Indian Variant AK-47

Kolkata bul mai, 24 North Parganas-a West Bengal-a Rifle Factory, Ishapore ten AK-47 zulzuia an siam Assault Rifle chu Army, Air Force leh Sashastra Seema Bal (SSB) ten hun eng emaw chen an hman chhin hnuah a tak taka hman zui turin pawm a ni a, Ishapore Factory hian a thawh khatna atan he Rifle hi 50,000 an siam thuai ang.

India Sipai chi hrang hrangte silai hman atan hian hman deuh khan Ordnance Factory Board chuan AK-47 entawnin a anpui tia sawi theih (Replica) an siam a, Delhi a Defence Expo-a an pholan chu AK-47 hmuchhuaktu Antony Kalashnikov-a chuan lo hriain, a siamtu Ordnance Factory Board te chu Copyright Violation dan hmanga Court a khinah a rawn vau tak avangin kalpui zui zel a ni ta lo va. Hemi hnu hian Ordnance Factory Board chuan India rama Assault Rifle siam thei hrang hrangte chu AK-47 zul si, a khawl lamah erawh chuan pakhat maha AK-47 entawn si lova Assault Rifle thar duang turin a hrilh hlawm a, chumi dungzui chuan Rifle Factory Ishapore, Small Arms Factory Kanpur Ordnance Factory Tiruchirapalli te chuan AK-47 pianhmang zulzui tur si Assault Rifle chu an duang ta a; an duan te chu sipai ten an han hmang chhin a, sawiselna lai an nei vek a. Ishapore Factory te kutchhuak an sawiselna lai awmchhun chu, Chirhdiaka nem pil hnuah a kah theih loh chu a ni. Assault Rifle chu engtikah pawh, khawiah pawh hman theih a ni tur a ni, chirh chhunga awm chung pawhin kah theih a ni tur a ni, an ti a. Chutiang tur chuan an siam danglam leh a, chu chu Ordnance Factory Board chuan a pawm ta a ni. Indian Variant Of AK-47 ti bak chuan hming bik tur hi pek a la ni lo niin hriat a ni.

Rifle Factory, Ishapore te kutchhuak Assault Rifle thar hi INSAS Rifle nena a inan na lai pawh a awm nual a. INSAS (Indian Small Arms System) Rifle hi India Sipai ten 3,00,000 vel hmang mekin, kum 1999 a Kargil War kha tih tak taka an hman tanna a ni a; Ishapore Factory hi hna lian nei lovin hun eng emaw chen an awm tawh a, tunah chuan hna hlawk tham tak tur an nei leh ta a ni. Tuna Indian Variant of AK-47 hi First Batch atana 50,000 sian hnuah pawh hemi let eng emaw zat hi siam a la ngai tura ngaih a ni a, hna an ngah chho dawn hle a ni.

Ishapore hi India rama silai siamna hlun ber zing a mi a ni a. He hmunah hian kum 1787 khan Silaizen (Gunpowder) siamna din tan a niin, kum 1791 ah an siam chhuak tan a, kum 1801 ah Silai leh Carriage siam a ni leh bawk. Rifle Factory tak hi chu kum 1904 ah din tan a ni a, Rifle mai bakah Light Machine Gun (LMG) te pawh siam a ni. Ishapore ah hian 303 British Calibre Short Magazine Lee-Enfield Mk III te, 7.62mm NATO Calibre Ishapore 2A1 Rifle te, 7.62mm NATO L1A1 Self-Loading Rifle (SLR) te siam a ni a. Tuna India Sipaiten an hman lar mek 5.56mm INSAS Assault Rifle hi a siamtu te zingah tel bawkin, Pistol Auto 9mm 1A an siam tel bawk. INSAS Rifle hi sawiselna neuh neuh a awm ve mek tho bawk a ni.