Tarot Cards

Aien na Cards maksak chu
Mizo te hian a ruk tak hian ti lang ngam si lo hian aien lampang hi kan lawm hle mai a, ngaihsakawmlo pui pui a lang, kohhran a inhmang tak tak pawh hian kut zia an entir ve leh nawlh nawlh thin a mak ve tak chu a ni.

Hetiang anga aien nana hmanraw pakhat lar tak mai chu Tarot Cards an tih hi a ni a. Tarot Cards hi Mizo te hian kan hmelhriat lo hle mai a, card a aien kan tih pawh hian playing card pangngai hi kan hmang tlangpui thin. Tarot Cards hi ka zir ve chiam tawh a, a cards te pawh hi ka chah a, ka lo hmang ve reng tawh thin a. Aien a thatlohna tih lampang tuntum chu rawn sawi ka tumlova, hriatna ti zau atan Tarot Cards/Tarot Readings chungchang hi ka hriat ang ang rawn phawrh chhuah ve ka tum dawn ani.

A hmasain Tarot Cards rawn tobul tak hi hriat chian a ni lova, tin, a hming hi eng atanga lak nge tih pawh hi hriat ani hek lo. Hriat theih chinah chuan kum zabi 14 na lai vel khan Europe ram velah a rawn lar tan a. Arab ho te leh Gypsies ho te kha a ching chhuaktu te anga sawina a awm ve ve a ni. A tirah chuan inkhelhna chikhat anga hman a ni a, mahse hun a lo kal zel a, mihring nun nen inzawmna nei tlat in an hre chho ta a. 1781 kum khan mithiam pakhat Antonie Court de Gebnlin chuan a zir chianna ah chuan Tarot Cards hian mihring nunphung leh hriatna nen inzawmna thuk tak a nei ani tih a sawi chhuak a. Chu hriatna thuruk chu hmanlai Egyptian puithiam ho khan lo hmuchhuakin Tarot Cards hi an lo duangchuak ta niin a ngai a ni.

Kum zabi 18 na lai vel a French Ocultist pakhat Eliphas Levi khan Tarot Cards te hian Jewish Cabbala nen inzawmna thuk tak neiin a ngai bawk. Cabbala hi dawi lampang leh mihring thiltihtheihna thuruk lam in kaihhruaina bu a ni a, tichuan he ngaihdan behchhan hian secret society pakhat 'Hermetic Order of The Golden Dawn' an tih 1888 kum a, dawi lampang kaihnawih pawl atana London a an din chuan tuna Tarot Cards, khawvel ina an hman lar tak 'English Rider Pack' hi an lo duang chhuak ta ani. Hermetic Order Of The Golden Dawn ah hian poet lar tak WB Yeats te satanist hmingthang Aleister Crowley te pawh kha an tel ve nghe nghe a ni.

Tarot Cards ah hian playing cards pangngai anglo takin pack pahnih 'Major Arcana' an tih cards 22 awmna leh 'Minor Arcana' an tih cards 56 awmna a awm a. Major Arcana hi thlarau lam biak nana an hman bik a ni a, Minor Arcana erawh hi chu inkhelh nana an hman a ni thung a, heng Arcana pahnih belhbawm hmang hian ai an en ta thin a. Mihring hun kal tawh, tun hun leh hmalam hun te a hriat theih ta thin a ni. Tarot Cards a milem hrang hrang hian hming hran hran leh awmze hran hran an nei a, Death tih te, Moon tih te, King tih te, Hangman tih te, Judge tih te leh a dang dang awmze hran nei vek an ni.

Kum 1601 kum pawh khan Henry Cuffe, Earl of Essex chu phiarrukna avanga man a ni a, mahse a thil tihsual tak an finfiah theihloh avangin Tarot Cards hmangin a thiam leh thiamloh an en ta a, an enna cards ah chuan a zawn in Judge leh Hangman leh Death chu a rawn thal ta tlat mai a, tichuan Henry Cuffe chu 31 March 1601 khan an khaihlum ta a ni.

Tarot Cards a Minor Arcana a mi hi tunlaia Playing Cards pangngai lo chhuahna bul hi ani a, Swords an tih tuna Spade, Mizovin ‘Ak’ kan tih hi rorelna leh thiltihtheihna entirtu a ni a, Cups an tih tuna Hearts an tih Mizovin 'Tawka' kan tih hian ngaihtuah na leh chakna a entir a, Pentacles an tih Diamonds lo ni ta Mizovin 'Zum' kan tih hian sum leh pai, inpawh tawnna leh bungrua rohlu lam a kawk leh a, tin, Wandsan an tih Clubs lo ni ta kei nin 'Tial' kan tih hian inpawh tawnna leh thanlenna lam a kawk ve thung a ni.

Tarot Cards a ai an en hian Cards chu an han phuah a, an han thal a, tichuan milem chi hrang hrang lo lang atang khan an aien sak te hmalam hun lo awm tur te kha an hrilh lawk ta thin a ni. Hetianga aien hi 100% chuan dik vek lo mahse tamtak hi chu a dikve duh khawp mai. Han en tak tak hi chuan mak deuh deuh hi a rawn thal phawk phawk mai a ni.

BigDaddy Hmahmatea II
Duhaisam