Bawnghnute No Khat

Thingtlang khaw te takte pakhat ah hian Mipa Naupang tleirawl ve tan uaih tawh hi a awm a, nikhat chu in hrang hrang ah a zirna tur tuak nan thil zuarin a kalkual a, a chauvin a ril a tam tawh hle a, a pawisa nawi hlawhchhuah tlemte chu a zuk dap a thingpui dawra chawl turin ala ngahtawkin a hre si lo, a luh lehna tur in chu nula la naupang tak leh hmeltha tak mai hian kawng a rawn sak a, a thilzawrh chu a leisak a ani chuan tuisik in a dil a an inzui lut ta nghal a.

Chutia kawng rawn hawnsaktu chu a duhawmin a hmeltha a ti hle a, choka atanga a rawn chhuah chuan tuisik nilovin bawnghnute no khat parh mai arawn pe ta lehnghal a, a riltamin a chau tawh nen a lawm takzet a, lawmthu te a sawi zawh hnu chuan bawnghnute man ah chuan engzah nge a pek dawn a zawt a, chu nula chuan khawngaih thilthlawnpek ah aman a lak ngailoh thu a hrilh a, tleirawl te chuan lawmthu sawi nawn mawlh mawlh chungin a chhuahsan ta a.

Kum tam a liam a nikhat chu khawpui damdawiin liantak ah hian Doctor rual an thukhawm a Room 305- a nu pakhat natna vàng leh tihdam har tak mai vei, dinhmun thalo taka ding mek thingtlang lam atanga an rawn 'refer' chungchang hi an sawi a, chu khaw hming an han lam chuan kil khata ngawi renga lo thu Dr Howard Kelly chu a phu zawk a, reilote hnu ah chuan rawn dingchhuakin a thiante hriatthiamna a ngen a, a chhuak ta thuai a room 305 a thlen chuan dimtein kawngka a hawng a lut a mahni chauhva khuma nu pakhat lo mu bàm mai chu a en vang vang a, ngawi rengin a chhuahsan leh ta a.

Reivaklo hnua 'consultation room' ava luh leh chuan doctor rual kalkhawm hmaah chuan dingchhuakin chu 'case' chu a man a buaipui tur thu a sawi a, an theihtawpa tawiawm turin a sawm zui a. Ni leh kar a liam a thla thar a her chhuak a, Doctor Kelly chuan a thiamna zawng zawng nen theihtawp a chhuah a a damlo enkawl pawh chu a la dam ve tawk tawk zel bawk a.

Thla thum tehmeuh mai indona hautak tak beih a ni a beidawng duh lo Dr Howard Kelly chuan hnehna a chang ta, damlo chu tihdam a ni ta.. .. Dr. Kelly chuan chu damlo bill chu a hnena rawn kalpui hmasa turin thawktu te a chah a, an rawn pe a, a chhiar chhuah hnu chuan eng emaw a ziak a, a pekir leh a.

Damlo hnena a bill a rawn thlen chuan kut khur dar dar in alo la a, a pe seng dawn lo tih a hrechiang hle a kum sarih vel liamta atanga an chhungkaw chunga vanduaina hrang hrang lo thleng chho zut zut mai te chu a ngaihtuah pah neuh neuh a, hreh zetin bill chu a pharh a, a chiar thla a a hmel a dang sawp sawp a, a chhiar thla zel a, phek tawp a chhiar thlen lai chuan a hmel chu mak tihna leh lawmna in a lo khat a.

Chu bill tawp ah chuan, "he bill zawng zawng hi bawnghnute no khat hmanga rulh fel vek ani e,"