Pumpui Na Enkawl Dan

Pumpui pai nuamlo hi chaw, pai tawih har chi ei vang emaw, thil mawm lutuk ei vang emaw a ni thin. Tin, Zu in pawh hian a awm duh hle. A chhan chu heng thil, ei leh in te hian Pumah thil thur tam tak a siam a, Irh te a thurin Thin thip leh Pum pai nuamlo a awm tir thin a ni.

Mi thenkhat chuan Thin thip vung vung hi Lung lam that loh vangah an ngai a, an ring sual fo a ni. Thin thip vung vung hi Pumpui Pân emaw, Pumpui Lâwng vang emaw a ni thin.

Pumpui Pân leh Rilfang Pân hi Pumpui atangin Acid a insiam tam lutuk vang a ni a, a hriatchian theihna pakhat chu, Pum chu na lutuk si lovin, na awm reng si, mahse tawrh theih tawkin a na thin a, a chang chuan a thip zawk zawk thin bawk. Chutianga na chu thil ei in emaw, Bawnghnute in in emaw a reh deuh va. A changin a na chu Chaw ei hnu Darkar hnih velah emaw, Chaw ei hmain emaw a rawn awm thin. Tin, Chaw mawm lutuk ei te, Zu in te, Mosola leh Hmarcha ei te hian a na a tizual duh a ni.

A enkawl dan leh a ven dan
A na awmtir theitu Chw ei ai chuan, a tidam theitu Chaw ei zawk rawh.

Pumpui Pân ven nan hengte hi eitur a ni - Bawnghnute chhuanso, Cheese, Bawnghnute khar, Chhangphut chhum diak leh Balhla.

Artui, Biscuit al chi, Chow chhum tui hang, Alu, Iskut, Cake leh Balhla te hi Pumpui Pânin a haw lo.

Tin, Zu, Coffee, Mei zuk, Mosola, Hmarcha, Soda, Cococola leh thil mawmte hian Pumpui Pân an tizual thei bawk.

Bawnghnute hi Pumpui Lâwng emaw, Pân emaw, Thin thip emaw tan damdawi tha berte zinga mi a ni a, Pumpui Pân nasa tawhah chuan Bawnghnute hi Darkar khat danah ni eng emaw zat chhung In ziah tur a ni a; tin, a chunga Pumpui na ven theihna thil te khi ei tam bawk tur a ni. Hemi hnua a lo ziaawm deuh chuan Pumpui Pân in a huatloh thilte ei tan tur a ni. Tin, hun eng emaw ti chhung chu Chaw ei apiangin Bawnghnute ei tel tur a ni a, a theih phei chuan Zing Chaw ei hnu, Chhun Thingpui in hma siin Bawnghnute in ziah la, Tlai Thingpui in leh hma pawhin in leh thin a tha. Hetianga tih theih chuan a tha chak hle a ni. Tin, nikhatah tlemte te in Chaw vawi 6 ei tum la, Zan mut dawn pawh tiamin, hei hi Pumpui Pân in a dam phah thei bawk a ni.

Antacid an tih Milk of Magnesium leh Aluminium Hydroxide te pawh hi Pumpui a Acid tam lutuk pawlh dal turin ei la, a ei dan tur dik taka ei chuan Pumpui Pân a tidam thei a ni.

Pumpui Pân hi a lo dam hnuah pawh ei leh in fimkhur loh chuan a rawn na leh duh hle a, chuvangin a ngeih loh chi reng reng chu ei leh tawh loh tur. A theih phei chuan mut dawn apiangin Antacid ei ziah tur a ni.

Sources:- Dr. HB James, Hriselna July 2015

ђ๓คг tlคภﻮtє