A hmasa in hriat dàn leh chhinchhiah dàn a in ang lo a, hei pawh hi a dik ber lo mai thei ania!
Chanchinbu pakhat, 'Mizo leh Vai' tihah chuan Mizote'n Krismas kan hman hmasak ber leh kan hman dàn chu 'hetiang hian a ziak a (a inziak angin) -
'Tin, Aizawl a pawh hian Disembar 25-30 krismas chu a lo awm. Tin, sawrkar-in an hnathawk-tu-te hnenah awmni an pe; an awfis an khar a, an kai lo.
Tin, sikul mi te ho, zo sap leh sawrkar in chu mi ni atan englo an thawh lawm khan sebawng leh vawk, ser leh fu an ei.
Tin, sikul awm hnuin sikul kai-in awm-khawm-na a awm, Isua pian chanchin leh hril lawk thu an hril bik.
Tin, chumi ni banin fu leh bal-hla leh ser leh chi thlum naupan an shem.
Sap-ho Pathian biak inkhawm a awm. Sap chu mipa 4 leh hmeichhia 3 an ni. An zai theuh a, an thiam hle. Hmeichhiain hla an la zawk thin. Tin, tlai lamah mizo hmeichhia an ko khawm, ruaitheh zawhin thingpui an sem tir leh.
Tin, ruaitheh hma chhuna naupang an infiam tir a, ati thei ber chu englo an pe. A lunglen thlak e.
He mi tum hian Mizoram zaipawl intihsiak a awm a, hei hi hmasa ber a ni. Zaipawl pathum,
Tlangval zaipawl (Dala ho),
Tleirawl zaipawl (Chhingaho) leh
Naupang zaipawl (Thanga ho)te'n intihsiak chu an bei a. Tlangval zaipawlte'n pakhatna an la a ni. Zosapthara hla phuah, 'Mizo kan ni, lawm ilangin' tih hla kha.'
Masi an hman hmasak berna hi tùn hmaa, 'Hmeichhe sikul' an tih thinah khan a ni a. Tùna Synod Office bul kawt vèl hi a ni.
He mi kum hian kristiang 25/35/125 emaw chauh an la ni a. Masi hmangtu pawh mi 20 vèl chauh an ni! A hmangtu langsar te chu, Zosàp te bàkah, Khùma, Khàra, Dala, Chhìnga leh Thanga te an ni.
Masi an hmanna hmun hi tùn hma chuan ramhuai hnèna an inthawina hmun a ni thin a. Mahse, kum 1903 atang chuan bàwlpu te chhamphual ri chu, "Chungnung Berah Pathian Ropui Rawh Se.' tiin, Angel Zaipàwlte chuan an rawn luah lan tan ta a ni.
No comments:
Post a Comment