Hachiko

A Pu Tan A Ui Rinawm Chu

Japanese hovin tun thlenga rinawmna in zirtirna atana an hman chu ui, a pu tana a thihthlenga rinawm, a film hial pawh a an siam Hachiko chanchin hi a ni.

Hachiko hi November ni 10, 1923 khan Japan ram a Olate City a Akita Perfecture an tihhmunah a lo piang a. 1924 khan Hidesaburo Ueno-a, University of Tokyo a agriculture professor in a la a. Amah hi 'Akita breed' a sen buang deuh, a hmai cream rawng deuh a ni a. Hachiko leh a pu hi an in ngaina hle mai a. A pu a hnaa a kal lo ho lam hi nitin a rawn haw tur chu Shibuya rail station ah hian a lohmuak ziah thin a. Kum 1925 May thla khan nikhat chu a pu hi a rawn haw ta tlatlo mai. Professor Ueno chu thluak a thisenzam chat 'cerebral hemohrage' vangin a thi hi a lo ni a. A pu chu kumkhua atan nghah chhuah tur a awm ta lo.



Chu chu ani ui tan a han hrethiam chi ni heklo le, nitin mai hian a pu a nghahna thin hmun pangngaiah chuan a lo nghak ziah thin a. Chulaia rail kal thin chu hunbi nei thlap a rawn thleng thin anih avangin chu rail a chuang thin leh chulai hmun akal thin te chuan Hachiko chu an hmelhriat ta viau mai a, eitur eng engemaw tepawh an pe ve thin a. Chutiang chuan chu ui rinawm tak chuan a pu haw tur,nghah chhuah tur awm tawh lo chu rinawm takin kum 9 chhung zet nitin a lo nghak thin a ni. "Ka pu hi rawn haw tur a awm tawhlo aniang," ti a beidawna tum reng reng lo. Rinawm takin a hun ngai, a hmun ngaiah kum 9 chhung tehmeuh alo nghak a ni.

Kum 1925 Professor Ueno-a thih kum vek hian a student thin pakhat, ui lampang a tui tak mai chuan Hachiko hi Shibuya station atang chuan a zui haw a, Professor Ueno-a huan enkawltu Kikuzaboro Kobayashi inah a zui lut nawlh mai a, a chanchin ahriat belh phah ta teuh mai a. Tin, a chhui a chhui a Japan ah chuan Akita ui ang chi hi 30 vel chiah a lo awm tawh tih te a hmuchhuak a. Tichuan, Hachiko chanchin hi chanchinbuah article te a ziak a, 1932 khan Tokyo Asahi Shimbun tih chanchinbuah tih chhuah a ni ta a. Tichuan, Hachiko chanchin chu a lo lar in mihriat a lo hlawh chho ta a ni.

Tichuan March ni 8, 1935 khan chu ui rinawm tak chu Shibuya khawlaiah thi a chhar a ni a, a ruang hi mithiam ten an endik nghal a, terminal cancer a vei tih leh rulhut, filaria infection a vei tih hmuh chhuah ani ta a ni. Hachiko lim hi dar in siam a ni a, Shibuya ah chuan dah a ni a, mahse Indopui 2 na lai khan indona hmanrua vel siam nan a lim dar chu hman a ni ta a. Tin, a vun hi an lip a, anhnawhpuar tha a, National Science Museum of Japan ah an dah ta a ni. August1948 khan a lim original siamtu fapa chuan a lim dang a siam ve leh a Shibuya Station a luh chhuahna pakhat bulah chuan an dah a, chulai hmun chu Hachiko Guchi an ti a, a awmzia chu Hachiko luh/chhuahna tihna a ni. Inhmuhkhawmna ber hmun pakhat a ni. Tin, a pu a lo nghah thinna lai takah hian ui ke hniak lem dar in an siam bawk a, abulah chuan Hachiko chanchin an ziak bawk. Tin, a pian na khua Olate City-ah a lim hi dah a ni bawk a ni.

Kumtin in April ni 8 ah amah hriatrengna hun hi hman thin a ni a. Japanese ho hian an ngaisangin an ngaihlu hle mai a, an fa te hnena rinawmna chungchang zirtir nan ber an hmang a ni. He ui a pu tan a a thih thleng a rinawm Hachiko hi awm tawhlo mahse khawvel hian a rinawmna hi engtikah mah an theihnghilh leh tawh ngai lovang.


Hachiko's monument on the side of Professor Ueno's grave in the Aoyama Cemetery, Minato, Tokyo.

ђ๓คг tlคภﻮtє