Loneitu, Vawk Leh Sakawr

Loneitu pakhat Sakawr ngaina tak mai hi a awm a, Sakawr chi hrang (Breed) tam tak a lakhawm thin a, a lakkhawm (Collection) tikim turin Sakawr chi khat chiah a mamawh tawh a, a mamawh ang tak mai Sakawr chi tha tak chu a thenawm maia Loneitu chuan a nei reng tih a hre ta hlauh mai a. Chu sakawr chu a ta anih hma chu beidawng lovin a thenawmpa hnenah chuan a leng ta tlut tlut a, an inleitir ta nge nge a.

Thla khat a liam chauh tih chuan a Sakawr lakthar chu a damlo ta tlat mai a, ran Daktawr a kohtir a ani chuan an en hnu chuan tihian ati ta a, "I sakawr hian hri a kai hlauh mai a, he damdawi hi nithum ilo pe ang a, tukthum ní a ka rawn kir hun pawha that lam ala pan lo anih chuan i tihhlum mai a ngai dawn ani,'' a ti a.

An titi chu an bul maia Vawkpa chuan alo ngaithla ve reng a. A tuk ah chuan damdawi chu an han pe ta a an kalsan veleh chuan vawkpa chu a rawn tlan tuang tuang a, ''E khai! Thianpa inti harh rawh le, inti pachang rawh chutilo zawng an dahtha ngei dawn che ania,'' tiin a rawn hrilh thuai thuai a.

Ni hnih tuk ah pawh chuan damdawi an pek zawh veleh vawkpa chu rawn tlan thuai in, ''E Unaupa tang ta che chutilochu an talh dawn che ania! Hawh le ka pui ang che, ding kang hram teh le.. Khat.. Hnih.. Thum,''.

Ni thum ni zing a damdawi pe tura an rawn kal leh chuan daktawr chuan, ''A pawi khawp mai hma a sawnin a lang silova sakawr dangte a kaidarh hma in kan dahthat mai angai dawn anih hi,'' ati ta a an kal sawn a.

Vawkpa chu rawn kal lehin, ''Awle ka thian tunah i tho anih loh chuan i tho chhuak leh ngai tawh lovang, tho rawh, intipachang la khaile tho rawh.. Tho rawh le.. Aw aw tikhan ..a tha luttuk.. chak deuhvin ..aw aw aw..i thei ta, i hneh ta, i him ta,".

Chutìhlai tak chuan Loneitupa chu a rawn kir a, phul a chutia a sakawr lo zuang zak zak mai a rawn hmuh chuan a auchhuak ta chiam a, ''A mak luttuk! A va han lawmawm tak em, ka sakawr a dam leh ta, a lawmnan ruai theh ngei a ngai ani, lo kal ru Vawkpa hi i talh nghal teh ang u!''.

Ni e, hringnunah pawh he thawnthu tawi ang maia a thlen chang hi a tam ani ti raw? Chawimawi tur dik chawimawiin a awmlo a, thil ropui tak phena inphum ru awm hi hriatchhuah lohvin a thamral fo thin anih hi.