Rock Music Chanchin

Rock music hi rimawi chikhat, lar chak tak mai, 1960 vel bawr atanga thawm rawn nei lian tan a ni a.

Rock and Roll, Rhythm and Blues, Country Music, Folk Music, Jazz leh Classical Music kaihkawp a ni.

Rock Band emaw, Rock Group ah emaw chuan a lo berah mi pathum emaw pali an ni thin a. Lead Guitarist, Bass Guitarist, Lead Singer leh Drummer te chu Rock Band tikimtu an ni.

1970 hnulam khan Soft Rock, Glam Rock, Heavy Metal, Hard Rock, Progressive Rock leh Punk Rock te chu a piang a. 1980 hnulamah New Wave, Hardcore Punk leh Alternative Rock te a rawn piang ve leh a. 1990 hnulam khan Grunge, Britpop, Indie Rock leh Nu-metal te a pian belh ve leh bawk.

A bul atangin (1940s-1960s) :
1950s velah Chuck Berry a rawn lar chho a, ‘60s rawn inher chhoh chuan Chuck Berry ngaisangtute zinga mi Rolling Stones chuan rimawi chi thar hmangin khawvel an rawn tuam tan a.

Rock Music darh chho (1970s) :
Rock Music chuan rimawi ngainatute thinlung a luah hneh tawh hle a, hetiang taka mi a hneh avang hian Band pawh an pung chak hle mai a. 1970s chho khan Led Zeppelin an rawn inlar a, a hma a Rock Music kalphung kha rawn thlak danglamin Hard Rock leh Heavy Metal hmangin ram an rawn la tan a.

Hetih lai vel tho hian Pink Floyd chuan Rock Music chidang leh, Psychedelic Rock chu khawvel hmaah an rawn phochhuak ve bawk a.

1970s chho ah hian ‘Hippie Band’ Sex Pistols te chu rawn dingin rimawi ring deuh mai, midangte na taka nawr thei hla thu nen Punk Rock bul an rawn tan ve leh a.

Hemi chhung zawng hian Industrial Rock hi chu a dang angin lar hluai lo mahse an kal chho ve reng a.

Rock ngainatute chuan Deep Purple, Led Zeppelin, Black Sabbath leh Judas Priest chu an atchilh nghet tlat tawh mai a ni.

Rock Music a inthensawm (1980s) :
1980s ah hian kan ramah pawh kan lo hmelhriat em em, Heavy Metal chu a rawn lar hle mai a. British Band Iron Maiden leh Def Leppard te chuan rimawi danglam tak mai hmangin rimawi ngainatute an rawn run a. Van Halen, Metallica, Megadeth te chu hahipa sawi an ni a.

Glam metal (1980s) :
1980s a inher chhuah chuan Rock Music Style dik tak leh Glam Look an tih mai chu rawn chawhpawlhin Queen chuan mi hriat a hlawh viau a. An Vocalist Freddie Mercury hi Sex hman pawlawh vanga HIV/AIDS kai a ni a, 1987 Easter khan a inhre tawh a mahse a Negative angin a sawi a ni. Khatih hun lai khan HIV/AIDS vei te hian enhranna an tawk nasa hle a, hei vang hian Freddie pawh a inpuang duh lawk lova. A chhan pawh a chhungte’n endawng an hlauh a venthawn vang a ni. Chanchinbu lam chuan a damloh thu an chhuah chuai chuai a. A tawpah chuan Statement a siam ta. November ni 24, 1991 a ni. Freddie chuan AIDS a vei thu a puang a, “Tunah chuan he natna hi ka Fans te zawng zawng in dolet turin ka duh a ni, thudik in hriat a hun tawh a ni," tiin a sawi a ni. A taksa sipai te chu an chhe tawh hle a, natna an do thei tawh lova hemi tuk November 24 ah hritlang awmna vangin a boral ta a ni.

Motley Crue,
Ratt,
Quiet Riot,
Guns N’ Roses,
Warrant,
Poison,
L.A. Guns,
Faster Pussycat,
Twisted Sister leh Band dang tam tak te chuan 1987 vel atangin thawm an rawn nei lian hle a.

Sam sei tak, thenkhat chu thur deuh bem bum an put bakah make-up an hmang nasa a, an thawmhnaw pawh mi mit la thei tur ber, Leather, Jeans tih vel an inbel nasa hle.

Rock Music pianthar lehna (1990s) :
1991 khan Nirvana chuan ‘Nevermind’ album an tichhuak a, Alternative Rock chu a alh chho ta hluai mai a. Hemi rual hian Grunge Rock an tih mai, Hard Rock leh Punk Rock inpawlh chu a rawn lar chho a, hetiang lam auchhuahpuitu Soundgarden te chuan rimawi khawvel chu an al hneh hle mai a.

Nirvana dintu Kurt Cobain chu a intihhlum tak avangin Alternative Rock pawh hian thawm a nei chau nghal vat a, Rock Music kalphung pangngai chuan rimawi khawvelah thawm a rawn neih len leh phah a.

Limp Bizkit chuan Hard Rock leh Rap inpawlh hmangin Style thar danglam tak mai an rawn larpui a. Red Hot Chili Peppers te chu Funk Fusion a hriathlawh pawl an ni.

Kum zabi 21 na a rawn inher chhuah meuh chuan 60s vel bawra Rock ang kha a rawn piang chhuak tha leh a, mahse an kalphung erawh tunlai rimawi nena kaihkawp a ni tawh thung a.

Heng zingah hian Linkin Park chu a langsar pawl an ni a, anni hian Hip-Hop leh Metal an kaihkawp a. 3 Doors Down chuan Hard Rock lam kalpui chungin Contemporary Music chu an telh a, Style danglam tak mai an rawn nei a ni.