Sate Man Dan

Sate man dan ve thung aw.

A hmasain Sate kan tih tak hi eng nge an nih tih hi ka hre chiang lemlo a, thenkhatin "Ramsa Ar tiat rualho vel hi Sate an ni mai. A bikin an awm chuangjo" an ti a. Engpawh lo nise Sate a ni tawp mai a ni. Pu Buanga chuan Sate hi Wild-Cat ti in a dah a, thlalak pawh khi chu chu a ni e.

Sate ho hian tui an tih ber chu Khuaino leh a Zu hi a ni a, chuvangin man i tum chuan khuai no neih hun lai in i zawng tawp mai dawn nia aw. An khuaila i hmuh fuh ta a ti hian ti ang che, khuai chuan thingkungah bu an siam tlangpui a, sate in an hmuh chuan a pa zawk hian maimitchhingin a han la a, a nu zawk hian a hnuaiah a lo nghak a, a nu zawk chu a hlan chhawng zel thin, chutia an khuai la lai i hmuh fuh chuan, han lawn chilh ve la, maimitchhing ve lo a nu zawk chuan a hlauh che avangin a rang a rangin a zuangthla ang a, a tlahlum anih loh pawh in a na thawkhat viau ang. tichuan a pa khuai lak sa chu ilo ak zel anga, a tawpah a mawnga beng phut pah chuan ring tawk in, "a awm tawh mang nange," han ti phut mai la, a thidang kha a let thla tawp anga, a hnuaiah a nu zawk nen chuan i vawhlum ang a, i ak haw tawh mai dawn a ni. I va hlawhtling leh pek em!

ђ๓คг tlคภﻮtє

Zawng Man Dan

Zawng man dan ve thung.

Zawng hi hmanraw tello chuan a man a man theih rual an nilo tih chu kan hre vek awm e. Mahse hmanrua pawh ngai vaklo a man theih dan hi a awm ve tlat. Han chhiar phawt teh.

Zawngho hi a huho a puka khawsa thin an ni a, kham pang sang takah hian an puk a awm tlangpui a, chhun lamah chaw zawngin an chhuak vek a, chu tak chu i hun tha chu a ni. Chaw zawng a an chhuah vek han nghak phawt mai la, an chhuak vek ta maw tihah Adama suit nen an puk kil thim lai berah chuan ilo tawm khar anga, mahse hmanhmawh vak a ngailo, tlai thim hlimah an rawn haw khawm ang, pukah an lut kim ta maw tihah i awrawl tawp tak meuh meuh in, "Tawlh ru ka chep," han ti tuarh mai la, an phu nasa lutuk chu an zuangchhuak sup sup ang a, kham hnuaia lung kelki pui puiah chuan an insawh hlum vek mai ang, i phur senglo hial mai thei a ni, midang i pun a ngai ngei ang. I va hlawhtling leh pek em.

Zawng nupa chauh man dan ve thung,

Zawng hi fing deuh an nih rualin at na lai tak hi an nei a, thil an hum tawh chu thlah nachang an hre hauh lo hi a ni. Tin, chi hi an duh em em mai a, chu chu remchangah hmangin an kut leng lekin mau kha hmun hnihah i rek kua anga, chutah chuan Chi i dah ve ve anga, i chi dah chu an rawn hmuh ngei na turah dah la, an rawn hmu ngei ang a, an rawn tham chat ang a, an kut an phawi thei tawh lovang, an kut hum thlah nachang hre tawh hek lo, i kawt haw nelh nelh tawh mai ang.

A dang pakhat.

Zawng ho hian Zu an duh em em mai a, Zu han bilh luau mai la, a tak ta maw tihah Zawngrual awmna hmun ah i dah ang a, i zu bilh i dahna hmunah chuan Raw bul chhah tha lerh lawrh dah tel ang che, i zu rim in a ko rang teh ang chu, a pachal ber chuan a dâwt hnuhnung ber ang a, a naupang pang atangin an dawt tan ang a, a tawp berah a pachal chuan duhthawh deuh in a dawt ve ang, a beisei aiin a lo thlum tui ngei ang, a kid te a huphurh ta tlat mai, an chuhpui ve hlau in i Raw bul dah khan a kid te chu a hem thlu vek ang a, amah chauhin a dut quit vek ang. A lo chatthla ngei bawk ang a, chu chu remchangah ila anga, a pachal ber chatthla chu i hem hlum ve leh ang a, Ramvachal i ni ringawt mai ang a. I thiante chuan an va ngaisang dawn che em!

ђ๓คг tlคภﻮtє

Savawm Man Dan

Tunah Savawm man dan ve thung aw.

Savawm hi ramsa mawl leh Mihring zahlo deuh mai an ni a, mi an hmuh chuan seh nghal mai an tum thin a, an hlauhawm em em a, chuvangin a man danah pawh hian fimkhur hle tur a ni.

Savawm awmna a i kal a, man i tum chuan Dawrawn(Em chikhat sei deuh pet put) nghawngkawlin phur ang che, Savawm chuan a hmuh veleh che seh tumin a rawn zuan ang che a, a rawn zuan lai tak chuan lo kun zauh la, i dawrawn phurh chhungah a zuang lut that mai ang, a chhuak leh thiam tawh dawn hek lo, a nung chungin i phur haw tawh mai dawn a ni. A rih deuh dawn avangin i chawlh pawn fimkhur tur a ni. Tichuan In ah i vawhlum anga, a sa i ei bak ah a mit to deuh in i hralh tawh mai ang,

Chu ti lo pawhin ila man thei, Rod bung kutphah chen vel i keng anga, seh tuma a ka theih tawpa a an veleh, rod bung khan a ka chhungah i va kam zeuh anga, a chip thei tawh lovang a, a na ti leh hamhaih chu a let tawp tawp anga, i duh leh a hah hun nghah pahin Meizial pawh i zuk san thei ang. A hah ta maw tihah Thing tuai lian tha lerh lawrhin i vawhlum tawh mai dawn a ni.

ђ๓คг tlคภﻮtє

Sakuh Man Dan

Sakuh sa hi sa tui tak anih rualin puah uluk loh chuan rim hi an nei deuh a. Thenkhat hi chuan an ei thei derlo. An te na vang vang ai hian an hlauhawm zek a, sakei tan pawh awlsam taka han seh hlum theih an ni biklo. Chuvangin mihring tan pawh hian an hlauhawm em em a, pawngpaw nuthuri zuam ngawt chi an nilo tih chu an Kuh atang hian a hriat mai awm e. Tun tumah hian awmsam tak leh inhliam miahlo a man dan kan sawi dawn a ni.

Sakuh hi lei kua a khawsa an ni a, an kawpui ah hian pasarih vel an tawm tlangpui a, Tin, Sakuh tui tih ber chu Tatkawng rah hi a ni a, tui an tih em avangin Tatkawng kung hnuaiah hian Kawpui an hreuh thin.

An kawpui i hmu fuh ta ah lo ngai i la, tichuan Changel kung pasarih nen a kaw bulah i lo awm ang, a kaw bul ah chuan i changel kung khat kha han vaw ri dawp la, Tatkawng rah tla thawm emaw an ti ngei ang a, pakhat a rawn chhuak dek dek anga, chu tak chu i lo vaw pawp ang a, i vuak chauh bakah a kuh ah khan i changel i vuak tlum vek avangin a tal thei tawh lo ang a hmun rem deuhah i tung tha rih ang. Tichuan i vuak thawm kha Tatkawng rah tla bawk turah ngaiin a dang an rawn chhuak zel ang, i lo vaw nghauh nghauh ang a, i pu haw tawh mai dawn a ni, a vai chuan i pu haw seng kher lovang a, i thiante emaw i sawm a ngai hial ang. sa hawn bawk, vawkchaw hawn bawk. Inhliam lo leh awlsam tak in i man teuh tawh mai dawn a ni. I va hlawhtling tak em aw...

ђ๓คг tlคภﻮtє