Brute Force Attack (BFA)

Saptawng hrethiam tan chuan chhiar tur rapthlak khawpin tam mahse Mizotawng chuan chhiar tur a awm awm pawh ka la hre lo va, chuvangin ka phak tawk leh hriatthiam ang tawkin Brute Force Attack chungchang hi sawi ilo tum dawn teh ang.

A hmasa ber chuan Brute Force Attacks awmzia ber chu 'hacker-in mi password dik tak a hmuh hma hawrawp chi hrang hrang system (computer) hmanga remkhawm (combine)a zawn char charna a ni' hi a ni.
Entirnan Hacker chuan mi password hriatchhuah nan 001 atanga zawng tanin 002, 003, oo4... etc tiin remkhawmin a combination dik tak hre turin a zawng char char thei a ni. A tawpah chuan khawi maw lai takah password dik tak chu a va remchhuak nawlh thei a ni. Hetiang hian hawrawp leh number leh symbol awm zawng zawng chu a remkhawm theih dan awm zawng zawnga an zawn miau avang hian password dik chu an hmuchhuak nge nge thin a. Hei hi Mihring tiha tan chuan thiltih har leh hahthlak tak nia ngaih palh a awl viau thei ang. Mahse Computer chuan rang leh chak takin hetiang remkhawm hna hi a thawk thei a ni. Hacker te hi an fing hle a, password neitu chuan Dictionary word mai mai ang te pawh an hmang nulh thei tih an hria a, chuvangin mi password an ruk dawn pawh hian Dictionary word leh number remkhawm hmangin an bei(Dictionary attack) hmasa tlangpui thin bawk a ni. Password thui leh hawrawp inpawlh tam brute force nana an hman ber chu Dictionary attack hi a ni. Hetianga mi password rukna dan hi hun heh leh thil awlsam tak a ni hauh lo va, Combination awm zawng zawng hmang hian Minute 10 chhung leka hlawhtlin theih a nih laiin Kum 100 chuang a rei hun pawh kan mamawh maithei bawk a. Brute Force attack ti tura hun kan mamawh zat chu a hnuaia mi ang hian a formula-in an dah a.

Key space key
length × Time
per attempt =
time required

Key Space= number of character allowed in each position (symbol leh alpha-numeric password chhunga position tina awm thei zat).
Key length= Length of password (password thui zawng).
Time per attempt= Hei computer chhut atan chuan number lian tak a ni thei lo hrim hrim bawk a.
Time required= Hun mamawh zat.

Brute Force Attack tih nana Software hman lar zual te chu:

*.Aircrack-ng
*.Cain and Abel
*.Crack
*.DaveGrohl
*.Hash Code cracker
*.Hashcat
*.John the Ripper
*.L0phtCrack
*.Ophcrack
*.RainbowCrack
*.SAMInside(Source: Wikipedia)

Kan hriat angin computer hian hma a sawn zel a, processing speed kumtinin a chak belh zel ang a ni bawk. Chuvangin tumahin Brute Force attack hi pumpelh theih tak tak a ni lo, tiin mithiam te chuan an sawi hial reng a ni.

Brute Force Attack pumpelh dan
Pumpelh theih tak tak ni lo mah se, in ven dan erawh a awm thei ve bawk a. A hmasa ber chuan password kan siamin sei tawk tak, hawrawp, symbol leh number nasa taka inpawlha siam a him bik. Hei hi Dictionary attack laka invenna tha tak a ni bawk a. Awlsam takin i password kha an hre thei dawn lo tihna a ni a, hei hi a saptawng chuan slow password hashing algorithm tiin an sawi a. Brute Force attack-na hmanrua pawhin rei tak a beih loh chuan hetiang password hi chu a remchhuak thei mai mai dawn lo tihna a ni. Chuvangin a him famkim tak tak chuang lo tihna a ni tho. In venna dang leh chu Logging hi a ni ang. Logging awmzia ber chu hacker-in i password a zawnna vela a thiltih zawng zawng lo record-a i email-a thawntir emaw i log folder-a a chetdan lo record tihna a ni. Brute Force attack inven nana tha ber leh a tluk la awm lo hiala an sawi chuThrottling hi a ni. A awmzia ber chu Miin password rinthu hmanga luh an lo tuma an hlawhchham zel khan an login theihna tihtlem ve zel tihna a ni. Entirnan Vawi nga attempt hnu-a i login theih loh cheu chuan password dik pawh hmang mah la, i login thei tawh lo va, a chhan chu block i nih tawh vang a ni. hetianga login theih zat bithliahna hi Brute Force Attack laka him leh hman tlak ber a ni bawk. Hetiang hmang hian hacker ip address chu i block thei leh zel bawk a ni.

A tawp bera ka sawi duh chu Tunlai Computing technology a changkang chho zel a, chuvangin Brute Force Attack tih dan leh speed pawh a chak tulh tulh bawk a ni. NSA chuan second khat-ah Password Combination 10 trillion an process thei tawh a, chuvangin password tana ui hming leh bialnu te hming mai mai hman chu chi vak loh a ni. 25 GPU cluster hian Windows standard password eng pawh darkar 6 chhungin a zawng chhuak thei. Hriatbelh i duh chuan he Link hi lo visit mai ru.

Radeon City, population: 8. It's one of five servers that make up a high-performance password-cracking cluster.

Mawia HL