Chi thlaha lo pung tura ruat chu ni mah ila tam lutuk leh chenna ram leh leilung zawh loh khawpa pun hi thil thalo zawng ni ngei tur ani. Tin, mihringte ai hian rannungte hian pathian rorel phung hi hrethiam zawk leh a rorelna kalha chet hi an hrehin an duhlo zawk mah emaw tih theih ani fo.
Norway rama cheng Sazu chi khat, Lemming an tih mai pawh hi danglam tak an ni. Kan sazu hriat ai hian an lian deuh a, a hmingin mei (Tail) tawi te chu an nei ve. Mawi ang reng takin an tial bawk. Anni pawh hian tam lutuk chu an tei thei der lo.
Lemming hian kum 4 danah hian 'thihna kawng zawh' hi an nei ziah thin zuk nia. Kum 1-na hi chuan chi an la inthlah chak lutuk lova, kum 2-na alo thlen erawh chuan a hma aiin an chhang a zingin an pung nasa hle tawh a. A kum 3-na a lo thlen meuh chuan nau no pawm loh lai an nei miah tawh lo ani. Tichuan an lo tawt ta lutuk a, ei tur pawh an indaih ta lova, an mang a ang ta ni ngei tur ani. A maktaduai tel telin, chenna hmun thawl deuh leh ei tur tamna deuh zawngin 'thihna kawng zawh' chu an bei ta mup mup mai thin ani.
Hetianga kawng an han zawh tawh hi chuan tlang, kham, lui, tuipui engmahin a dang zo tawh ngai lo. An hma lam panin eng hmun leh eng chungah pawh an kal hmiah hmiah mai thin ani. Tin, heng sazu hian tui tling satliah chu an hleuh thei ve bawk a, mahse tuiluang leh tuipui fawn thung erawh chu an tei thei der lo. Tichuan lui leh tuipui an lo thlen chuan maktaduai tel telin tuiah an tla hlum ta zung zung mai thin ani. A thi bang ho chu an inthlah pung leh a, a ngai tê bawkin, kum 4 danah chu 'thihna kawng zawh' chu an bei leh mai thin a ni.
No comments:
Post a Comment