Lu Tuak

Synod khawmpui chu mizorama kohhran lian bera mipui aiawha rorel phak, khaw khat pa-rawnte rorelna khawmpui a ni. An kum zat chawhrual atanga chhutin a zatve aia tam Lu a tuak ngei tawh ang. Mahse, Thufing 20:29-a 'Putarte mawina chu an lu tuak a ni,' tih kha pawm lova zahpuia, sam dumna hmanga Baptist deuh vek zuk nia! Assembly House-a kan aiawha rorelte pawh, Chief Minister ho meuha lu tuak thupa sam dum an ni. Aiawh neia rorel ve lo, mi narante sam dum chu thil naran a ni. Mahse Kohhran leh sorkara kan aiawhte meuhin an mawina thupa sam an dum hi, chhungril takna aia mawina pawnlang buaipui hmam kan nihzia lantirna a ni lo maw?

Tarmit te, Ha lem leh Beng dar vuahte hi chu mihring hlutna belhchhahtu a ni. A tha thei ang ber vuah a sual lo. Sam dum erawh chu hmeichhe powder ang leka inkhuhmawina thil (cosmetic treatment) a ni.

Kan pulpit sermon-ah chuan, kan rah chin bakah, kan la rah lohte thlengin kan hauh ngam a. A tak ramah chuan, hmeichhia leh tuaiphengte lawm tawk hi kan enghelh a ni leh si. "Lalpa chuan heti hian a ti..." tih aiin "Mite chuan heti hian an ti..." tih hi kan Dogma leh Dictum chu a ni ta ber awm e.

Ram leh kohhran hruaitu meuh ni thei chuan, pawn lam inkhuhmawina aiin chhung lam takna a ngai pawimawh zawk a ni tih, ama lua kelsam to ngei chu hmangin, mipui hnenah an puang chhuak ngam tur a ni dawn lo'm ni?

Mahni lu tuak thuptu hian engtin nge kan tu leh fate hmui hnawih sen lutuk te hi kan zilh ngam tak ang? Mahni lu tuak zahpuitu hian engtin nge kan fanute chawn sek chu zahpui lova, pathian siam dan chu chhuang ngam zawk tura kan fuih ngam ang? Biru rilru pu chungin kohhran leh ram kan hruai a ni lo maw?

"Lua kelsam tote hmaah chuan i ding zel thin tur a ni.." (Lev 19:33) tih hi YMA chuan aia upa zah thu kan sawi apianga kan changthlan a ni. Chutianga upate zah tura thangtharte zirtir mek an nih laiin, tu hmaah nge an din tak ang? Mahni lu tuak zahpuitu hian thangthar hnenah, "aia upa zah rawh!" tiin zah kan phut leh si. Zahawmna symbol zahpui chunga zahawmna dawn beisei tlat si te hi. Congress symbol zahpui chunga NLUP dawn beisei tlat si te aiin an zahpuiawm daih zawk.

Hrisel tha tak anga lan kan duh chuan, hmeichhia anga sam dum buaipui lo hian, insawizawiin, ei leh in uluk ila, zuk leh hmuam lakah inthiarfihlim ila a dik zawk dawn lo'm ni?

Lu tuak zahpuia sam dum hi Necktie ang deuhin Pu Buanga leh Sap Upate khan rawn ching chhuak se, kan Zosapte khan ringtharte hriat hranna atan hmang sela, London-a 101 Victoria Street-a Sipai pawl hmunpuiah te la thutak viau sela, Serampore Senate dintu William Carey-a leh a hnua Principal Dr Lalchungnunga te khan, an lu tuak thupin, "Kristiante chuan sam dum tur!" te lo ti sela chuan, "Mizo Kristian Cultural Heritage a ni," te pawh kan ti thei ang. Chutiang a awm si lo.

Lu tuak zahpuia sam dum hi sapramah leh Hollywood-ah khawvel milarten ching viau sela, "Media thlemna kan do zo lo a ni!" kan ti thei ang. Mahse, Synod palaite leh kan MLA te aia lar leh hlawh tam daih zawk ni chunga an lu tuak zahpui lote hi chhiar teh:
Anthony Bourdain,
Barack Obama,
Bill Clinton,
Bill Gates,
Billy Graham,
Brad Pitt,
Clint Eastwood,
Daniel Craig,
David Bowie,
Diane Keaton,
George Clooney,
Harrison Ford,
James Coburn,
Jamie Lee Curtis,
Matt LeBlance,
Michael Caine,
Michael Douglas,
Morgan Freeman,
Nelson Mandela,
Paul Newman,
Pierce Brosnan,
Richard Branson,
Richard Gere,
Robert De Niro,
Steve Jobs,
Steve Martin,
Sean Connery..
Kan ziak seng lo zawk.

India ramah phei chuan lu tuak hi zahawmna anga ngaih a ni. Heng lu tuakte hian an zahpui em?
Abdul Kalam,
AB Vajpayee,
Amitabh Bachchan,
Bal Thackeray,
Hamid Ansari,
Hasim Premji,
Indira Gandhi,
Jaswant Singh,
Jyoti Basu,
Kapil Sibal,
Lalu Yadav,
LK Advani,
Manmohan Singh,
Narendra Modi,
Nitish Kumar,
Pranab Mukherjee,
Pratibha Patil,
Rajiv Gandhi,
Ratan Tata,
Shashi Thoroor,
Sheila Dikshit,.
A! Lu tuak lo chhiar a awl zawk hial awm e!

Bible-in a sawi angin (Gen 15:15, 25:8, Isaia 46:4) Indian Culture-ah chuan, lu tuak hi damreina malsawmna entirna anga ngaih a ni a, upate zahawmna lantirtu anga ngaih a ni bawk. Chu culture chhunga mite hnena, lu tuak zahpuia sam dumtu Synod palaite Mission rawngbawlna hian eng chen tak thleng ang maw?

Mi an loh hlauva sam dum ve tho he thu ziaktu thuziah pawh hian eng ang takin ngaihnep hlawh zui ang maw?
Ngaihtuah a ngai e.

Vanneihtluanga

ђ๓คг tlคภﻮtє