PUMPUI DAMDAWI EI DAN Dr. Thangchungnunga M.S Ortho.

Tunhnai kum 2/3 vel atang khan pumpui ulcer damdawi mahni thu leh duh dan dana ei an tam zual hle. Tul lova damdawi ei hi a tha lo hrim hrim.

Mizote hi hming phuah awlsam tak kan ni a, pumpui chakna kan tih mai a, heng - Pantop, Omez, Zenetac, Ilac, Famotidine te, a tui lam Diovol, Ulgel, Sucral O, a tam mai. kan duh dan danin kan ei mai mai a. Pumpui chakna tia lo ei ngar ngar te lah bo lo. Pumpui chak lohna zawk a ni a, a chakna ber acid tihlum leh titawptu tur a ni zawk.

A nat dan lam lo hawi tawh ila

Pum, thinhnun vel a thip a, luak chhuak deuh te, ti nghual te, pum awm nghulh, irh thur te, na vawng vawng te pawhin a lang chhuak a. A nasa deuh phei chu dar ruh phek lai zawn vel a na chhuak pawh an awm. Endoscope- a en chuan a lo pilh, khuar leh pân te- in pumpui chhung chu a lo awm thin a, a then phei chu hrik nei; helicon- bacteria an tih awm vang te a ni bawk a.

A damdawi ei dân lam lo thlûk tawh ila A rawn na in, thin a thip vung vunga ei mai tur chu, heng ---a tui chi, ulgel leh a dang te hi a ni a. A chhin khat leka ei pawh a ni lo; vanvadak a, ka- a khat pawrha leih a lem tur; acid zuk tidal tur leh a bang plaster tur a ni a. Bûr te khat chuan vawi tam ei a daih lo. Acid vawi leh khata tireh duak thei chu , SODA fiante 1, tui no 1- ah pawlh la, in la, i irh pup pup ang a, i vawih vak ang a, a reh nghal mai ang, mahse a insiam zel tur a dang thei lo a ni.

Heng Omez D, Pantop D te, Zenetac hian Acid insiamna kawng an lo block ve thung a. A ei hun chu , chaw ei kham, darkar 1 hnu vela ei te, chaw ei hma, darkar 1 te, a nat dân azirin chhun dar 2 vela ei leh pawh a pawi lo, a tlangpuithuin, nikhatah vawikhat aia tam ei hi a tul ber lem lo. Heng Pantop, Omez, Zenetac, Razo tihte hi ' D ' tel chu a thawk rang deuh a. Engpawhnise, damdawi tam ber hi chu darkar 4 vel bak a thawk tak tak lo tih hi hriat tur. Ka sawi duh ber chu, pum ruah laia ei tur ti- a, pantop DSR zing- a ei hi a ni. SR tel reng reng; Slow Release, darkar 2 hnu velah, muangchânga thawk tur a ni a, pum ruah lai ber chu zan kan muthilh lai hi a ni a, acid a insiam reng si a.

Zing in tho a, i pum a no nghual a, a thip a, irhte a thur a, thin dip a na a, chutih laia darkar 2 hmaa thawk thei lo; Pantop DSR kan doctor tam takin an chawh hi *a dik lo* a ni. Na tur a na zo tawh a, thawk nghal thei lo damdawi ei leh bawk chu, âtso- na leh sum sênna tha tak a ni. A ei dân tur chu zân mut dawnah Pantop DSR, Omez DSR, Razoacid DSR tih, ' SR ' tel hi *mut dawnah* ei tur a ni a; mut laia Acid insiam tam tur kha a lo dang ta a, zingah dam vahin i tho mai dawn a ni. Zingah i lo ei thin a nih chuan , *MUT DAWNAH* ei zawk teh.I zing tho chuan *a danglamna chu* i hre mai ang.

Pumpui chakna emaw ti- a, Ulcer, nâ pawh nei lova ei reng ho hian acid an tibo nasa lutuk a, pumpuiin a digest ang tur a tihtheih loh phaha; pum, rîl lam dik lo a siam zawk a ni.

A tawp nan

Pum damdawi ei tur, eng hunah pawh ni se, i neih thlawt lohva, a nat tlat si chuan, Tui in teuh mai rawh, a tidam tho ang che.