inngaihna kan lo nei zui a. Sorkar chakna leh pawl huvang hmanga inhampuar thiam apiang kan ropui ta mai a ni. Chutiang chelek thiamte chuan kohhran leh khawtlang nunphung te hi kan tichingpen mek a. Pehhel deuh leh inthup deuh chunga mahni intarlanna thu sawi thiamna verther tak chu tuaihnumin pulpit leh khawmpui rorelna hmun thlengin kan la lût a. Rei lotea sawi fel theih hi rei deuh kan sawi phah a. Thu sawi thiam kan tih chu mahni inthup chung leh, tuma pawi sawi lova thu tha deuh, dal deuh, na deuha sawi thiam hi an ni ta mai!

Tichuan, kan that hun chhung zawnga 'thu dik' puang chhuak ngam lova up beh ni tlata kan inhriatna chuan pension min nghahhlehtir a. Pension hun chu 'Phuba lâk' theih hun ang deuhah kan ngai a. Pension huna puan tur tamtak nei teuhin kan inhre ta mai a ni. He thawpikna happening hi thalaiten an hmu a, an ning a, thawpikin an inhria a, an sawi chhuak thiam si lova, "Kan chêp!" an tih phah ta a ni lek awm e.

Zahawmna
Kan tarlan takte khan zahawmna tehfung a tichingpen a ni. A hna zawnga kan sawi chuan, zahawmna chu tha taka tisa leh thlarau hamthatna leh hmasawnna hna thawk tura chakna, theihna leh thiamna-ah a innghat. Thawktu tamzawkin chutianga hming chherna tham hna thawh tur kan neih loh avangin, kan infinfiah thei lo. Mahni eizawnna kaltlanga mahni zahawmna thawk chhuak zo lo mi chu mi vanduai a ni. Mi tinin mahni thiam danin zahawmna kan zawng theuh. Hna hmanga zahawmna hlawhchhuah ka harsat si chuan, hna-ah ni lovin, necktie, lirthei leh peon tih vel hmanga zahawm kan tum ta. Thenkhat erawh chuan kan eizawnna hna kalsanin, kohhranah leh khawtlangah zahawmna kan zawng thung. Sorkara mahni eizawnna-a rawn tlak si loh, kohhran leh khawtlang hruaina lama rawn tlak zawk kan ngah tial tial. Tin, eng ang pawhin han intizahawm dawn mah la, i pu leh i thawhna department a zahawm loh tlat chuan zahawm lo riauvin i inhre ve thuai ang. Chu chu i nupui fanauten an hriat rualin chhungkaw rorel i harsat nghal ang.

Rilru thatchhia
Ngaihtuahna hmang thatchhe mi chu a dawih tial tial thin. A tawpah, "Ni mai mai teh se, mite pawh engmah an nih bik loh hi..." tiin, ka hlawh chiah thlahlelin thla thar ka nghak ang a. Khawl ang maia ngaihtuahna seng miah lovin, "Thawk rawh!" an tih chu ka thawk ringawt ang a, ngaihtuahna hmang mumal lova, "Yes Sir!" ti ringawta ka thatlai hun ka hman liam chuan, pension hnuah rilru sengin ruahmanna thar han siam dawn mah ila, huphurhnain ka khat ang a, thil tha tam deuh hriain, a taka hlenchhuak ngam si lo vin, midang tih atana hlamchhiah ka duh zel ang. Eiruho nunah hian a chiang lehzual. Sum lakluh nan ngaihtuahna leh thahrui an sen tlem avangin an ngurchuai. Hman daihzai leh peipun (invest) an duh lo a ni lo, an ngam lo pawh a ni ber lo, hman daihzai tul an ti lo va, an peih lo va, a ngaihna an hre lo a ni zawk. Ngaihtuahna leh sum hi hman daihzai loh chuan nawmsip awpkeuna buhchium a ni. He rilru thatchhe thangah hian kan officer thenkhatte hi an pension thlengin an âwk. Hah belhchhaha hmasawn ai chuan hahdam taka ngai awh an thlang zawk. Sum peipunga fate tana chhenfakawma chantir tura ngaihtuah peihna an tlachham a, investment lamah chuan, kawng sira kuhva zuar pawh an tluk lo. Chuvangin, an nun hmanga an fate hnena eizawnna kawhhmuh an ngam lo va, an peih lo bawk.

Hmabak leh Pension
Sorkarah hnathawk mimal hlutna hi 20% vel a ni a, a dang 80% hi chu sorkar atanga dawn a ni. Chu chu pawm harsa kan ti takzet a. Pension thlenga harh chhuak zo lote pawh kan awm. Pension hnuah mi zah la hlawh tur leh thil ti thei tak tur niah kan inngai a, vannei leh remhre falte chauh lo chuan an suangtuah ram an thleng ngai lo. Officer langsar ve tak, sorkarin a hlawkpui lem loh, pension dawna harhchhuaka, "Kum hnih khat tal min ruai nawn leh rawh u," tia diltute hi.. i hmusit lovang u, i khawngaih zawk ang u. Mahni sùm tiat hriat loh rei lutuk hi pawi tak a ni.

Sorkar hna hi fate hnena rochun thei tur nia inngai kan la awm bawk. Sorkar tlakranzia hre chiang bertu chu sorkar hnathawkte hi ni tura ngaih kan ni. Mahse, sorkar kan addict laklawh tawh a, sorkar lo chu belh tur leh belh tlâk awmin kan hre lo va, sorkar tel lova dam khaw chhuah theih niah kan ngai tlat lo. Kan faten, "Ka pa, hetia muster roll-a hlawkna awm miah lova mi pension hun nghahchhuahpui ve ringawt ai chuan ka sumdawng mai zawk ang e..." tia min ngen pawhin kan ring ngam tlat lo. Engtikah emaw, engtin emaw, kan fate tan post la ruak dawnin kan hre tlat a, kan pension hnuah pawh kan fate tan la sawisak thei dawnin kan inring tlat bawk. Thiltithei nia kan inhriat rei leh kan fate kan tikhawngaihthlak rei a ni mai.

Heng thute hi...
Sorkar hna a van tak avanga “grep te chu a thur thur nen..” tia sâwt kan ang hle. Mahse kan thlakhlelh tak thil hi min tipangchanga, damchhunga kan mihring hlutna diktak lanchhuahtir thei lotu a ni palh thei. Chuvangin he thuziak hi kan inenfiahna tur a ni.

Sorkar hna kan thawk mek a nih chuan, heng thu dengkhawng takte hi inenfiahna remchangah i hmang ang u. Thatchhiatna aiin taihmakna hi kan tehfung ni sela, depdena aiin rinawmna hi chungnung sela, intlawnna leh vertherna hmanga dinhmun sang hlawhchhuak lovin, kalphung dik leh thiamna zahawm hmanga kaisan ni sela, mi rinawm chhuanawm sela, thawk tam hming tha sela; kan engkim chungah Khuanun ro a rel a ni tih i hre reng ang u.

Vanneihtluanga

Sex Video Leh Kan Nun

"Farnute mualphona nawtreha, chhantu Mizo tlangval kan mamawh ta a nih hi"

Hei hi tunlaia Aizawl tlangvalten an nula ngamtlak an fiamna a ni. Thenkhat chuan, “Sex video star association hi din ila..” tih vel an sawi fiam thin bawk. Kan fiamthu titi hi, “Sex in hmang em?” tih a ni tawh lo va, “In sex hman chu in tlangzarh em?” tih lam a ni ta. Eng kan ti zo ta nge ni le? A chhan leh a chhehvel i lo sawi dawn teh ang.

Engtizia?
Thiamthilin hma a sawn hian, chu hmasawnna mil ve pha lo hnamte tan, hmasawnpui aiin an mualphopui a awl. Silai hi a that zawh poh leh naupang khalhtir a hlauhawm. Video cell phone hi silai mu thun sa ang a ni a, thluak puitling lo chungin kan khal a, saruakin mahni kapkar kan kâp mek a ni. “Keini zawng hremzia reng kan ni. Digital khawvelah hian kan la hnufual em em a, mi hnuchhawn tawh roll film kha kan tlin tawk lek a la ni a, video cell phone nei tlakin kan la changkang lo a ni!” tiin ring takin he rama chengte hi khawvel hriatah kan au mek tihna tluk a ni. Thil tih theih nazawng enchhin vek tum hi naupang chhe thawmhnaw a ni. Chemte hian mahni a invih theih tih kan hre vek, kan invit kher lo. Chutiang chiah chu.

Ziak leh chhiar kan thiam hma daih khan, sapho chu saruak titihin vaukam tiauphovah an lo inpho tawh. Inbualna chu sawi loh, tui in tur pawh tun thlenga inchuh ngai khawpa tui vanna ramah swimsuit hmanga modelling leh miss thlan kan lo entawn te hian a dik lo zawngin thalaite a tihuangtau a ni. Thenkhatin, “Khawchhak (Thai-land, Malaysia, Vietnam…) ah pawh, an culture hlui tlansanin swimsuit an hmang ve tho,” tiin chhuanlam kan siam a. An hnam nuna khawthlang tiaupho culture la lut thei turin tuifinriat tiaupho vaukam zau tak nei ram vek an ni tih kan ngaihtuah duh tlat lo. Hei hi mawlna entirna a ni. Kan ‘show’ tamzawkah ‘talent’ aiin ‘looks’ kan buaipui zawk bawk. Pathian fakna music video-ah lehzel pawh kan fak Pathian ropuina aiin fak hla satu sex appeal lantir tum kan awm. Khawi huangah pawh, chhungril takna aia pawnlang larna ngaihven kan tam. Heng hian heng hi a hring.

Kan nihna hi pawm a ngai.
Sex video hi kan sual thar ta thut tih entirna a ni lo. A reh duak hian kan sim ta tihna a ni hek lo. Kan sual reng a, kan thup sen loh chin hi sex video hmangin kan phawrh tihna lek a ni. Sex video sawi rik a nih veleh hian pa thenkhat chuan pulpit sermonah kan ‘release’ hluai zel. Kan thehdarh lekfang a ni. Zu hi khap mah ila khap loh ang thovin a punlun a ni tih hi huaisen taka pawm a tul. Chutiang chiah chuan, kan saruak thla hi la kher lo mah ila, hnam lepchiah tak kan ni ta tih hi kohhran leh khawtlang hian huaisen takin i pawm ang u. Sual sim tur chuan sualna pawm hmasak phawt a ngai. Sex video hi chhungril natna lanchhuahna mai a ni. A thohtu tihdam tumna awm si lova pan sawisak vak hian a tipun ting mai a ni. Sual sawi hi a nuam. Mahse mahni kan insawi tel zel a ni. Kohhran hruaitu i ni a, in kohhran nula leh tlangval inngai lai video clip i hmu a, kohhran dan hmangin i thunun ngam em? I ngam lo a nih chuan an huaisenna leh i dawihzepna avangin he hnam hi kan mualpho a ni tih i ngaihtuah ngai em?

Sual 1 – Sual 4
Dem tur chuan dem dan dik zir hmasak a ngai. Kawng hrang hrangin i han tehkhin teh ang. Puanzar phena saruaka Lala inbual hian dan a bawh chhe lo va, khawlaia saruaka Lala kal (Sual 1) hian dan a bawhchhia. Eng vangin? Mi dangte nunphung a tihbuai avangin. Sawiseltu awm lo mah se, dan kengkawhtute chuan vantlang hmuh loh turin Lala chu an hruai hrang nghal tur a ni. Puanzar phena saruaka Lala inbual chu vantlang hmuh theih turin Zaran a puanzar lo hlihsak sela (Sual 2), Lala ni lovin Zara zawk chu a sual a ni.

Chutiang chiah chuan, Lala leh Thani'n an pahnih chauha an en tura inlungruala anmahni taksa hmanga an duh dana film an siam hian ram dan a kalh lo. Uire an ni mai thei, inngai an ni mai thei, nupa pawh an ni mai thei. Chu lam chu thu hran a ni. Vantlang zinga a darh chiah hian, a awm lohna turah a awm tak avangin, vantlang nunphung a tibuai a, sual a nih theihna a intan chiah a ni. Sawiseltu awm lo mah se, dan kengkawhtute chuan an ngaihven nghal a tul a ni. Lala leh Thani hian inlungrualin anmahni film hi thehdarh sela, dinhmun inang chiahin dan ngaihah an sual (Sual 1) a ni. Kan ramah thil vang tak a la ni.

Lala chuan ama hmel lang lovin, a kawppui Thani thla la ta sela, a darh loh phawt chuan sual a ni chuang lo. A lo darh ta a. Lala leh Thanite chuan an pahnih chauha en tura inlungruala an siam, Zara'n a thehdarhsak a nih chuan, Lala leh Thani te aiin Zara a sual zawk. Zara sualna hi Sual 2 a ni.

Sual 2 hi kan buaipui nasa hle. Mahse, Thani chuan, “Ka remtihna lohin thla min laksak,” a tih vaih chuan, Zara aiin Lala a sual hmasa zawk (Sual 3) tihna a ni. Mahse, thlalak vek chu Evidence tihnghehna a ni. A thlalak han enin Thani chuan a rem ti lo tih ngaihruat theih a ni em? “Rem ti lo hmel i va pu si lo ve?” tia zawh let theih tur documents Mizoram hian kan kawl tak nual avangin sex video kan ngah ang hu-in FIR a lut tlem ta tlat a ni. Pu KL Liana'n, “Pawngsual tawktu hian amah pawngsualtu hi a bail fo mai a. Chuvangin pawngsual case-a Judgement siam hi thiam har tak a ni!” a tih hi ngaihtuah tham tak a ni.

Mahse, sex video-ah hi chuan a dan a dang deuh. ‘Remti hmel pu’ nazawng hian rem an ti tihna a ni lo. Thehdarh loh tura remtitu chuan thlalakah ‘rem ti lo hmel’ a put a tul lo. Thehdarh tuma thla laksaktu chuan Thani chu a bum tihna a ni. A thehdarhtu Zara chu dan ngaihtuahna atang chuan a sual ber a ni. Mahse, Zara chuan, “Ka thehdarh lo,” a ti thei a, Zara chu kan zinga tu ber hi nge tih kan hmuchhuak zo lo thei bawk. Chutiang a nih chuan, mahni inlantir lova kawppuite hmel lantira puanhnuai thil thla latu, Lala chu rinhlelh number one a ni lo thei lo.

Hei hi a pawimawh leh sawi tul ber chu a ni. Engvangin nge Lala chuan amah lang lova Thani nena an khawsa lai thla chu lak a duh? Eng atan nge a tih? Love play thil satliah a nih chuan sex video mualphothlak tak a ni satliah mai. Blackmail video a nih vaih chuan he Sual 4 hi a runthlakin a tenawm lehzual ta a ni. Nula Thani zawk chuan Pu Lala hmel langin amah nena an khawsa lai thla chu la sela, “Thla tin cheng… min pek loh chuan he video hi i nupui hnenah ka thawn ang,” ti ta se. Lala chuan Thani thla langin video siam se, “Ka duh hun huna mutpui i duh loh veleh he video hi ka thehdarh ang,” emaw, “Ngaihzawng dang i neih vaih chuan…” emaw, “Ka AIDS vei vanga min duh loh vaih chuan…” emaw ti ta se. Tin, Zara chuan fianriala in nupa nunchan thla a la a, “Cheng… min pek loh chuan ka thehdarh dawn…” ti ta se. Hei hi a ni vertherna sual tenawm chu. He ram lo thleng tur, kan pa Diabola ram hi panin, cell phone tumkau kengin Mizote hian phur takin mualphona kawngpui kan zawh mek a ni.

A rapthlak a nia
Mi mawl chu hawihhawm taka zilh theih a ni lo. Dengkhawng taka hrilh loh chuan, a cell phone changkan vang mai maite hian fing emaw a inti tlat. A bikin hmeichhe tan a pawi zual. Chutiang mi mawl i tawn chuan, heti hian hrilh ang che: I chunga thil thleng ni sela, i beih leta i khin nasat zawh poh leh i ‘channa film’ a lar ang. A lar zawh poh leh i mualpho bawk ang. Court-a thiam i channa khan mipui computer files a nawhrehtir thei chuang lo. Nawtreh zo vek thei pawh ni la, i kapkar kha ‘public property’ a ni ta tlat a, ‘mipui mitthla’ i nawhrehsak thei tawh chuang lo. Tin, digital khawvelah kan awm a, digital video clip copy khat a awm hian copy sangkhat a darh nghal angah ngai rawh. I nawtreh zo vek emaw i tih kha a rawn inlar leh thin ang. I zawn nasat zawh poh leh an roh dawn. I hming a thata mi hriat i hlawh rei zawh poh leh ‘i channa film’ chu a dam rei ang. I piangthar a nih pawhin, testimony i sawi zan inkhawm banah i film testimonial zawk kha an release thar leh thin ang. I kalna apiangah i dam chhungin ‘he chhinchhiahna’ hian a zui tawh dawn che.

I kawppui chuan a iai chuang lo che a, in innei a, fa in nei ta. Ngai teh, a awmzia a hriat thiam hma atangin i fa chu an chhaih dawn. I fa chuan i film siam chu a la en dawn… A reh tawh emaw i tih hnuah, i fanu pasal neihna Sawmna Card in han sem ang a, “A nu chu maw… hmana zahmawh film lar deuha mi kha…” an la ti dawn chauh. I sex video minute khat emaw lek hmang hian, nangmah mai ni lovin, i tu leh fate engthawlna tur thlengin i rehhlumsak thei. Inawhhlum pawh a sawt chuang lo. I thlarauvin vanram a kai pawhin i video chuan rinawm takin lei lamah sual rawng a bawl chhunzawm zel ang. Heti khawpa ruh langa kan inhrilh hnu pawha i siam duh talh a nih chuan.. i thu a ni e.

Hmachhawn dan tur.
Mualphote hi tute nge? Zilh loh fa an ni deuh zel ang. Khawlai fa kan ngah ang zelin sex video kan ngah ang. A damdawi chu chhungkuaah a awm tihna a ni. Zahawmna dik hi pain a fapa hnenah a hlan chhawng ang a, nuin a fanu hnenah a hlan chhawng tur a ni. Kristian chhungkaw hlutna kan sawi hian, ni tin chhung inkhawm neiha lungawi ringawt tur a ni lo. Kristian ngaihdan mila nunphung tha inkawhhmuhna kan uar a tul a ni. Tin, sunday school hi an hriat thiam tawk mil zela Pathian ngaiha mihring zahawmna inhrilhfiah theihna hmun remchang tak a ni. Tin, cell phone leh computer zuar leh a chhe siamte mawhphurhna hi a sang hle bawk. An hmuh palh pawha nawtreh zel tur an nih laiin, a semdarhtuah ngaih an ni tlat mai hi a pawi takzet a ni.

Kan za tlat hi!
Hei hi a ni kan hnam nuna tha lo chu. He hnam hian NLUP leh NREGS ai chuan discipline a mamawh zawk. Chatuana nunna ai chuan minute nga hurna mizo sex video clip kan zawng nasa zawk! Thenkhat hi chuan, “Awi! Chutia law…?” tih rual hian, kan ngaihven nghal ruai ruai mai a ni. Hre hnuhnung nih hi bengvar lohna anga ngaih a ni phawt a. La hmu ve lo nih hi mi an lohna a ni leh a, hmuh hnua mi dang entir theih hi mi aia kan advance zia lantirnaah kan ngai a, semdarh thei nih phei chu Lalpa Zanriah sem thei nih ai mahin kan thlahlel ta a ang hle mai. Sex video siam hi insimtir theih a ni lo. Chu ai chuan, he zauthauna zahpuiawm tak hi sim i zir ang u.

Titi a awmin sawi ve suh. Ngawihpui hmiah rawh. Titina hmunah a sawi chhuaktuah tang suh. Neih tum suh. I lo nei a, en loh theih loh a nih pawhin nawtreh nghal rawh. Mi dang phei chu pe suh. Khawtlang hian hetia kan hmachhawn tlat chuan a tlangthang thei miah lo. Tunah hi chuan, demand a sang tlat a, supply loh hi a a har tawh zawk a ni.

Titina thupuia i chantir a, i ngaihhlut miau chuan, i rilru luahtu a lang nghal. I hming bul leh tawpah báwk thluah khawpin title ngah mah la, research leh survey awmze nei ti ni mang si lova, mahni chipuite sex video ngaihvena phili cheng thin mi i nih chuan, educate i ni lo, mi mawl i ni.

Heng thil buaipuia hun leh tha kan sente hi he ram thatna tur hian hmang ni zawk ila, kan thalaiten heng hi buaipui lovin stadium ropui tak takah an thluak leh an thahrui an hmang ang a, a aia ngaihven tur thil pawimawha inhmangin an hmanhlel tawh ang. Thalai hi dem fal suh. Kan inkungkaih kual vek.

I chungah a thleng thei Mualpho hi hmeichhia an ni tlangpui. Chu hmeichhia chu i nupui emaw i farnu emaw a ni thei, i fanu emaw, i laizawn leh i nu emaw pawh a ni thei. Nangmah ngei pawh i ni palh thei. Sex video-a an hmel i hmuh rualin, i thisen zawmpui hnai tak ni palh ta se… tih ngaihtuah chhuak ziah ang che. Chu rilru nena i ena, mi pangngai rilru pu i nih bawk chuan, i ngaihtuahnaah zauthauna aiin khawngaihna a lo piang nghal ang. Mi dang hnena i thehdarh rual chiah hian he hmeichhe thla lak saktu leh thehdarh hmasa bertu sualna tiat chiahin i sual ve nghal a ni tih pawm rawh. Vawi khat delete i hmeh mai hian, mi sang tamtak mithmuha he hmeichhe mualpho tur hi i chhandam thei a, vawi khat i pekchhuah chiah hian, he hmeichhe mualphona hi a let sang tamtaka belhchhahtu i ni thei tih hria ang che. He sex video minute khat lek avang hian i chatuan ram, vanram kawtchhuaha chhan fel sen loh zawhna tawk thei dinhmunah i ding a. I thuin thiam i chang ang a, i thu vekin thiam loh i chang ang. I thu a ni e. En leh thehdarh i châk riau chuan mawngkawhur anga sex pervert i ni tih pawm la, thlarau pastor leh rilru doctor i mamawh a ni.

Thlir dan dang
Hei hi erawh chu theihnghilh loh tur. Mipat hmeichhiatna leh riltamna tluka mihring ngaihtuahna thunun nasa thei hi a tam lo. Saruak tlangzarh ngamna hi kawlhrawnna leh danglamna entina te, intheihsiakna entirna te a ni thei. Dinhmun inangah, sex video ngah hnam apiang an changkang ang! Khasi paho hi a huho pawha Bangkok kal ngam lo an tam mai. Kan hmeichhiate chu a falin Soi Cowboy kawtthlerah zanah an tei nawlh nawlh ngam. Rin aiin sex video hi kan chhuah tlem viau zawk. Eng thu nge kan sawi tak? He hnam hi a insingsa mek. Than kan duh a, mit kan len mek a, he hnam hian ‘engkim’ ti chhin ngam khawpa kawlhrawn kan zir mek a ni. Danglamna entir ngamna hi a tha zawnga chantir theih a ni. Kawng dik kawhhmuhtu neih ruala thla zar nghal turin kan inpeih. Hruaitu tha kan mamawh a ni.

Mahse, kan thalaite beidawng hian, sex hi kan hnam inup leh system chingpen vanga an thawpikna, beidawnna leh an helna thukzia lantirna ‘hmanrua’ atana an hman vaih chuan a rapthlak ngawt ang. Sex hi society elsenna, society laka helna leh phuba lakna entirna ‘thlum’ ber a ni. Kapkar hian ethics a hneh fo. Ka ziah zel chuan… ka kawhhmuh dawn si.

Bei let ang aw
Mizo tlangval dik tak chu thian chhan thih ngam mihuaisen a ni mai lo, nunau leh khawtlang an thlabar laia khaw dai ngula tang ngam, mahni farnute chhan ngam, an khaw nulate mualpho hlauva humhalh a, thlamuan a, zilh ngamtu a ni thin. Vawiinah, sex video-in kan farnute heti khawpa a tihmualpho lai hian, tipunlun lova zahawm taka an thlavang hauhtu leh, i farnute mualphona nawtreha, chhantu Mizo tlangval kan mamawh ta a nih hi. Chutiang thalai huaisen ngei chu he hnam hian a zawng mek a ni.

Vanneihtluanga

Thawnthu Pahnih

Thawnthu Pakhatna
Kum tamtak kaltaah khan, misual pawl hotupa Al Capone-a chu, zu zawrh leh nawhchizawrh leh tualthah hmangin America rama Chicago khawpuiah a inhampuar a. Chicago khaw pumpui chu a thuhnuaiah a dah a titih ta mai a.

Capone-a chuan a aiawha ding thin Ukil thiam hmingthang "Easy Eddie" an tih chu a nei a. Eddie-a finrawl chhuah thiam avangin Al Capone-a chu man hleih theih a ni lo.

A sualna thup saka tanina tang lova siamtu chu Easy Eddie-a a ni tih Capone-a chuan a hria a. Hausakna namen lovin a vur a, sum leh nawmsakna thil tamtak bakah, Chicago kawtthler kawi (block) khat chu a pe tawp mai a ni. Chutah chuan Eddie-a chu nuam lengin a awm a ni ber mai.

Mahse Eddie-a chuan helhkham pakhat a nei a. Capone-a sualna thupsaka Court-a dawt a sawi chhung chuan a fapa chu a duh tinreng neihtir thei mah se, "keimah anga dikna tantu, mi rinawm rawn ni ang che," tia ama nun ngei hmanga nun kawng dik kawhhmuhtu a ni thei ngai dawn lo.

Rei tak a inngaihtuah hnuah tuk khat chu Eddie-a chuan a pawi khawih chu chinfel a duh ta a. Thuneitute hnena kala, Capone-a sualna tarlana, a fapa hmuh lai ngeia dikna tantu nih a tum ta a. A hloh nasat turzia leh ama nunna atana a hlauhawm turzia pawh hre lawk vek chungin thuneitute hnenah thudik a hrilh ta a ni.

Kum khat pawh a ral hmain Chicago kawtthler huaisar taka silai puakrang tlir zawih zawih karah Eddie-a chu thah a ni ta. Mahse a fapa hnenah, dik nia a hriat tana thihpui hial ngam tura inhuamna hlutzia a kawhhmuh hman tlat avangin thlamuang takin mual a liam ta ani.

Police te chuan Eddie-a ipteah chuan tawngtaina thi (rosary) te, Isua khenbeh milem te leh thumawi inziahna lehkha an phawrh a. Chu thumawi chu hei hi a ni.

"Hringnun sana hi vawi khat chiah herh nun a ni a, he sana vir hi engtikah nge a tawp dawn tih tuman an sawi thei lo. Tun chiah hi i hun neih a ni. Thlahlel la, hmangaih la, hlu takin hmang ang che. Sana vir hian tlin loh hun a nei thin tih hre reng la, hunah i rinna nghat suh."

Thawnthu Pahnihna
Indopui pahnihna khan mihuaisen tamtak huaisenzia a finfiah a. Chutian mihuaisen zinga pakhat, Commander Butch O'Hare-a chu, Pacific chhim lama thlawhna phurtu lawngpui Lexington-a Fighter Pilot a ni.

Ni khat chu ral do turin a pawlte (Squadron) chu a thlawhchhuahpui a. A thlawh hnuah a thlawhna tui chu thun khah loh a ni tih a hmuchhuak a. Ral do zawha haw lehna a daih dawn lo a ni. A thlawhchhuahpuite chuan a dinhmun an hriat chuan, an biakhlatna hmangin kir leh mai turin an hrilh a, a kir leh ta a.

Lawngpuia tum tura a let leh lai chuan an lawngpui bei turin Japan thlawhna rualkhat an lo thawk tih a hmu ta a. Bei let turin an Fighter-te chu ral dovin an chhuak vek si a, lawngpui chu Japan tan chuan bel chhunga sa a ni ringawt mai dawn tih a hria a. A Fighter thiante chu ko kir pawh ni se, an lo thlen hmain Japan Fighter-te chuan pawi an khawih hman dawn tih a hre bawk si. A tih theih awmchhun chu, Japan Fighter rual mal beih a ni mai.

Mahni sahim tumna sirah hnawlin, indo Formation-a Japan Fighter lo thlawkte bei turin a bir thla ta veng veng mai a. A thlawhna thla a 50 Caliber puakrang chu a alh ta emaw tih mai tura nasa hian a tlir zawih zawih a. Hmelma thlawhna pakhat a hliam zawhah a dang a bitum nghal zel a. Hmelma thlawhna formation inkarah luhchilhin a silaimu pai a kap ral vek a. Silaimu a neih loh hnuah a hringhrana sut thlak tumin a um leh a. A thlawhna um chu a hnaihchilh lutuk avangin hmelma thlawhnate chuan thiante kah palh an hlau a, an kap ngam lo hial a ni. Chutiang khawpa huaisena a beih avang chuan Japan Fighter rualte chu an let leh ta ringawt mai a. Hetiang khawpa a huaisenzia a lantir ni, 1942 February ni 20-ah hian, Japan Fighter panga lai a tisilawng a ni.

Chumi hnuah thlawhnaa inbeihnaah O'Hare-a chuan kum 22 mi a nihin a nun a hlan zui ta a. A huaisen avangin Indopui II-a US Navy Ace huaisen lawmman dawngtu hmasa ber a ni.

Chutiang khawpa ram chhantu huaisen pasaltha O'Hare-a chu hriatreng a nih theih nan, a pian leh seilenna Chicago khaw mipuite chuan, an thlawhna tumhmun hmingah O'Hare International Airport an tih phah ta a. He tumhmuna i kal chuan, Terminal 1 leh 2 inkarah Butch O'Hare-a hriatrengna lim an siam chu i hmu ang.

Tichuan, heng thawnthu pahnihte hian eng nge inzawmna an neih le?
Butch O'Hare-a hi Easy Eddie-a fapa a ni.

ђ๓คг tlคภﻮtє

Jimmy-a Duhthusam Hnuhnungber

Doctor chu naupang khawngaihthlak tak Jimmy-a room ah chuan ava lut a, Jimmy chu a natna avang chuan thi tep in khumah chuan a mu a. Doctor chuan Jimmy-a chu a dam rei tawh dawnlo tih chiang takin a hria a, a theih ang ang chuan a bawihsawm a. Doctor chuan Jimmy-a chuan na a ti tih chu a hre thei vek a, mahse Jimmy-a chu a nui thei reng mai bawk si a. Doctor chuan mak a ti em em a, a hrethiamlo hle a ni.

Muangchangin Jimmy-a chuan a mit a rawn meng a, Doctor hnenah chuan, “Ka pu, kan awmdan hi inthlak dawn ta ila i duh angem,” a ti a. Doctor chuan Jimmy-a chu chhan ngaihna a hre lova, sawi tur engmah a hre lova, mahse a rilru ah chuan an awmdan inthlak chu a duh lovang tih a rin theih awm e. Jimmy-a chuan tihian Doctor hnenah chuan a sawi leh a, “Ka pu, hun remchang nei pawh ni ila kan awmdan erawh hi chu inthlak ka duhlo a ni,” a ti a.

Jimmy-a chuan Doctor chu ti hian a zawt leh a, “Ka pu, kum engzat nge i nih, thlarau bo pakhat tal i chhahchhuak tawh em?” a ti a. Doctor chu zak takin a kun a, thlarau bo pakhat pawh ala chhanchhuaklo tih chu a hriat theih a. Jimmy-a chuan, “Tunah hian thlarau bo 9 ka chhanchhuak tawh a, mahse ka birthday a ni tawh sia, kum 10 ka tling tawh a, Vanram a ka kal hma hian a dang pakhat han chhahchhuah leh ka duh ngawt mai. Chuan 10 chiah chiah a ni anga, kum 1 ah thlarau bo pakhat zel chhanchhuak ang ka ni dawn a,” a ti a.

Doctor chuan damdawiin chu rilru tawt tak chung chuan a chhuahsan a, mi nunna chhanhim tur a theihtawp alo chhuah thin te a ngaihtuah a, a naupang enkawl in khati tak mai a thlarau bo a vei leh mi thlarau chhanchhuah a duhzia a hriat khan mak a ti hle a.

Zanlai ah Damdawiin atangin phone in an rawn bia a, Jimmy-a dinhmun a chhe tawh hle tih thu an rawn hrilh a. Rang takin Jimmy-a awmna lam pan chuan a tlanchhuak nghal a. Damdawiin a thlen chuan Nurse in kawngkhar bulah alo chang a, Jimmy-a chu an chhan thei talo tih alo hrilh a. Nurse chuan Doctor hnenah chuan, “Jimmy-a khan a thih hma khan ka thianpa Doctor hnenah khan hei hi min lo hrilhsak dawn nia, ‘Hei Vanramah Isua hnen a awm turin ka kal dawn a, midangin a thlarau kha chu chhanchhuak turin lo bei tawh mai rawh se, hun ka nei ta nganglo a ni’ tiin” a ti a.

Doctor chu Jimmy-a ruang an dahna ah chuan ava lut a, a kun a, mittui tla zawih zawih in a tap a, Jimmy-a ruang tlawm tak bulah chuan, “Jimmy, i nun chhanhim nan hian tih theih engmah ka nei ta lo, Nangmah zawk hian ka nunna hi min chhanhim sak a ni. Isua’n i duhna te leh i duhthusam te kha a hre reng a, kei hi i thlaraubo chhanchhuah 10-na ka ni e, tunah chuan Isua Krista chu ka hre ta,” tiin Pathian hnenah Jimmy-a ruang tlawm te hmang chuan a nun a hlan phah ta a ni.

Ema Dûla Ralte

Beisei Nei Tawhlo Chu

Khaw pakhatah hian tlangval pakhat hi a awm a, thian a nei thei reng reng lo a. Achhan chu a mizia an hrechiang a kalsan daih zel vang a ni. Hetiang a miten an rin loh nachhan chu mi lem a chang thin leh mi bum ching a nih vang a ni. Mi tam tak a bumna thin pakhat chu Pastor lem a insiam in a ni a. Thusawi a thiam hle a, mi tam takin tanpuina pe in sum leh pai an pe thin a, chu chu a duh vang a ni. A chang chuan Doctor emaw Ukil ang emaw te in a insawi thin a, mi kawm a thiam si a, an han rin veleh an sum leh pai te chu neihsak a chhuhsak dan a ngaihtuah thin a ni.

Police te chuan man tum thin mahse engtin tin emaw a bi bo hman zel a. Amah la hmelhriat lo tute awm tamna hmun apiang chu a pan a, chutah chuan a thiam ang angin mi a bum kual ta thin a ni. Insiam danglam te a thiam em avang chuan Police te pawh chuan an man theilo hialin a in ngai a, chuvang chuan a thil tih thin chu sim a tum lem lova. Mahse, tum khat chu mi bum a tumna lamah a che sual a, mipui thinrim chuan an um ta chiam mai a, chutah chuan a Lung natna chu a chhuak ta mai a. Chutih lai chuan kum 35 mi chauh a ni a. ICU ah an dah a, a natna chuan ziawm lam a pan lova, Doctor phei chuan ama bul ngeiah a damchhuah a rin loh thu a hrilh hial a. Chu veleh chuan a nun kalta zawng zawng te a mitthla ah a rawn lang a, a hrehawm ti lutuk chu a tap ta vak vak mai a. A naupan laia a nu in Biakin a a peihlo chung chung a hruai thin te, sualna chi hrang hrang laka inven dan a hrilh thin te chu a ngaihtuah chhuak a. Mahse kum 17 mi a nihin a sual em avangin an in a chhuahsan a. Chuta tang chuan sual kawng chu nasa takin a zawh chho ta a. A nu leh pa ten an boral san hnu pawn a thil tih thin chu a sim thei chuang lo a ni.

Chutia dinhmun hrehawm taka a awm lai chuan Doctor chuan Puithiam a hmuh duh leh duhloh zawt a. Mahse chu pa chuan Pathian a rin loh thu leh Pathian a awm a rin loh thu in a chhang a. Chutia thi tep a a awm lai chuan a mitthla ah mi tam tak alo bum tawh te leh mi a lo tihbuai tawh thin te chu an rawn lang chuai chuai mai a. Chutih lai chuan a hmelhriat ngai miahloh mi pakhat hi a bulah chuan a rawn kal a, chupa chuan mi tu emaw in a tanpui theih thu a hrilh a, mahse chu chu amahin a duh chauhin a nih thu a hrilh bawk a. Chutia chau tawh taka a awm lai chuan a bula rawn kal pa in a sawi chuan a beng a verh hle a, hriatchian a duh ta a. Chu pa hnenah chuan amah tanpui thei tu chanchin chu sawi turin a ti ta a. Chu pa chuan amah tanpui turin engtiklai pawh a Isua Krista a awm thu leh Isua'n a tan leh khawvel zawng zawng a mihring te tan a a tawrhna zawng zawng te chu a hrilh ta a. Bible te a chhiarsak a, chumi pah chuan Pathian thu a hrilh mawlh mawlh mai a. Chuta tang chuan damlo pa chuan a nun in Pathian a mamawh tak zet a ni tih chu a hrechhuak ta a. A bula rawn kal pa chu Puithiam alo ni reng a, Doctor in a hriat lovin a lo tir a lo ni a. Chau tawh hle chung chuan Pathian hmangaihna te a hrechhuak ta a, a nun kal tawh zawng zawng te avang chuan Pathian hnenah ngaihdam a dil mawlh mawlh a, Pathian hnenah chuan alo bum tawh leh an pawi a lo sawi tawh zawng zawng te hnenah chuan ngaihdam a dil duh thu a hrilh bawk a. Mahse, a hun tam zawk Setana duhzawngin a awm tih a inhriat chhuah chuan hrehawm a ti hle a.

Puithiam in a chhuahsan hnu chuan damlo pa chu Pathianin a bia a, ngaihdam dilna hun a siamsak tur thu a hrilh a. Chumi ni atang chuan a taksa chaklo tawh tak chuan chak lam a pan a, rinphat bakin a tha chho ta a. Rei lo te hnuah chuan dam tha takin damdawiin chu a chhuahsan ta a.

A theih ang angin mi a lo bum tawh te leh an rilru a lo tihnat sak tawh te chu a zawngchhuak a, ngaihdam a dil ta zel a. Thenkhat chuan mak an lo ti hle a, thenkhat chu an thin alo rim in chutia anmahni ava pan leh te chu an ngaihdan alo nilo hle thung a. Ngaihdam dil chuan a hun chu a hmang chho char char a, kum 3 vel lai chu hmun hrang hrangah zinkual in a sulhnu thalo tak chu timam leh turin nasa takin a bei a. Nikhat chu a nu leh pa thlan ah chuan ava kal a, hrehawm ti tak chung chuan an thlan chungah chuan ngaihdam ava dil a. Chu veleh chuan a Lungna chu a rawn chhuak leh ta phut mai a, a awmna hmunah chuan nikhaw hre lovin a tlu leh ta nghal a. Mi ten an va hmu a, damdawiin ah hmanhmawh takin an phur ta a. Mahse, hemi tum hi chuan a nunna chu an chhan zo ta lo a ni. A nunna chan mahse hrehawm taka chatuan hremhmun lam pan mai tur kha Pathian mi hman te avangin Chatuan nunna nei turin a lei taksa chu a kalsan ta a ni.

Beisei bo tawh hnu pawh Pathian chuan beiseina ala pe thei a, beiseina nei tawhlo khawp in ilo sual pawh a ni thei, mahse chutiang dinhmun a i dinlai pawh chuan Isua Krista'n alo pawm thei che a, Beiseina neilo te tan Isua Krista chu Beiseina petu a ni a, beidawng te tan engtik lai pawhin a awm reng a ni.

Ema Dûla Ralte

Vanram A Hla Lo

A sam chu a nu chuan mawi deuhin a tawnsak a, a kawr zinga a duh ber chu a ha a. Chu kawr a duhna em em pawh a suihna a awm vang a ni. Phur takin a insiam a, vawiin chu an sikulah ‘Pate ni’ (Daddy’s Day) an hmang dawn a, hei vang hian a phur em em mai a. Kal hlan a nghahhlelh viau laiin a nu chuan kal lo mai se a duh a. Pa hruai tur a nei si lo a, naupang dangte chuan an hrethiam ve dawn si lo a, an hmuhsita an nuihzat a hlau a ni.

Mahse, chu hmeichhe naupang chuan kal a tum nghet tlat a. Mi ngaihdan tur a ngaipawimawh duh lo, a hun a thlen chuan a sawi tur a hre lawk vek tlat. Inringtawk mahse a nu chu hlauhthawnna hlirin a la khat thung a. Hetiang hun a hmachhawn tur hi a huphurhpui em mai a, sikula kal ve lo mai tur chuan a ti leh a, mahse a hlawhchham chiang hle.

A fanu chu sikul lam pan chuan a liam ta a, a sikul kalpuite hnena a pa, hmuh theih loh, rawn be ngailo chanchin sawi hun chu a nghakhlel tawh em em mai a. An sikul a thleng a, naupang dangte chu an pate chuan an kalpui hlawm a, thutthlengah chuan an lo thu thup mai a. Naupangho lah chuan nuam an ti a, an phawklek tlang hlawm hle a.

Hun an hmang tan a, zirtirtute chuan naupang chu pakhat te tein an kochhuak a, an pate chu midang hnenah an hmelhriattir a, chumi zawh chuan an pate chanchin an sawi zui zel a.

Naupangho chu a indawtin an rawn ko zel a, phur takin an pate chanchin chu an rawn sawi zel a. A tawpah zirtirtute chuan chu hmeichhe naupang chu an rawn ko ve ta a. A thiante leh an chhungte chuan an en thap mai a. A pa chu an zawng ruai hlawm a.

“Khawiahnge a pa hi a awm ve a?” mipa naupang pakhat hian a rawn ti lang lang a. Naupang dang pakhat chuan, “A nei ve lo aniang,” a lo ti vat a. Tlarhnung atang chuan pa pakhat hian ring deuhin, “A pa hi a laktlak vak loh aniang. Mahni fanute tawiawm nachang pawh hre hlei lo,” a lo ti ve leh bawk a.

Chutianga an tawng vel chu hre vek mahse eng vakah a ngai duh miah lo a, dawhsan lam chu nui sang chung hian a pan phei a, a thiante chu a nuih ver ver mai a.

Dawhsanah chuan a ding a, a kut chu hnunglamah a suih a, mipui chuti zat hmaah chuan ding mahse huphurhna a nei hauh lo a. A insiamrem zawh chuan muangchangin a rawn tawngchhuak ta a.

“Vawiinah ka pa a rawn tel ve thei lo a, mi tam takin a awmna in ngaihven hle tih pawh ka hria a. A rawn tel ve theih loh chhan chu a awmna a hlat em vang a ni a. Ka bula awma, helaia rawn tel ve pawh a chak em em tih ka hria,” a ti phawt a.
“Amah chu hmu lo mah ula, ka pa chanchin hi hrilh ve hrim hrim che u ka duh a. Eng ang takin nge min hmangaih tih hi in hriat ve ka duh a ni.”
“Ka pa hian thawnthu min hrilh te hi nuam a ti em em a, thirsakawr chuan dan te min zirtir a. Rose par sen mawi tak min pe thin a, lehkhachaih chaih dan te min zirtir thin.”
“Ei tur tui tak tak te min leisak thin a, vur te kan eidun thin a. Tunah hian ka pa chu hmu thei lo mah ula, in hmaah hian keimah chauhin ka ding hauh lo ania. Ka pa chu hmun hla takah awm mahse ka kiangah a awm reng thin tih ka hria, amahin min hrilh tawh tlat. Ka thinlungah hian kumkhuain ka pa chu a awm reng ang.”
Chumi a sawi zawh rual chuan a kut te tak te chu a la chho a, a awm zawnah chuan a dah a. A kawr duh ber chhanah chuan a thin phu dup dup chu a hre thei a.

Mipui hnunga ngawi renga ding, a nu mittui chu a far zung zung mai a. A fanu chu chhuang takin a en ngawih ngawih a, a kum phu loin a kamchhuak chu ropui a ti hle a. Hmeichhe naupang chuan a kut chu a la thla leh a, mipui lam chu a en ran mai a. Zawi deuh sap hian thu a sawi zawm leh nghal a.

“Ka pa hi ka hmangaih em em a, ka tan chuan arsi eng ber a ni. Theih se chuan tunah hian ka bulah a rawn ding ngei ang a, mahse vanram chu hmun hla taka awm a ni si a.”
“A chang chuan ka maimitchhing a, ka bulah hian a awm ve niin ka hre thin,” tih pahin a maimitchhing nghal a, a mitthlaah chuan a bula a pa ding chu a hmu zui a.

A nu chuan a bul vela awmte chu a en a, naupang leh puitlingte pawh chu an lo maimitchhing ve vek tih a hmu a, mak a ti em em mai a.

Chulai hmuna awmte rilruah chuan eng nge awm tih leh eng nge an hmuh tih chu tumah an inhriatpui lo. Thawm chu a reh chiang hle a, tumah han che vel pawh an awm lo.

Chutianga a reh thap lai chuan hmeichhe naupang chuan zawite hian, “Ka pa, ka kiangah i awm tih ka hria e,” a rawn tichhuak a.

A hmaa ringhlel leh nuihzat deuha chu hmeichhe naupang lo thlirtute chuan an rilru an thlak chiang hle a. Rinhlelhna emaw, hmuhsitna emaw a awm tawh lo. An zavaia an maimitchhin daih hlawm avangin hmeichhe naupang hmaa dawnkan chunga rose par sen lo awm pawh chu tu dah nge tih sawi thei an awm hauh lo.

Chumi nia kalkhawmte chuan vanram chu hmun hla taka awm a lo nih lohzia an hrechhuak thar chiang hle.

Engtin Nge I Chhan Ve Ang

Khaw pakhatah hian tlangval fel tak mai hi a awm a, an khua mi leh sa te pawhin an zah leh an chhuan em em a ni a. Chutiang khawpa a chhungte pawhin an chhuan chuan an khua a mitdel nula chu a ngaizawng tlat mai a. Chu mitdel nula pawh chuan a duh ve em em a, mahse an khaw mipui te pawh in a an zah em em mai leh tlangvel fel, a ni mitdel lehnghal in a lo ngaihzawn chu thil ni thei niin a hre bawk si lova, a phu lovin a hria a. Mahse, tlangval chuan a duh em avang chuan nula pawh chuan a rilru tak tak chu sawichhuak in, a duh ve thu leh a hmangaih thu te chu a hrilh ve ta a. Chutih rual chuan a mit a del avanga a insit thu leh a phu loh thu pawh chu a hrilh a.

Tlangval chuan chu mitdel nula chu nupui atana a duh thu hial te a hrilh ta a. Mahse, nula chuan a inpeih loh thu leh a mitdel na te chu chhuanlamah a nei a. Tlangval lah chuan nupui atan a sawm tlut tlut mai bawk si a. Nula chuan tlangval hnenah chuan tihian a sawi ta a, "Mi ten an mit min pe hlauh emaw khawvel eng hmu a ka mit a tha hlauh te a nih chuan kan innei dawn nia. Anih loh chuan tun dinhmun ah chuan inneih chu ka ngam lo," a ti a.

Hun te a kal zel a, nakinah chuan vanneihthlak tak mai hian nula chuan mit petu a nei ta hlauh mai a. A lawm em em a, a mit that huna thil thleng tur te a han ngaihtuah a, a hlimin a phur em em a, a mit an thlak hun tur te chu thleng vat vat se tiin duhthu a sam nasa hle a. Hun rei vak lovah chuan a mit thlak hun chu a lo thleng ta a. Doctor te chuan an han zai a, harsatna engmah awm lovin tluang takin a mit chu an thlak zo ta a.

Hun te a inher liam zel a, nula pawh chu a dam chho zel a, khawvel eng chu a hmu ve thei ta a. A lawm em em a, a bialpa chu a hmu chakin inkawm a, a hlim thu te hrilh te a duh a. Nula chuan inhmuhna hmun tur a siam a, chutah chuan alo nghah tur thu chu tlangval hnenah chuan a hrilh a. Nula chu a phur em em a, inhmuhna hmun tur an siamah chuan phur em em mai hian a kal a, alo nghak a. Rei fe a nghah hnu chuan tlangval pakhat hi tiang nen hian a rawn kal a, chu nu chuan a bialpa kha a ni tih reng reng a hre lova. A hmun ava thlen chuan an han inbia a, nula chuan a bialpa ngei a ni tih chu a aw atang chuan a hre ta a. A phu zawk a, mak a ti em em a, a chhan chu a bialpa, alo hmangaih em em thin leh a lo thlak hlelh em em thin kha mitdel a lo ni a.

Tlangval chuan nula hnenah chuan, "Tunah chuan i mit te a var ta bawk a, kan innei thei tawh ang chu tiraw?" tiin a zawt a. Chu veleh nula chuan, "Thianpa, ka lo suangtuah ang leh ka lo beisei ang thil hi a thleng dawn lo tawp mai. Ngatinge i mit a del tih a hma daihin min hrilh loh. Pasal atan mitdel ka duh hleinem!" tiin a chhang a. Chutia a lo hmangaih em em mai in a chutiang a chhang a han hriat chuan tlangval chu a rilru a na em em a, a mittui a tla zawih zawih a, nula hnenah chuan, "E... Chutiang anih chuan kei chuan ka kalsan mai che a ngai anih chu. Tikhan ka mit kha tha takin, duat deuhin lo enkawl dawn nia," tiin rilru na ngawih ngawih in a kalsan ta a.

Kan nu leh pa hmasa te sualna avanga Pathian lak atanga mihrang ni tawh chu Isua Krista avangin Pathian nen kan inzawm leh ta a. Isua Krista chuan amah zui turin min duh em em a, vawi tam tak min sawm thin a. Keini chuan chhuanlam chi hrang hrang siamin leh kan la inpeih loh thu te hmangin kan lo hnar thin a. Kross ler ah khenbeh in a nunna hial kan tan a hlan a, achhan chu chatuan nunna kan neih theih na turin leh chatuana kan mit a lo var theihna turin a ni. Nitin Isua Krista chuan a sawm reng che a, Nula in tlangval rilru na taka a kaltir ang khian i hnawl in i kal tir ve dawn nge, Isua Krista chu i Lal leh Chhandamtu ah pawm in i nun a hnenah i pe dawn? Khawngaihna hun a tawp hma hian Isua Krista in min sawmna hi hnar mai mai lovin i pawmin kan nun te Ama rawng bawl nan i hmangin i hlan thar leh ang u. A ko a che, a sawm reng che.

Èma Dûla Ralte

Kawng Diklo Chu (Thawnthu Tawi)

Mary chuan exam zawh hlan chu a nghakhlel em em mai a, a chhan chu exam chawlh veleh an chhungkua in an thlamah chawlh hmangin an huan leh thlai te enkawl in riah chhuah an tum vang a ni a. An exam tawp ber ni chu thleng har a ti hle a, a tawp a tawpah chuan exam an zawh ni chu a lo thleng a. Exam a zawh veleh chuan hmanhmawh takin in lam panin a tlan haw nghal a.

In lamah chuan a nu chu an thil ken tur te tifel in alo buai hle mai a, a chhan chu a tuk mai ah chuan an chhuah nghal dawn vang a ni a. An chhungkua chu an tam em avang chuan an thawmhnaw ken tur ringawt pawh chu buaipui tham a ni a, Mary chuan a theih ang ang chuan a nu chu a tihpui ve bawk a. An huan chu a hlat angreng avang chuan thil theihnghilh an nei ang tih an hlau ber a ni.

Mary nu leh pa te hi Pathian thu awih tak leh mi piangthar tha tak an ni a. An fate pawh chu nitin hian Pathian thu an hrilh thin a, Isua'n an tana Kross-a a tawrh thu te chu an hrilh nasa thin hle a. Mary te unau pawh chuan an nu leh pa te ah chuan Pathian hmel an hmu in, mite an tanpui thin te chu an hmu fo thin a ni.

An chawlh hmang tur hian Mary Nutei, Ellen chu an sawm ve a. Ellen-i fanu te hi an kal tumna atanga hla vak lovah an awm a, chuvang chuan Ellen-i pawh chuan a fanu te tlawh a remchan em avang chuan chu chawlh an hmang tur chu a phur ve em em a ni.

A tuk alo ni a, zing karah chuan an bungrua te chu Motor ah chuan an han hlang sap sap a. Mary Pa chuan theihnghilh an nei nge neilo te a han enfiah leh phawt a, a fel ta maw tih ah chuan an chhuak ta a ni. Mary te unau chu an phur hle a, an ri deuh chel chul mai a. Mahse, darkar khat vel an tlan hnu chuan an muthlu ta sap sap mai a. Mary Nu leh Pa te pawh chu an mut a chhuak hle tih Ellen-i chuan a hmu thei a. Chu veleh chuan a tangkai theihna anih ringin Mary Pa hnenah chuan Motor chu a khalh chhawk theih thu a va hrilh a, Mary Pa pawh chuan a mut a chhuah em avang chuan Ellen-i chu motor chu a khalh tir ta mai a. Ellen-i hi motor khalh thiam tak a ni a, chumi avang chuan an chhungkua pawh chu thlamuang takin Motor ah chuan a muhil ta thap mai a ni.

Ellen-i chuan chutia a makpa a han chhawk thei mai pawh chu nuam a ti hle a. Zai deuh rut rut chung chuan motor chu a khalh ta zel a. Mahse, Ellen-i hi he an kalkawng tlan mekna ah hian ala kal ngai miah lova. Nakinah chuan kawngpeng thuam pahnih alo awm ta tlat mai a. Khawi zawk nge kalna lam tur a hre lova, a unaunu te chu a han en a, an mutui hlawm bawk sia, a kaitho hreh a. Ama duhthu chuan ding lamah chuan a tlan ta tawp mai a. An tlan zel a, kawng chu an zawh dik ring chuan Ellen-i pawh chuan thlamuang tak chuan a khalh ve zel a. Nakinah chuan Mary Pa muhil chu a rawn harh a, khawi lai nge an thlen tawh tih a han zawt a. Ellen-i chuan an thlen chin a sawi theih mai loh avang chuan Mary Pa ngaih chu a tha lova, motor chu an tiding a. An han enchiang chu an tlanna kawng chu kham chhengchhe takah an lo tlanlut tep tawh alo ni a. Mary pa chuan map chu a han en a, kawng dik lam pan tur chuan darkar tam fe an tlan let leh a ngai tih a han hmuchhuak a. Ellen-i chu a inthiam lo hle mai a, mahse Mary Pa chuan inthiamlohna tur a awmloh thu te a hrilh a, an kalna tur kawng lam pan chuan an let leh ta ngar ngar a ni.

He thawnthu tawp dan hi a ho kan ti maithei a. Mahse, kawng diklo zawh in a kan chunga thil a thlen theih tam tak te min hriat chhuah tir in ka ring ve a. Thufingte 14:12 ah chuan, "Mi ngaiha kawng dik ni awm taka lang A tawp chu thihna kawng ni si a awm," tih kan hmu a. Keimahni in kan han ngaihtuah a, thil dik leh tha niawm taka kan hriat hi kan tan chhiatna thlentu emaw, kan tan a harsatna thlentu an ni thei a ni tih chiang takin he Bible chang hian min kawhhmuh a ni.

Kan nunah hian kawng peng pahnih a awm a, chu chu Vanram kalkawng leh Hremhmun kalkawng te an ni. Isua Krista chuan, "Kei hi kawng leh thutak leh nunna chu ka ni," tiin a sawi a. Isua Krista kawng kan zui chuan, kan thlenna tur chu Pa hnen anih thu Bible ah min hrilh bawk. Kan nun min hruaitu tur atang Pathianin kan nun map min pe a, chu chu kan Bible hi a ni. He kan hringnun map, Bible hian chatuan nunna ah min hruailut thei tih hria in, a hmanna tur dik takah hmangin a hman nachhang hria ila, Vanram ah min hruai thleng dawn a ni.

Khawvel a mihring zawng zawng te tana Kross a khenbeh leh nasa taka sawisak tawk Isua Krista hi i ring ila, i vuan tlat ila, kawng kan bo theihna turah a ni chuan min hruai zel dawn a ni. Isua Krista kan vawn tlat chuan ani chuan Vanram min hruai thleng ngei dawn a ni.

Èma Dûla Ralte

Doctor-ten Damlo Damdawi an chawhna lehkha a an ziah thin thenkhat te:

Doctor ten damlo damdawi an chawhna lehkha a an ziah thin thenkhat te:

☀ For - damlo hming

☀ Rx - take out( lak tur,ei tur)

☀ Sig. -to be taken (ei dan tur)

☀ CC/ML -Cubic centimeter/Milimeter

☀ IV - Intraveneous (thisen zamah)

☀ IM - intra-mascular (tihrawlah)

☀ SC - subcutaneous (vun hnuaiah)

☀ OD- once daily

☀ BID BD- Twice daily ☀ TDS - Three times daily.

☀ QID- Four times daily.

☀ PC- after food

☀ HS - mut dawnah

☀ SOS - a tul em hun apiangin.

☀ Stat- vawikhat pek nghal phawt tur.

☀ LS - local anaesthesis ( a tul laia chiu hih tur)

☀ Tab.- tablet (damdawi mum)

☀ Cap.- capsule (laihren)

☀ NAD - That lohna hmuh anilo.

Jc Khawtei Pachuau
Hriatzauna