Putar-in Thlanmual ram tawha, 'Ka Ro Hlu Ber' ti-a a sawina lai chu ral atang chuan an thlir dun a. Thlanmual chu an hmu ngei a, mahse, 'RO' chu a awm ngei ang em? Chèng nuaih 80 an pe tawh si a!
Thlanmual chu an thleng chho a. Putar sawi ang chuan engkim a thleng dik a. A Fapa Naupang Thlan awmna hmun bik pawh harsa lo takin an hmuchhuak thuai a. An Thinlungah Ro hlu tak, Pawisaa chantíra, chèng pawhin a lei theih loh tùr khawpa hlu, 'Rohlu ber' chu lei chhùng rilah phum tel a nih tlat avángin chu chuan chakna a pe a, an lai nghàl ta mial mial a.
Hah thi kula an laih hnu paw'n an hlawhchham let der a. Mipa naupang, kum sàwm liam taa an phum tak ruhro bàk an lai chhuak lo! Beidawngin, thinur takin an pafa chuan an inphur haw leh ta ringawt a.
Zànah In an thleng a. An thenawmpa thawm ri va reng reng an hre thei tawh lo. Phone-a biak an tum nasat poh leh an beidawnna titamtu lek a ni si. Thenawm khaw veng te lahin a chanchin engmah sawi zui tùr an hre hek lo.
Putar ni àwm taka langa tawng vél chu putar a ni hauh lo! Lemchangtu zahawm tak a ni zawk!
He mi te pafa hian an thenawm, putar ni-a an hriat, hapta khat chauh liam taa rawn awm ve chauh hnén atang chuan ram buai lai taka a lei ro hlu ber, sum tam takin a lei zawh loh tùr khawpa hlu a phum thu chu awihawm taka sawiin, an sum neih chhun chu pe in, chu thlanmualah chuan an kal ta kha a ni a. Chu putar ro phum chu hmuh pawh an va hmu ngei mai. Mahse, suma chantìra hausakpui chi zia zang a ni lo. Chu putarin, 'ka rohlu ber' a tih chu eng dang ni lovin, a rila rah, a fapa ngei mai chu a ni!
Chu chu, suma chantír theih 'Ro' emaw tiin, he mi te pafa hian an duhàmna bengin an ngaithla a, an neih sa paihin a aia tawm zawk neih an tum a, mahse, hlep tùra an ngaih chu an hloh ta zawk a ni!
I zawh tàwk aia rit i phurh chuan In i thlen hmain i chau chhe mai ang!
- KC-i Pa, Khawlhring
No comments:
Post a Comment