Chu Night Club ri hut hut karah chuan ka No dawm lai chu kan tlak pap a. Ka Bawihi nena kan inthenna pawh a rei ve ta. Ka ngaihna hi a la reh silo, Zantin he hmun a kal mai loh chu tih tur dang ka neilo.
Zan dar 8:30 velah chuan Kawngkhar atang hian Pa pakhat leh a Nupui nge a Bialnu ni awm tak hi an lo lut a. Mak tak maiin chu Pa chu wheelchair-ah a thu a, a Hmeichhe rawn kalpui chuan a rawn nawr nghe nghe a. Midang pawh chuan an lo en deuh hu a. Mahse an thil tih lai chu an chhunzawm leh mai a. Ka en reng a, rei vaklo ah chuan chu Nu chu Pa pakhat hian a rawn bia a, an thusawi chu ka hre thei mailo. Wheelchair a thu chu, chu Hmeichhia, Hmelchhe lo tak chuan an thlek zeuh a, a rawn betu Pa nen chuan an kal ta daih a.
Chu Nula chu kan zawng kual deuh a, a hnu deuhah chuan a rawn betu Pa nena an Lam chu ka hmu a, rei vaklo hnuah chuan Microphone chu a rawn ri dat dat a, kan hawi phei thup a, chu Wheelchair-a thu Pa chuan Microphone chu a lo vuan a, thei leh theilo hian a ding a, Tichuan aw dam dap hian he thu hi a rawn sawichhuak ta a:
Bawihi, kha Tlangval nena inlam dun ka phal chhan kha i hria em? Kei, ke bai leh mahni pawha kal theilo hian ka lampui ve thei silo che a, ka inthiamloh em avangin ka phal chauh asin. Ni e, Mipa tupawh rawn mitmei tu che chu i lampui thei e. He ka thutna atang hian ka lo en che a, he Night Club entu Light mawi tak hnuaia Mipa dang nena hlim taka innui lai te kha ka lo en reng che a, kha Pa kha nih ka van chak tak em. Mahse hei hi chu theihnghilh lo la, tunge kan run ngui tak chhunga hruai lut tu che a i Laikhum zalna a kuah thin tu che hi? Chuvangin Bawihi, i lamna a i pheichheh hnuhnung ber tal hi chu ka tan min lo zuah ve rawh aw.
Chu Music mawi tak chu i hria em? Nang ang maia mawi leh duhawm a ni asin. I duh chuan i Hlimna chu chen la, Lam la, Nui la, mahse tu bulah pawh awm la maw Bawihte, i Thinlung kha chu tudang mah pe lo hram rawh aw? Mahse hei hi chu theihnghilh suh aw? Tunge kan run ngui tak chhunga hruai lut che a i Laikhum zalna a kuah thintu che hi? Chuvang chuan Bawihte, i Lam na a i pheichheh hnuhnung ber kha chu ka tan lo zuah ve hram rawh aw.
He Zan hun tawp ber leh he Club an khar hma thleng chu Lam la, kha Mipa, i lampui khan nangmah chauhin i awm leh awm loh te, thlah i ngaih leh ngaihloh te a zawh che chuan, 'Aih' tiin chhang hram rawh aw? A chhan chu tunge kan run ngui taka hruailut thin tu che leh Laikhum i zalna a kuah thintu che hi min theihnghilh lo hram rawh. Bawihte, i Lamna a i Kechheh hnuhnung ber tal chu ka tan min zuah ve rawh aw.
Chu thu a sawi zawh chuan kan intihhlimna hmun chu a reh hian a reh dup mai a, a hnunglam atang chuan Hmeichhe pakhat hi hmanhmawh takin a rawn tlan a, Wheelchair-a thu, thusawi tupa chu tap chung hian a rawn kuah vawng vawng a. Kut beng thawm a ring ngei mai.
He hla phuahtu Doc Pomus hi June 21, 1925 khan Brooklyn, New York ah a lo piang a. A Naupan lai in Polio natna in a tlakbuak a, a lo dam chhuah leh hnu pawn a Ke chu a hmang tha thei ta lova, tichuan Naupangte a nih atangin Zakdawh tiang hman a lo ngai ta a. A lo puitlin hnuah pawh ‘Post-Polio Syndrome’ a vei chho leh a, Accident a tawk chho leh bawk nen, Wheelchair ah a hringnun chu a hmang chho ta a.
Music-ah hian a hun lai a Blues Singer lar tak Big Joe Turner hla a ngaihthlak atangin a tui chho a, tichuan Zai leh Hlaphuah lamah kal chho in Music chu a luhchilh chho ve ta a. Hla tamtak phuah chho in amah pawhin a sa chho ve zel a. 1992 kha Rock N Roll Hall Of Fame ah lak luh a nih bakah hemi kum vek hian Songs Writer Hall Of Fame ah leh Blues Hall Of Fame ah lakluh a ni.
He hla ‘Save The Last Dance For Me’ tih hi a Nupui Willi Bruke puala a phuah a ni a. Thenkhat sawi dan chuan an Inneih Zan Party na a lamna hmunah pawh lam ve thei lova a awm laia a Nupui Broadway vel a lam mi ina mi hrang hrang a lam pui lai a hmuh atanga a phuah, Dawhkana Invitation Card lo awm hnunglam a an Wedding Party chhung zawnga a lo ziah angin an sawi thin. Mahse hetiang hi a ni hauh lo, an Inneih hnu kum 3 a liam hnu a an Inneih Zana thil thleng a phuahna zawk a ni. He hla ah hian a phuah tu Doc Pomus hian an Inneih Zan Party na a a nupui Willie Bruke, Broadway Dancer leh Actress ni bawk chu hlim taka a hun hmang a, a duh duh lam pui a mahse amah chu hre reng tur leh a Nupui a nih avanga an Party chu a tawp hunah Inlama hruai haw tu tur chu amah ngei chu a nih thu a hrilhna ang a ni ber, a hla thu ah hian a Nupui in midang a lampui a, nghet tak mai a an han inkuah vel a hmuh a a thikthu ni a ngaihbel theih te pawh a zep tel ve bawk a ni. Willie Bruke nen hian 60s laihawl chho vel khan Fanu pakhat an neih hnuah an inthen leh ta a ni.
http://m.youtube.com/watch?v=vwsxFjONXIA
Hriata Clayton Zadeng
No comments:
Post a Comment