Ram a changkang a, khawsak a lo awlsam ta a. Naupangin hmawmsawm an ei nasa tual tual a, Naupang zingah Hanget leh Ha na an tam sawt hle. Primary School Naupang Za zela Sawmriat dawn laiin Hanget an nei a. A nat lem loh chuan an ngaihthah a, a lo nat chhuah meuh chuan tihngaihna dang a awm lo thin.
Nu leh Pa tam tak chuan Naupang Ha hlam chu thlawn mahse a dang a lo to leh mai dawn a, a pawi love tiin an ngai pawimawh lo thin a. Naupangin harsatna chi hrang hrang an tawrh phah thin. Hetiang hian -
☀ A hun hmaa Ha hlam a tlak avangin mi tam takin Ha tak to diklo, mawilo tak tak an neih phah thin.
☀ Thanglai an ni a. Ha hlam hrisel taka awm kim thap hi Naupang Khabe ruh thang mek tan thil pawimawh tak a ni.
☀ Tawng zirlai an ni a. Ha hi tawng tifiahtu pawimawh tak a ni.
☀ Naupang Ha hmai bal chu a thiante zingah a kimki chawk thin.
☀ Naupang Hanget hi a lo nasat chuan harsatna dang a thlen thei a. An thaw rim a chhe theiin thiante zinga awm hrehawm an tih phah thei a. Anmahni ngei pawhin hrehawm an ti fo thin.
☀ Hanget a tira enkawl loh chu a zual zela. Thling a thlen phei chuan a lo na a, Zan mut theih loh phah nan te an hmang thin. Naupang thenkhat phei chu a tira an enkawl loh avangin an Hahni in a chhiat phah a, an Khabe a lo vung vak a, Mit pawh meng tha thei lo khawpin an Hmai a vung hial thin.
Naupang Ha enkawl dan
☀ Mahnia Ha an nawh thiam hma chuan Nu leh Pa in nawh sak thin tur a ni a. An la tet zual lai chuan Toothbrush kher a ngailo. Puan nem fai takin, an chaw ei khamah hruk fai sak thin ila a tawk hle.
Kum hnih an tlin tawh erawh chuan Naupang hman chi Toothbrush lei sakin Ha nawh zirtir a hun tawh a. Puitling Ha nawh rualin nawh tir ila. A khampheia nawt lovin, chung lam - chhuk zawngin, hnuai lam - chho zawngin khuih tur a ni. Chutianga Ha zawng zawng khuih zawhah Lei leh Dang chunglam te khuih fai leh tur a ni.
Hasiai chi hrang hrang a awm a, a enga pawh hi hmang ila a pawi lemlo. Damdawi tel pawh a awm nghe nghe a. Hengte erawh hi chu Doctor rawnlo chuan hman loh tur a ni. Doctor in hmang tura min tih pawhin lem loh tur a ni. A bik takin Flouride damdawi telna Hasiai hi Naupang Hanget vengtu tha tak mai a ni a. Mahse fimkhur tak a hman chi a ni a, Lem hauh loh tur a ni.
☀ Chaw ei khamah Ha nawh tir ziah tur a ni a. Zanriah ei khama Ha an nawh tawh hnuah chuan thil thlum lam ei lo se a tha. A chhan chu Zana kam mutthilh hlan hian Chil a tlem a, ka chhung a intleuh fai muang a, natna hrik tam tak ka chhungah a inthlah pung chak bik a, chung chuan Ha tichhe thei thil thur a siam thin a ni.
Naupang chuan a thil ei zawhah kam thuah zel sela, kam a la thuah thiamlo anih chuan Tuisik thianghlin Fian Hnih/Khat leh intir i la, ka chhung rimchhe turte a veng a, Hanget siamtu thil tam tak pawh a tleng fai dawn a ni.
Thla ruk danah Ha Doctor hnenah entir thin a tha hle. Naupangin Hanget a lo nei anih pawhin phawi kher lovin a tihdam theih a. Thla ruk dana kan entir chuan a nget chhiat lutuk hmain a tihdam theih ang a, Hanget avanga harsatna tam tak a pumpelh thei ang.
Naupang hian an infiamna ah an Hahmai an sawh bal fo thin. A bal veleh a bawlhhlawh lo chuan vuah leh mai tur a ni. Vuah leh theih a nih loh chuan remchang hmasa berah Ha Doctor entir tur a ni.
Tin, Zanah Naupangin Ha na an tuar a damdawi pek mai tur a awmloh changte hian a buaithlak duh hle mai a. Naupang Hanget chu uluk tak, dim te siin tifai la, tui hmuam nuam tawk vela lumin thuahfai la, Lapaw thianghlimin dep hul la, a na zualpui chu a ziaawm thei ang.
Ha enkawl chungchanga pawimawh ber chu ka chhung fai a ni a. Naupangin ka chhung fai tak a neih a, Ha tha tak a neih theih nan Nu leh Paten mawh kan phur hle a ni.
Source:- Hriselna, July 2015. Dr. Lalchhuanawma - Dental Surgeon
ђ๓คг tlคภﻮtє
No comments:
Post a Comment