Thisen Sang(Hypertension)

Awmtirtu leh invenna
Hypertension tih emaw, BP sang tih emaw hi Thisen dawta Thisen, Lung atanga rawn chhuakin a tawnna kha a ni. Lung atanga a Pump chhuah kha Stytolic Pressure an inthlah dul leh a, Thisen Lunga alo luan khawm leh hun kha Diastolic Pressure a ni. Hei hi Puitlingah chuan a pangngaiah 120/80 a ni a, mahse Mihring azirin leh Mipa leh Hmeichhia ah a inang lo thei.

A chhan leh vang
☀ Essential Hypertension: Hei hi BP san chhan hriat lohte a ni.

☀ Secondary Hypertension: Taksaa natna dang awm vanga BP sangte, Adrenal Gland a bâwk a awm avang te, naupai lai natna (Toxemia of Pregnancy) avang te, Thisen zam lian/zim lutuk avang te a BP sang lo awmte hi a ni.

BP sang avanga natna leh thil thalo thleng theite
BP sang hi enkawl that loh chuan Taksa bung hrang hranah chhiatna a thlen thei a, chuvangin ngaihthah chi a ni lo.

☀ Lung leh Thisen zamah: Lungin nasa lehzuala a thawh a ngaih avangin Lung alo lian a, Thisen a tlachham thei a, Lungphu chawla thih thutna pawh a thlen thei a ni.

☀ Kal (Kydneys) : Kal a Thisen dawt te alo sawng te in alo zim avangin a hnathawh tur ang a thawk thei lova, Kal natna thalo tak a thlen thei.

☀ Thluak leh hriatna thazam : Thluaka Thisen zam te a chatin Thluak chhungah Thisen tling a siam thei. Hei hi a hlauhawm hle a, Thihna a thlen nghal thei. Enkawl hman anih pawhin Piansualna emaw Zenna emaw a thlen thei.

☀ Mit (Eyes): Mit a tichhia in mitdelna a thlen thei bawk.

Taksa peng dangte a khawih pawi hmaa BP sangte awmdan tlangpui te:

☀ Luna (a bikin zing lamah) Chalah a na duh zual.
☀ Luhai.
☀ Hnar thi.
☀ Thawk harsa.
☀ Lungphu rang.
☀ Zun lam fello/Zun thi.
☀ Nikhaw hre lova tluk thut.
☀ Mit khawhmuh chianglo leh Mitdel thut.

Natna dang avanga BP sang ah pawh hetiang hi sawi tur a tam mai.

☀ Kal thatloh avangin - Vung, Kut leh Ke leh Hmaiah.
☀ Cushing Syndrome - Taksa rit leh thau.
☀ Hyper Aldestoronesm - Zawi ngawih ngawih.

BP-a hlauhawm awmte (Ven theih lote):

☀ Kum upat dan azirin BP a sang chho thei.
☀ Inthlahchhawnna atanga BP sang, BP sang Nu leh Pa neite zinga Za a 45 te chu an BP sang ve a hriat a ni.

A lo inven theihte:

1. Primary Prevention:

A nawlpuia mipuite invenna.

☀ Ei leh in ah: Chi al ei tlem, nikhatah Gram 5 aia tam ei loh a tha. Thau leh mawm ei tlem. Zu intam loh. Chakna lam pe theitu chaw ei tam loh leh mamawh aia tam ei loh.

☀ Thau lutuk loh: Thau lutukna lakah inven tur.

☀ Insawizawi: Insawizawi uar tur a ni a, hei hian thau lutuk tur a vengin Taksa a thau a eiral thei a, a tangkai hle.

☀ Nundan phunga fimkhur: Mei zuk loh leh Taksa hah lutuk lova awm tur a ni.

☀ Hriselna kawnga inzirtirna: Mitin in BP san hlauhawm dan leh a vei awlsam dante hriat a, invenna kawnga hmalak.

☀ Mahni invawn fimkhur: BP Check tir nachang hriat tur a ni.

☀ A vei hlauhawma awm bikte: A bikin inentir ngun tur a ni.

2. Secondary Prevention:

Natna neite a hma thei ang bera hmuhchhuah. Thil awlsam tak phei chu a ni lo, a chhan chu natna hi a sawiselna tak nei lovin Taksa a tihchhiat hma chuan rei tak a lo awm thei. Chuvangin a tha berah chuan enkawl zui theihna hmunah chuan a nawlpuia BP Check te pawh a pawimawh hle.

Damdawia enkawl

BP sang damdawi chi hrang hrang a awm a, Doctor rawn lo chuan ei mai mai tur a ni lo. BP 140/90 hg tala tihtlak hniam tur a ni. Duhthusamah phei chuan 120/80 hg ni thei se. A damlo invawnna leh nun dan a pawimawh hle bawk. Doctor thu zawm ngei ngei tur a ni.

Source:- Hriselna, July 2015

ђ๓คг tlคภﻮtє