Football Field len zawng, Marking hrang hrang hming leh tangkaina

Football field len zawng hre tawh kan awm nawkin a rinawma, la hre miah lo te pawh kan awm a rinawm tho mai. Football tui inti si tan chuan hriat makmawh a ni ve tlat.

Fifa Laws of the Game Law 1 chuan tihian field len zawng tur a sawi lawk sa diam a. Fifa danah chuan football field sei zawng (a dung) hi metre 90-120 (pen 100-131) a ni tur a ni a,tin, a zauh zawng (a vang) hi metre 45-90 (pen 49-100) tur a ni thung. Professional player te che tla vel kan hmuhna stadium tam zawkte hi a te pawl 100 by 64 meters (110 by 70 yards = pen) a ni tlangpuia, a lian pawl hi 110 by 75 meters (120 by 80 yards) a ni tlangpui bawk.

Field chhunga rin hrang hrang leh chhinchhiahna te an lam dan leh an hmanna lo sawi leh ila.

Touchline -

Field dung zawnga rin awm hi touchline tih a ni a, sideline ti te pawhin an sawi tho bawk. He rin pela ball a lum/sawt/thlawk chhuak a nih chuan throw-in hmanga game tan that leh a ni thin.

Goal line -

Field vang zawnga rin awm, end line ti pawha an sawi hi Goal line chu a ni. He line pela ball a kal a nih ve thung chuan a ball tawk hnuhnung tu a zirin corner kick emaw goalkick hmanga game tan that leh thin a ni.

Halfway line -

Field lai taka tan tlangtu rin hi halfway line an tih chu a ni maia, hmanna em em a awm lova, kick-off dawna team player te then hranna a ni deuh ber. Off-side ham dan a nghawng ve thei tho bawk.

Center circle -

Center circle hi field lai taka rin bial awm hi a ni ve leha, diamteter ah metre 9.15 (pen 10) niin a hmanna a tam em em lo bawk. Kick-off laiin he rin bial chhungah hian ball kick-off tu leh a lo dawngtu, player pahnih chiah an awm thei a ni.

Center spot -

Center mark pawh a tih theih tho a, field lai taka chhinchhiahna awm a ni a, kick-off dawna ball an dahna a ni deuh mai.

Penalty box -

Penalty area emaw 18-yard box an ti tho a, 16.5 by 40.32 meters (18 by 44 yards) a zau niin inkhelh laiin he box hian tangkaina a nei lian hle. He box chhungah chauh hian goalkeeper in ball a man theia, tin, opponent player te chunga foul a awm chuan penalty chawi theihna a ni bawk.

Penalty spot -

Sawi fiah vak pawh a ngai hran awm lo ve. Penalty pet dawna ball an dahna tur chhinchhiahna a ni a, goal line atanga 11 meters (12 yards) a hla a awm a ni.

Penalty arc -

Penalty area chhipa rin kual (bial tling si lo) a ni a, penalty kick a awm changin he arc chhungah hian player te an awm tur a ni lo.

Goal box -

Six yard box te pawh an ti a, penalty box chhunga box te zawk awm hi niin, goal-kick neih dawnin he box chhung khawi atang pawhin neih a ni thin.

Corner arc -

Corner kick neih dawna ball dahna tur rin bial chanve a ni a, football mual kil sir theuhah awmin he arc chhung atang hian cornner pet thin a ni.

Technical area -

Mual sira awm a ni a, team staff leh player te awmna hma chiaha dah thin niin, manager ten player te khelh dan tur an hrilh dawna an thlen theih chin a ni a, vawikhatah mi pakhat bak awm phal a ni lo bawk.

Inkhel.com