Mipa Tleirawl pakhat Barney hi a awm a, tlanglawn leh Adventure lampang ngaina em em mai a ni a. An in atanga hla lo te ah chuan ram ngaw tha tak mai hi a awm a, chutah chuan tlang phawkhraw tak tak te a awm a. Chu hmunah chuan a thian te nen puan In te kaih in tlang te chu an lawm thin a, nuam an ti hle thin a.
Zankhat chun Barney chu amah chauh chuan chu tlang chu lawm tumin an in atang chuan a thawkchhuak a. A lo lawn fo tawhna anih avangin a thiante pawh sawm lem lo chuan phur tak mai chuan a chhuak a. A hmun ava thlen chuan nidanga an lawn thinna lo deuh a lawn chu a chak ta tlat mai a. A ngaihtuahnaah chuan a thiante pawhin an la lawn loh anih avangin a thian te bula insawitheih nan pawh tha hle in a hria a.
Chu mi tlang lawn tum chuan a hrui leh hmanraw neih ho nen chuan a thawk chhuak a. Chumi zan ber kher chuan chhum a zing nasa em em a, engmah a hmuh that theih lova. Arsi leh thla te pawh chu chhum chuan a hliah vek a. Mahse, lawn a chak em avang chuan Barney chu lawn tur chuan a chhuak ta a.
Phur tak chuan tlang chhip lam pan chuan a lawn chho va, a thlen chin apiangah hrui a tlak dal tur in a thlung zel a. Thui fe a lawn tawh tih chuan a lung rah chu a bal ta hlauh mai a. A invuan hman tawh bawk si lova, chak tak mai hian a tlathla ta vawng vawng mai a. Thui fe a tlak thlak hnu chuan a hrui tlun, a kawnga a hren chuan a bat tang ta a. Mahse, a tlakna a san em avang chuan a hrui ah chuan a inbang hnawk a, a hnungzang ruh chu a tliak a. Na a ti em em a, a ke lam a che thei tawh bawk si lova.
A mangang chuan, "Lalpa, min tanpui rawh!" tiin a au vak vak a. Chu veleh chuan van atangin aw chuan, "Enge ka tihsak theih che?" tiin a rawn chhang a. Barney chuan tap chung chuan, "Lalpa, min chhanchhuak rawh!" tiin a chhang a. Aw chuan, "Barney, ka chhanchhuah che i duh tak tak amaw?" tiin a chhang leh a. Barney chuan rang takin, "Aw" tiin a chhang a. Chu veleh Aw chuan, "Anih chuan hrui kha zai chat rawh" a rawn ti a. Mahse, Barney chuan a ringhlel a, hrui chu zai chat duh lovin a kutin a theih ang angin a in pawt a. Vanduaithlak takin Barney chuan inpawh chhoh a tum na lamah a intauh sual a, a hliam tuar lo chuan a thi ta a.
A tuk zingah chuan a thian te tlang lawn tur chuan Barney ruang chu an va hmu a, a lo khawng vek tawh a. Feet 1 vel chiahin lei chu a lo si lo a ni.
☀ He thawnthu hian Pathian hi rin satliah ringawt lova rin tak tak a pawimawh zia min zirtir a. Barney khan hrui kha zai chat ta se chu a nunna kha Pathianin a humsak ngei anga, a tukah amah tanpui tur te pawh a tir ngei ang. Mahse, Pathian a au a, a ring zo leh si lova. Pathian a rin ngam tak tak loh na chuan a nunna hial channa a thlen ta a ni. Pathian kan biak hian a mai mai in be lo ila, tin, Pathian ah hian kan rinna hi nghat ngam ila, beisei loh thil kan nuna a rawn thlen chang pawhin Pathian kan rin tlat chuan Pathian chuan a chhia chu a tha in a rawn thlak mai dawn a ni.
No comments:
Post a Comment