Hahni Puam

Hahni hi engemaw vangin a puamin a thi duh hle thin. Heng hahni hrisel loh chhan hi chi tam tak a awm a, a tlangpuite chu:

☀ Ha leh Hahni enkawl fai loh vangin.

☀ Hangêt a lo thuk deuhin Hahni a lo hnai chhuak thin.



☀ Damdawi hnathawh vangin, a bikin Phenytoin (Luhaia tlu thin) Damdawi avang hian Hahni a puam vak thei.

☀ Taksa chakloh laiin a lo puam thei bawk. Entir nan, Tleirawl hun lai leh Naupai laite'n a awm duh hle.

☀ Thisen Cancer kan tih mai (Leukemia) avangte leh Hrawk lam natna avangte in Hapui tawp bul vela Hahni te a puam duh hle.

☀ Hahni-ah hian chawr (Tumor) a awm thei bawk.

☀ Ha leh Hahni piansualna avangin Hahni puam reh thei lo a awm thei bawk.

☀ Vitamin 'C' tlakchham vang pawhin Hahni hi a puam thin a ni.

A enkawl dan

A tlangpuiin Hahni puamte hi a nat rei hnuah a awm ber thin a ni. A enkawl dan tlangpui chu hetiang hi a ni:

☀ Ha leh Hahni te tihfai fo tur a ni.

☀ Hanget reng reng hnawh (Filling) vat tur a ni.

☀ Damdawi ei avanga Hahni a puam chuan bansan mai tur a ni a, chutiang Damdawi Phenytoin te i la mamawh a nih pawhin Doctor rawn zel ang che. Tunlaiah Tleirawl ten Khuh Damdawi Ephedrex leh na chhawkna Relipen leh Spasmolar leh eng Damdawi dawi emawte ruih nan an hmang nasa hle. Hengte hi a hlauhawm em em a, Taksa dang - Thluak leh thildangte a tihchhiat dan kan sawi hman lovang a, mahse Ha nghing nasa tak, Ha bal vek theihna hial a awm theih avangin damdawi pawngpaw ei mai mai loh tur a ni.

☀ Naupai laia Hahni thi leh puamte hi Rai vang hrim hrim ni lovin, Ha leh Hahni tunhmaa lo enkawl uluk loh vang a ni ber. Taksa a lo chakloh khan Hahnite a lo puam ta mai thin a ni.

☀ Natna dang (Leukemia) leh Thisen dang that lohna avanga Hahni diklo te hi chu a damna tura pawimawh ber chu heng an natnate hi enkawl dam thuai a ni mai.

☀ Vitamin 'C' tlakchham vang leh Chawtha ei loh vang te a Hahni puam chu ei leh in tihthat bakah thei lam ei tam tur a ni a, Vitamin 'C' nitin 500mg ei thin tur a ni.

☀ Hahni puam leh chawr ruh deuh, thang thei Bâwk a awm chuan Doctor-te zaitir a, Biopsy tih tir tur a ni.

Source:- Hriselna, July 2015

ђ๓คг tlคภﻮtє