'Lo' leh 'Rawn' hman na

‘Lo’ leh ‘rawn’ tih hi hawi zawng sawina (demonstrative adverb)-a kan hman chuan ‘lo’ hian intransitive verb a sawi fiah thin a, ‘rawn’ hian transitive verb a sawi fiah thung. [‘Transitive verb’ chu thil tih sawina, a tuartu awm ngei ngai ang chi hi a ni a (entirna: sat, ei, vua, do, pe, lei, phur, adt.), ‘intransitive verb’ chu thil tih sawina, a tuartu awm ngai lova tih theih ang chi hi a ni thung (entirna: kal, zung, nui, zai, tlan, zin, adt.)]

Tichuan, ‘lo’ hmanna chi sentence han siam ta ila -
“Ka pa a lo haw.”
“Tunah Sangi a lo zai ang.”
“Kan lam panin U Madami a lo tlan.”
Ti hian, intransitive verb chu ‘lo’ (demonstrative adverb) hian a zui ta thin a ni.

‘Rawn’ hmanna chi sentence siam ve thung ila -
“Ka pain chakai a rawn hawn.”
(‘Hawn’ hi transitive verb a ni a, hawn tur awm lovin eng mah a hawn theih loh.)
“Lala'n kan dawra artui a rawn lei.”
(‘Lei’ hi transitive verb a ni a, lei tur awm lovin eng mah a lei theih loh.)
“Ni Manchhingi'n kan lova mai a rawn phur haw.”
(‘Phur’ hi transitive verb a ni a, phurh tur awm lovin eng mah a phurh theih loh.)

Ti hian, transitive verb chu ‘rawn’ (demonstrative adverb) hian a zui ta thin a ni.
‘Lo’ hi demonstrative adverb atan ni lo, tense tichiangtu atan hman theih a nih vangin thliar hran thiam a tha. Entirna:
“In ka thlenin ka pa chuan artui a lo kang mek,” tiha ‘lo’ hi demonstrative adverb (hawi zawng sawina) a ni lo va, tense tichiangtu mai a ni.
“Thlam ka thlenin ka pa a lo thleng daih tawh,” kan tih pawhin heta ‘lo’ hi demonstrative adverb (hawi zawng sawina) a ni lo va, tense tichiangtu atana thumal belh mai a ni.

Tunlai hian ‘lo’ hi intransitive verb zawmtu atan pawh tul hlek lovah rawlh kan ching a, hei hi sim a tha. Entirna:
“Ka pa thinur a lo inhrosak lai hi chuan ngawih mai a tha,” tih ang chi hi thangtharte hian hman kan ching hle. ‘Inhrosa’ (inhrosak) hi intransitive verb chu ni ngei mah se heti ang sentence-ah hi chuan telh a tul lo va, “Ka pa thinur a inhrosak lai hi chuan ngawih mai a tha,” tih mai tur a ni.

(He thu-ah hian sawi belh tur pawh a awm nual thei awm e)

Lalzarzova