Pneumonia

Pneumonia hi saptawng ang maiin kan hmang a ni deuh ber tawh awm e. He natna hi kan hre lar hle a, Nu naupawm te phei chuan kan hlauh ber a ni fo thin. Mahse a natna hian mi tam tak a tibuaiin thihna hial a thlen fo thin avangin sawi uar leh sawi nawn fo a tulin kan inven thiam a ngai hle a ni.

Pneumonia hi Chuap natna chi khat, Chuap chhunga tui leh hnai tling avanga khuh leh khawsik leh thawhah lo awm thin a ni. A tlangpuiin chuap lehlam a khawi deuh ber a, a tawn tawna chuap tho lo pawh a awm ve thei bawk.

Pneumonia hi hrik chi hrang hrang Bacteria te, Virus te leh Fungus-ten an thlen thei a ni. A tam zawkte chu hritlang atanga lo intanin ni li ni nga hnuah Pneumonia-ah a lo chang ta thin a ni. Bacteria hrik in Pneumonia a thlen hi a thawk rang hle a. Darkar 2-3 vel lekah khuh na tak, khawsik leh kaih a thlen nghal mai thei a ni.

Hetiang ang chi Pneumonia hi a hlauhawm hle a, Doctor hnena kal vat a Antibiotic Injection pek vat an ngai a ni. A bikin naupangah a awm duh bik a, thihna thlen tam berte zinga mi a ni.

Pneumonia chi dangte erawh chu an thawk muangin a thente chu damdawi vak ngai lovin a dam ve mai thei bawk. A landan tlangpuite chu - taksa nuamlo them thum, khawsik ser ser, chaw ei tuilo leh khuh kherh kherhin an awm thin. Chawlh hahdama taksa tih lum a, thei tui lam in tam chuan kar hnih khatah an dam ve leh mai thin.

Pneumonia hlauhawm tak pakhat awm leh chu Hospital-a an kai Pneumonia hi a ni. Hospital leh a chhehvelah hian damdawiin a thah theih loh hrik te an awm thin a. Chumi hrikin a thlen Pneumonia chu a hlauhawmin tihdam a har bik hle a ni.

Thalai leh tleirawl hrisel tha pangngai tan chuan Pneumonia hi a nep thei hle a, khuh khek khek, hritlang lik lek ang chauhin a lang a. A enkawl nan chawlh hahdam, intih lum leh nachhawkna a tawk mai thin a ni. Amaherawhchu mi chaklo entir nan, upa lam te, naupangte leh nausente tan chuan Pneumonia hi a hlauhawm thei hle a, thihna thlentu a nih fo avangin ngaihthah chi a ni lo. Tin, mei zuk chingte leh ei tha ei phak lote tan pawh Pneumonia hi kai a awl bawk.

Aw le, Pneumonia chanchin tlangpui kan han tarlang ta a. Natna eng pawh mai hi tihdam ai chuan inven a hlawk zawk tih kan sawi fo tawh thin a. Pneumonia hrikte hi boruakah te an leng a, chu bakah kan taksaa awmsa reng, buaina siam lem lo, mahse kan hriselna a lo tlakhniam laia lo taidarh natna thlen thei ta an ni thin.

Chuvangin Pneumonia veilo tur chuan kan invawn that a tul a ni. Entir nan - Taksa vawt lutuka awm te, hah lutuk te, menrei te, meizuk leh zu in te, vaivut khu a awm te hian Pneumonia kai a awlsam a ni. Tin, upa lam te leh nausen te hian natna do theihna an nei tlem bik a, Pneumonia an vei sam bik. Chuvangin khawlai vaivut khu leh taksa vawt lutuk lakah ven an ngai a ni, an awm a nat a, an khua a lo sik chuan Doctor emaw Nurse emaw pan vat a tha zawk fo thin.

Source:- Hriselna July 2015

ђ๓คг tlคภﻮtє