Damdawi Leh Natna Chungchanga Hriatsual Thenkhatte - II

☀ Pumpui Ulcer ah Hatkora leh Limbu fir zingkarah in a tha an ti!!
Ans - Hei hi mi tam takin an awih avangin an pumpui lawng tawh sa an tihzual belh nasa khawp mai. Thil ho te ang pawhin han ngaihtuah la i puma thur tam sa a vanga i pum ulcer kha acid i thun belh chuan a ngaihtuah awm dan tur chu a hriat mai awm e. Tui nen dal taka pawlhin chaw ei kham lama in chi chauh a ni e.

☀ Asthma tan zingkar a tuivawt a inbual a tha an ti!!
Ans - Hei hi tu ngaihtuah chhuah nge ni ang aw tih hriat a chakawm khawp mai, Asthma leh tui vawt a inbual hian inzawm na a nei loh mai bakah, thlasik lai te a i inbual te a nih phei chuan hei hian i thawhah nasa takin a tizual zawk thei a (Sudden bronchoconstriction) thih phah hial pawh a hlauhawm mai thei a ni.

☀ BP sang tan Phuihnam hi a tha an ti.
Ans - Mizo hian a tha tih tam tak kan nei a mahse eng mah hi finziahna leh zir chianna la awm lem lo a ni a. Tunah rih hi chuan chawhmeh chikhat a tan bak BP enkawl nan tak tak a hman tlak a ni e tih fiahna chu a la awm lo. Tin lo tha ve ta tehreng pawh ni se eng zat a tam nge ei tur? Enge a side effect? Eng tika ei tur nge? A Chhum nge a kan nge a hel den sawm? tu mahin hria kan awm lo. Zirchianna tak a awm hunah i ring ang u, tunah erawh chuan damdawi mal BP sang enkawl na atan leh i damdawi ei lai tihtawp nan chuan lo la hmang lo hram la a thain a rinawm.

☀ Pumpui Ulcer ah Bangladesh Peniciline a tha an ti!!
Ans - Penicilline hi antibiotics hmasa ber a ni a, atirah chuan a ei chi a awm lova tunah chuan a ei chi pawh a awm teuh tawh a, tuna Bangladesh Penicillin an tih hi ka hmu ve tawh a hetiang ang hi KPen tiin India ramah chuan a awm a, Penicilline hi damdawi zirchian nasat ber pawl a ni hial awm a. Ulcer damdawi atana atha tih zirchianna pakhatmah in a la prove lova, tin he damdawi hi hrik thahna hlo a ni a. Ulcer (Lawng) pumpui thur nasat vanga lo awm hian a ngeih ang tih hi thil rinawm tak a ni lo phawt mai. Pumpui Ulcer hrik nei chi tan pawh mithiamten an zirchian viau hnuah pawh penicilline Chauhvin a thah theih thu an sawi kan la hre lo bawk, Penicilline leh thil dang nen a pawlh Entir Nan Pantop HP kit siam sa ei hi a him ber zawkin a rinawm. Penicilline haw mi tan chuan hlauhawm tak a ni thei tih hriat a tha bawk awm e.

☀ BP damdawi ei laklawh chu ei reng a ngai a ei loh law law tur an ti!!
Ans - Hei hi mi tam takin an sawi ka hriat fo a ni a, BP sang tak tak te hian heti hian an ti a an ei duh tlat lo mai thin a, a buaithlak thin khawp mai. Heti hian thu dik famkim zawk ka han sawi ve thung teh ang, "BP sang tawh chu damdawi a ei laklawh tawh emaw a la ei lo emaw a tlangpui thuin ei reng a ngai a, ei lo pawh kha ei reng ngai ei lo mai mai an ni zawk fo" Mi thenkhat ei leh in insum a exercise te uluk tak a la peih tlemte BP damdawi ei ngai ta lo chu an awm ve nual a, mahse ka hmuh tawh a tam zawk hi chuan an thei tak tak ngai meuh lo tih hi a ni.

Note: Hei hi PC Lalthlamuana MD, Medicine Specialist. Green Wood/Nazareth Hospital. Aizawl-a mi in Hriselna Application a siam atanga lak a ni. Hriselna App hi Google Play atanga a download theih reng a ni. He App ah hian Zawhna ala zawh theih cheu bawk a ni.

ђ๓คг tlคภﻮtє